Read KIMERU BIBLE PROTESTANT EDITION Kîam 11 Bible Online

Kîam 11 - KIMERU BIBLE PROTESTANT EDITION bible

Kîam 11

¹Nayo nthîgûrû yonthe îgiiteene rîu yaarî na rûthiomi rûmwe na biugo o bimwe.

²Kûrakara atîrî, rîrîa antû baathaamaga kuuma bwa gaiti nî beethîre mûgwanthî jûrîa jwaarî nthîgûrû ya Shinari, nabo baratûûra ku.

³Bareerana atîrî, “Njûûni tûûmbe maturubarî na tûjaîîthie bwega buru.” Tontû bûû, bareethîrwa barî na na maturubarî antû a maiga, na rami antû a cimiti.

⁴Baracoka bareerana atîrî, “Njûûni twaake ntûûra na twaake mûnaara jûmûraaja jwitîîtie jûgatongithia îgûrû, nîkenda twicwîîra nkuma na tûtîkeeje kûnyagua nthîgûrûûne kunthe.”

⁵MWATHANI nî eenamîre kwona ntûûra îîu na mûnaara jûrîa antû baakîte.

⁶MWATHANI arauga, “Tega, antû baba nî antû bagwatanîrîte na barîaria rûthiomi rûmwe bonthe, na jûjû nîju mwambîrîrio jwa mantû jarîa bakaathithia. Tontû bûû, gûtî ûntû bakeenda kûthithia bûbarema.

⁷Njûûni, twîname nao, tûrigicanie rûthiomi rwaao nîkenda gûtî muntû ûkaamenyaga ûrîa ûngî akuuga.”

⁸Tontû bûû, MWATHANI arabanyagania nthîgûrûûne kunthe, baratiga gwaka ntûûra îîu.

⁹Tontû bûû, antû au areetwa Babeli. Nîkwîthîrwa au nîo MWATHANI aarigicanîîrie rûthiomi rwa nthîgûrû yonthe, na nîo MWATHANI aanyaganîîrie antû bareeta gûntû mwanya mwanya nthîgûrûûne.

¹⁰Iji nîcio nchiarwa cia Shemu. Rîrîa Shemu aakinyîrie ûkûrû bwa mîaka îgana rîmwe (100), nîrîo aagîîre na mûtaana weetagwa Aripakishadi, mîaka îîrî nyuma ya ngai ya maburiko.

¹¹Nyuma ya kûgîa na Aripakishadi Shemu nî aakarîre mîaka magana jataano (500). Ningî nî aarî na ataana bangî na aarî.

¹²Aripakishadi aakinyia mîaka mîrongo îthatû na îtaano (35) nîrîo aagîîre na mûtaana waawe Shela.

¹³Nyuma ya kûgîa na Shela, Aripakishadi aratûûra mîaka magana jana na îthatû (403). Ningî nî aarî na ataana bangî na aarî.

¹⁴Shela agûkinyia mîaka mîrongo îthatû (30) nîrîo aagîîre na mûtaana weetagwa Eberi.

¹⁵Nyuma ya kûgîa na Eberi Shela aratûûra mîaka magana jana na îthatû (403). Ningî nî aarî na ataana bangî na aarî.

¹⁶Rîrîa Eberi aakinyîrie mîaka mîrongo îthatû na îna (34) nîrîo aagîîre na mûtaana weetagwa Pelegi.

¹⁷Nyuma ya kûgîa na Pelegi, Eberi nî aatûûrîre mîaka magana jana na îthatû (403). Ningî nî aarî na ataana bangî na aarî.

¹⁸Rîrîa Pelegi akinyîrie mîaka mîrongo îthatû (30) nîrîo aagîîre na mûtaana weetagwa Reu.

¹⁹Nyuma ya kûgîa na Reu, Pelegi nî aatûûrîre mîaka magana jaîrî na kenda (209). Ningî nî aarî na ataana bangî na aarî.

²⁰Rîrîa Reu aakinyîrie mîaka mîrongo îthatû na îîrî (32) nîrîo aagîîre na mûtaana weetagwa Serugu.

²¹Nyuma ya kûgîa na Serugu, Reu nî aatûûrîre mîaka magana jaîrî na mûgwanja (207). Ningî nî aarî na ataana bangî na aarî.

²²Serugu agûkinyia mîaka mîrongo îthatû (30), nîrîo aagîîre na mûtaana weetagwa Nahori.

²³Nyuma ya kûgîa na Nahori, Serugu aatûûrîre mîaka magana jaîrî (200). Ningî nî aarî na ataana bangî na aarî.

²⁴Nahori agûkinyia mîaka mîrongo îîrî na kenda (29) nîrîo aagîîre na mûtaana weetagwa Tera.

²⁵Nyuma ya kûgîa na Tera, Nahori nî aatûûrîre mîaka îgana rîa îkûmi na kenda (119). Ningî nî aarî na ataana bangî na aarî.

²⁶Tera agûkinyia mîaka mîrongo mûgwanja (70) nî aagîîre na ataana beetagwa Abramu, na Nahori, na Harani.

²⁷Iji nîcio nchiarwa cia Tera. Tera aagîîre na ataana beetagwa Abramu, na Nahori, na Harani. Harani nîwe waarî îthe wa Loti.

²⁸Harani nawe aakuîrîîre nthîgûrû îrîa aaciarîri, ntûûra yeetagwa Uru îrîa yaarî nthîgûrûûne ya Ababiloni, mbere ya îthe Tera akua.

²⁹Abramu na Nahori nî baagûrîre aka. Mwekûrû wa Abramu eetagwa Sarai, nawe mwekûrû wa Nahori eetagwa Milika ûrîa waarî mwarî wa Harani. Ningî Harani nowe waarî îthe wa Isika.

³⁰Sarai ataarî na mwana tontû aarî nthaata.

³¹Tera nî aajûkîrie mûtaana waawe Abramu na Loti mwana wa mûtaana waawe Harani, na Sarai mwekûrû wa mûtaana waawe Abramu, barauma ntûûra ya Uru îrîa yaarî nthîgûrûûne ya Ababiloni, beetîte nthîgûrû ya Kanaani. Îndî bagûkinya ntûûra ya Harani, baratûûra ku.

³²Tera aakuîrîîre kûu ntûûra ya Harani arî na ûkûrû bwa mîaka magana jaîrî na îtaano (205).