Read mbula bwazza Sǝna 5 Bible Online

Sǝna 5 - mbula bwazza bible

Sǝna 5

¹Aɓa bu-mǝli mala Yì ɓwa mǝnana do amur bunomurǝm ngga, ǝn sǝn ɓe malǝmce mana à kǝ̀ karì ka, mǝnana à gilǝ cau kam ɓālǝi andǝ nzǝmi, sǝ à lanzǝ kuni nǝ agbatali myang arǝ abanì tongno-nong-ɓari ka.[38]

²Sǝ ǝn sǝn ɓe nggea kanggǝrang mǝturonjar mala Ɓakuli came loasǝ gi bang-bang, aban hama ama, “Yana ɓwe kārǝa nǝ fasǝki amyang mǝnia à lanzǝkina kun mǝnia yì malǝmce nǝi ka, sǝ nǝ̀ panzǝi?”

³Sǝ ko kǝɓwa pà kàm a kuli ko a nzali ko a ta nzali, mǝnana kārǝa nǝ̀ mǝn mǝnia yì malǝmce, ko nǝ̀ sǝn gir mǝnana à gilǝa a ɓalǝi ka ɗang.

⁴Pǝlǝa ǝn kpa ɓua kǝrkǝr, acemǝnana à kum kǝɓwa mǝnana kārǝa nǝ̀ mǝn mǝnia yì malǝmce, ko nǝ̀ sǝn ɓālǝi ka ɗang.

⁵Pǝlǝa mwashat ata aɓwana-mǝgule mǝno lumi-ɓari-nong-ine ka nam ama, “Pwalo, ce a ɓua ɗang! Sǝni, ɓwa mǝnana à tunǝki ama Im, a tau mala Yahuda, sǝ ɗǝm ngga Mǝkà murǝm Dauda na ka, linamurǝm mǝnana ci karǝna nǝ̀ fasǝki amyang-kun yì malǝmce, mǝnana à lanzǝi nǝia ka, sǝ nǝ̀ mǝnni.”[39]

⁶Pǝlǝa ǝn sǝn Mǝgam mǝnana pa kǝla à pwanmeali ka, nda aban came nǝ ɓaɓalǝu aban bunomurǝm, sǝ agiryilǝmu mǝno ine andǝ aɓwana-mǝgule ka, à kàrǝì aɓalǝu. Ndanǝ anjawe tongno-nong-ɓari andǝ amǝsǝu tongno-nong-ɓari, amǝnana à ndaka bangŋo tongno-nong-ɓari mala Ɓakuli mǝnana à tasǝia arǝ aban kat aɓa ɓanza ka.[40]

⁷Mǝgam nì pǝlǝa yiu yi ak malǝmce nî a bu-mǝli mala Yì ɓwa mǝnana do amur bunomurǝm ngga.

⁸Lang angŋǝna malǝmce nî ka, agiryilǝmu mǝno ine andǝ aɓwana-mǝgule lumi-ɓari-nong-ine ka, à sarǝa a nzali a ɓadǝm Mǝgam. Koyana atea ka ndanǝ zangŋan, sǝ à bwal atasau zǝnariya a buia mǝnana à lumsǝia nǝ mukugir ace loasǝ yele mǝ'rǝmɓoarne ka; yì mukugir mala loasǝ yele mǝ'rǝmɓoarne ka nda ahiwi mala aɓwana mala Ɓakuli.[41]

⁹Pǝlǝa agiryilǝmu andǝ aɓwana-mǝgule mǝno tu bǝsa nggyal ama: “A karǝna wu ak malǝmce nî, sǝ wu fasǝki amyang-kuni. Acemǝnana we ka à pwanmealo, sǝ nǝ nkilio sǝ a akmúr aɓwapǝndǝa ace Ɓakuli, aɓa koya kun, andǝ koya lasǝu, andǝ aɓwana arǝ anzali ɗàngɗáng.[42]

¹⁰A nyesǝnia à pǝlǝna aɓwana mǝnana Ɓakuli ma'sǝm nda murǝm amuria, sǝ apǝris ace pakki wi turo, sǝ à nǝ̀ duk agbani[43] a ɓanza.”[44]

¹¹Lang mǝ ndaban sǝnban ngga, ǝn ok gi amǝturonjar mala Ɓakuli pas. Lakki malea na á-pas andǝ amilǝyan amur amilǝyan! À gumbǝli bunomurǝm andǝ agiryilǝmu andǝ aɓwana-mǝgule aɓalǝu.[45]

¹²À loasǝ gia a kuli à tu'nggyal ama: “Mǝgam mǝnana à pwanmeali ka, karǝna ɓǝ̀ ak garamurǝm, andǝ kume, andǝ sǝlǝe, andǝ rǝcandǝa, andǝ gusǝlǝban, andǝ ɓoarɓwa, andǝ ɓwangsǝban!”

¹³Pǝlǝa ǝn ok agir kat mǝnana Ɓakuli pusǝia ka, amǝnana a kuli ka, andǝa mǝnana a nzali ka, andǝa mǝnana a tǝta nzali ka, andǝa mǝnana a tamur ka, aban ɓwangsǝki Ɓakuli. À tu'nggyal ama: “Ɓwangsǝban andǝ gulo, andǝ ɓoarɓwa, andǝ rǝcandǝa ka, ɓǝa pe Yì ɓwa mǝnana do amur bunomurǝm ngga sǝ ɓǝa pe Mǝgam, málá male pà kàm ɗang!”

¹⁴Agiryilǝmu mǝno ine ka, à ear ama, “Amin!” Sǝ aɓwana-mǝgule ka, à kpa a nzali aban peri.