Read mbula bwazza Sǝna 4 Bible Online

Sǝna 4 - mbula bwazza bible

Sǝna 4

¹Anzǝm mǝno ka, ǝn soa mǝsǝam kara ǝn sǝn kunkurǝm a kuli mǝnana à mǝnni sǝ à nyi atarǝì ka. Sǝ yì gìu mǝnana ǝn oe atadǝmbe nam cau kǝla ɓua mala njawe ka, bangŋa ama, “Yiu kani a kuli, mǝ nǝ lǝmndǝo gir mǝnana nǝ̀ yia kumban anzǝm mǝnia ka.”[31]

²Kara Bangŋo mala Ɓakuli em. Ən sǝn bunomurǝm a kuli andǝ ɓeɓwa aban do amuri.[32]

³Ɓwa mǝno do amur bunomurǝm ngga, ɓamǝsǝi kǝ tânzama, kǝla tǎ mala atali jaspa andǝ kaneliya. Sǝ tànzama mala tali emeral ka, kàrǝì bunomurǝm male kǝla nparing.

⁴Aɓea abuno-murǝm lumi-ɓari-nong-ine gumbǝli mǝnia yì bunomurǝm ngga a ɓalǝu, nǝ aɓwana-mǝgule lumi-ɓari-nong-ine aban do amuria. À oasǝ adaura pwasǝa a rǝia andǝ ambulan zǝnariya a ɓamuria.

⁵Liki'nzama mala tǎlaban, sǝ akia mala agiu andǝ sàkkya mala mgbarangce ka, kǝ pur nǝban bunomurǝm nì. A ɓadǝm bunomurǝm nì ka aɓukan nakam tongno-nong-ɓari à kǝ earke nǝ bǝsa. Amǝnia ka, à ndaka bangŋo tongno-nong-ɓari mala Ɓakuli.[33]

⁶A ɓadǝm mǝnia yì bunomurǝm ɗǝm ngga, ǝn sǝn ɓe gir sarǝa nongŋo kǝla nggeamur mǝnana à pe nǝ gǝlas ka. Esǝke kwar gǝraɗau kǝla talimbulo. Agiryilǝmu ine mǝnana à lumsǝ nǝ amǝsǝu a ɓadǝmbǝia andǝ nzǝmia ka, à came a ɓaɓalǝu arǝ abuban mala bunomurǝm nì.[34]

⁷Mǝdǝmbe mala amǝnia yì agiryilǝmu ka, nda kǝla im; ɓaria ka nda kǝla jamnda; tārùia ka ndanǝ ɓamǝsǝu kǝla mala ɓwapǝndǝa; sǝ inea ka nda kǝla nkwang mǝnana kǝ yal ka.[35]

⁸Ko mǝye na ata mǝnia yì agiryilǝmu ka ndanǝ abu-nyal tongno-nong-mwashat. Rǝia kat ka lumsǝ nǝ amǝsǝu a ɓalǝu andǝ nza. Du andǝ pwari à usǝlǝki ɗang, à nda mur tu nggyal ama, “Mǝfele, Mǝfele, Mǝfele nda Mǝtalabangŋo Ɓakuli mana Karmur Gulo kat, mana ndakam ɗiɗyal, ndakam ado, sǝ nda kǝ yiu ka.”[36]

⁹Agiryilǝmu nì lidǝmbǝa nǝ pa ɓwangsǝban, andǝ gulo andǝ yàwá aban ɓwa mǝnana do amur bunomurǝm, mǝnana ndanǝ yilǝmu mana málá male pà kàm raka.[37]

¹⁰Aɓa mǝno anggo ka aɓwana-mǝgule lumi-ɓari-nong-ine gbal ka, à nǝ̀ kpa a nzali a ɓadǝm ɓwa mǝnana do amur bunomurǝm ngga. À nǝ̀ peri abani, yì ɓwa mana ndanǝ yilǝmu mana málá male pà kàm raka. Lang ɓǝ̀ à nda aɓa peri anggo ka, à nǝ̀ nongsǝ ambulan-murǝm malea a ɓadǝm bunomurǝm nì sǝ à nǝ̀ bangŋa ama:

¹¹“A karǝna, We Mǝtalabangŋo Ɓakuli ma'sǝm. A karǝna ɓǝa ɓwangsǝo, ɓǝa po gulo, sǝ wu ak rǝcandǝa. Acemǝnana a nda mana a pusǝ agir kat ka. Kani mala ɓabumo na sǝ a pusǝia, sǝ do malea gbal ka, kani mala ɓabumo na.”