Read mbula bwazza Sǝna 6 Bible Online

Sǝna 6 - mbula bwazza bible

Sǝna 6

¹Mǝ ndarǝ sǝne sǝ Mǝgam fasǝ mǝdǝmbe mala agbatali myang tongno-nong-ɓari mǝnana à lanzǝ kum mǝno yì malǝmce mana à kǝ̀ karì ka. Pǝlǝa ǝn ok mwashat ata agiryilǝmu mǝno ine ka, bangcau nǝ giu kǝla sa mala mgbarangce, ama, “Yiu!”

²Pǝlǝa ǝn soa mǝsǝam, kara ǝn sǝn pǝ̀r mǝpwasǝe a ɓadǝmbǝam aban came! Ɓwa mǝnana a nzǝmi kwakiyi ka, ndanǝ nta a bui. À oasǝi wi jeko amuri, sǝ puro kǝ tswaki aban ká kǝla mǝlimurǝm mana she nǝ̀ limurǝm arǝa lwa ka.[46]

³Lang Mǝgam fasǝ ɓaria gbatali myang ngga, ǝn ok ɓaria giryilǝmu na ama, “Yiu!”

⁴Pǝlǝa ɓe pǝ̀r puro yi came! Mǝnia ka mǝbangŋe na, sǝ ɓwa mǝnana a nzǝmi kwakiyi ka, à pe wi rǝcandǝa ɓǝ̀ kiɗiki dotarǝu a ɓanza, sǝ ɓǝ̀ tsǝk aɓwapǝndǝa ɓǝa kǝ wal-lú ka rǝia. À pe wi nggeabyau mǝgule a bui.

⁵Lang Mǝgam nì fasǝ tāruia gbatali myang ngga, ǝn ok tāruia giryilǝmu na ama, “Yiu!” Ən loasǝ mǝsǝam, pǝlǝa ǝn sǝn pǝ̀r mǝpǝndǝe puro yi came! Ɓwa mǝnana a nzǝmi kwakiyi ka bwal sǝkel a bui.

⁶Pǝlǝa ǝn ok giu kǝla pur nǝban agiryilǝmu mǝno ine ka. Na ama, “Tasau mwashat mala muku yare ka, nda à nǝ̀ pǎ nda tangnakusǝu mala turo pwari mwashat ka. Sǝ tasau tārú mala muku kauri ka, nda à nǝ̀ pǎ nda tangnakusǝu mala turo pwari mwashat ka. Sǝ ce wu kiɗiki muru andǝ mùr-anap ɗang!”[47]

⁷Lang Mǝgam fasǝ inea gbatali myang ngga, ǝn ok gi inea giryilǝmu na ama, “Yiu!”

⁸Pǝlǝa ǝn sǝni ka, ɓe pǝ̀r mǝ'gwalani puro yi came! Ɓwa mǝnana kwakiyi ka, lullǝi ama Lú, sǝ Domurǝm mala Lú kǝ gya ate tu. Yia Lú andǝ Domurǝm mala Lú ka, à pea wia rǝcandǝa mala pakturo nǝ lwa, andǝ nzala, andǝ kwano, sǝ anyamcandǝa mǝnana a ɓanza ka, ɓǝa kiɗiki banì mwashat aɓa gauwe ine mala ɓanza.[48]

⁹Lang Mǝgam fasǝ tongnoia gbatali myang ngga, kara ǝn sǝn ayilǝmi aɓwana aban rambǝa aɓata gyangŋan-ɗarǝa; aɓwana mǝnana à wal-luia ace earnǝ cau mala Ɓakuli andǝ bangŋe aban aɓwana ka.

¹⁰À loasǝ gia kǝrkǝr à ɓua aban Ɓakuli ama, “She aya fara le, we Mǝtalabangŋo mǝnana a Karban kat ka! We mǝfele andǝ mǝ'mǝsǝcau nì, aya fara sǝ a nǝ pakki ɓanza ɓashi, sǝ a ya pwari sǝ a nǝ mbwea ace nkila ma'sǝm mǝnana à sukki ka?”[49]

¹¹Pǝlǝa à pe ko yana atea ka nggea-daura pwasǝa, sǝ à banggia wia ama ɓǝa do, ɓǝa kundǝ kam bǝti, she ɓǝ̀ lakki mala aɓia amǝturo andǝ amǝ'eambǝia mǝnana à nǝ̀ wal-luia, kǝla mǝnana à walia ka, lumsǝna ka.

¹²Mǝ ndarǝ sǝne sǝ Mǝgam fasǝ tongno-nong-mwashatia gbatali myang. Kara nzali dǝurǝki kǝrkǝr. Pwari twalo pǝndǝ cikcik kǝla nggurbyau pǝndǝa, zongŋo pǝlǝ mǝbangŋe kǝla nkila,[50]

¹³sǝ anlero mǝnana a kuli ka, à sukkio a nzali, kǝla amgbangŋa vwari mǝnana gung mǝcande dǝurǝki nggunia, sǝ à sukki a nzali ka.[51]

¹⁴Kuli karkya kǝla karki kala, sǝ koya nkono andǝ luran ngga, à ui aban came male.

¹⁵Pǝlǝa amurǝma mala ɓanza, andǝ amǝ'yalmur aɓwana, andǝ amǝgulo mala asoje, à ɓangŋa, à kya sǝmbǝrǝa aɓalǝ agumi andǝ anre ka atali mala ankono. À kya sǝmbǝrǝa abanì ata rǝia andǝ amǝkume, andǝ aɓwana amǝcande, andǝ koya guro andǝ aɓwana à dukdo ɓamuria ka[52].

¹⁶À ɓuaki arǝ ankono andǝ atali ama, “Wu kpa amur sǝm, wu sǝmbǝrǝ sǝm ace mǝnana Yì ɓwa mana do amur bunomurǝm ngga, ɓǝ̀ kǝa sǝn sǝm ɗang, sǝ ɓǝ̀ sǝm api bumlulla mǝɓike mala Mǝgam![53]

¹⁷Acemǝnana pwari mǝgule mala lǝmndǝ bumlulla mǝɓike malea yina, sǝ yana ɓwe nǝ̀ came?”[54]