Read mbula bwazza Sǝna 7 Bible Online

Sǝna 7 - mbula bwazza bible

Sǝna 7

¹Anzǝm mǝno ka ǝn sǝn amǝturonjar mala Ɓakuli ine aban came arǝ abumban ine mala ɓanza. À kùr agúng mǝnana à kǝ lo ɓua nǝ abuban ine mala ɓaɓanza ka, ace mǝnana gung ɓǝ̀ kǝa ɓua amur nzali ko nggeamur, ko anggun raka.[55]

²Pǝlǝa ǝn sǝn ɓe mǝturonjar aban eauwe a kuli nǝ njartakuli, nǝ gbǝlman-parbu mala Ɓakuli mǝyilǝmuì a bui. Loasǝ gi bang-bang na cau nǝ amǝturonjar mǝno ine ka, yia mǝnana Ɓakuli pania wia rǝcandǝa ɓǝa kiɗiki nzali andǝ nggeamur ka, ama,

³“Wu came! Wu kǝa na ama wu nǝ̀ je nzali ko nggeamur ko anggun ama wu nǝ̀ kiɗikia ɗang, she ɓǝ̀ sǝm tsǝngŋǝni aguro mala Ɓakuli ma'sǝm nyoulǝa mala parbu a kundǝmbǝia ka.”[56]

⁴Pǝlǝa ǝn oe à na lakki mala aɓwana mǝnana à tsǝkia wia nyoulǝa mala parbu amuria ka; aɓwana á-gbǝman-mwashat nǝ á-lumi-ine-nong-ine [144,000], aɓalǝ atau mala amǝ Isǝrayila.

⁵Aɓa tau mala Yahuda ka, aɓwana á-lum-nong-ɓari na à tsǝkia wia nyoulǝa mala parbu ka. Aɓa tau mala Ruben ngga aɓwana á-lum-nong-ɓari na. Aɓa tau mala Gad ka aɓwana á-lum-nong-ɓari na.

⁶Aɓa tau mala Asha ka aɓwana á-lum-nong-ɓari na. Aɓa tau mala Naftali ka aɓwana á-lum-nong-ɓari na. Aɓa tau mala Manasa ka aɓwana á-lum-nong-ɓari na.

⁷Aɓa tau mala Shimiyan ngga aɓwana á-lum-nong-ɓari na. Aɓa tau mala Lawi ka aɓwana á-lum-nong-ɓari na. Aɓa tau mala Isaka ka aɓwana á-lum-nong-ɓari na.

⁸Aɓa tau mala Zebulu ngga aɓwana á-lum-nong-ɓari na. Aɓa tau mala Yisǝfu ka aɓwana á-lum-nong-ɓari na, sǝ aɓa tau mala Benjami ngga aɓwana á-lum-nong-ɓari na à tsǝkia wia nyoulǝa mala parbu ka.

⁹Anzǝm mǝnia ka ǝn sǝn nggea rambǝa mala ɓwabunda kǝrkǝr, mǝnana kǝɓwa pà nǝ̀ gandǝ ɓalǝia raka. À pur arǝa koya nzali, andǝ akûn, andǝ aɓwana mala atau ɗàngɗáng, andǝ alasǝu, sǝ à came a ɓadǝm bunomurǝm andǝ ɓadǝm Mǝgam. À oasǝ anggea-daura pwasǝa a rǝia sǝ à bwal ambu nkangga a buia.

¹⁰À loasǝ gia kpǝm à kǝ na ama, “Amsǝban ngga kǝ yiu nǝban Ɓakuli ma'sǝm, mǝnana do amur bunomurǝm ngga, sǝ nǝban Yesu Mǝgam!”

¹¹Sǝ amǝturonjar mala Ɓakuli kat ka, à nda à came, à kàrǝì bunomurǝm andǝ aɓwana-mǝgule andǝ agiryilǝmu ine aɓalǝu ka. À sarǝa a ɓadǝm bunomurǝm nǝ ɓamǝsǝia a nzali sǝ à peri aban Ɓakuli,

¹²à kǝ na ama, “Amin! Ɓwangsǝban andǝ ɓoarɓwa, andǝ sǝlǝe, andǝ yàwá, andǝ gulo, andǝ garamurǝm, andǝ rǝcandǝa ka, a mala Ɓakuli ma'sǝm na, mǝnana mala male pà kàm raka. Amin!”

¹³Pǝlǝa mwashat ata aɓwana-mǝgule ɗiem ama, “Ayana à ndaka aɓwana mǝnia aɓalǝ adaura pwasǝa ka, sǝ aya ban sǝ à puro?”

¹⁴Sǝ ǝn eari wi nǝma, “Ɓwamǝgule, ǝn sǝlǝ ɗang. A nda a sǝlǝ ka.” Pǝlǝa nam ama, “Amǝnia ka, à ndaka ɓwana mǝnana à purî ɓa nggea tanni mǝgule ka. À lakína adaura malea sǝ à tsǝngŋǝnia à pǝlǝna amǝpwasǝe aɓa nkila mala Mǝgam.[57]

¹⁵“Nda tsǝa sǝ à came a ɓadǝm bunomurǝm mala Ɓakuli sǝ à kǝ pakki wi turoperi, du andǝ pwari, aɓa Ndàmǝgule male; sǝ Yì ɓwa mǝnana do amur bunomurǝm ngga, nǝ̀ dupia wia tara amuria.

¹⁶À pà nǝ̀ ok nzala ɗǝm ɗang ko bǝti, sǝ mǝsamur pà nǝ̀ nyare nǝ̀ walia ɗǝm ɗang ko bǝti. Pwari pà nǝ̀ walia ɗǝm ɗang ko bǝti, sǝ ɓe kǝ tosǝkiban mala banpina pà nǝ̀ yiu amuria ɗǝm ɗang ko bǝti.[58]

¹⁷Acemǝnana Mǝgam mana nda a ɓaɓalǝu aban bunomurǝm ngga, nǝ̀ dupia wia yalgir amuria; nǝ̀ kánǝia aban amgbeaɗe mǝnana à pākiyi mur yilǝmu ka. Sǝ Ɓakuli ka nǝ̀ esǝkia wia mǝrǝm kat a mǝsǝia.”[59]