Read KIMERU BIBLE PROTESTANT EDITION Kîam 12 Bible Online

Kîam 12 - KIMERU BIBLE PROTESTANT EDITION bible

Kîam 12

¹ MWATHANI nî eerîre Abramu atîrî, “Uma nthîgûrûûne yeenu, na ûtige ndûgû cieenu, na uume mûciî jwa abaagu, wîîte nthîgûrû îrîa ngaakwonia.

²Naani ngaakweethia mûgongo jûmûnene na ngaakûtharima na ntûme riîtwa rîaaku rîgîe îgweta, nîkenda ûkaa kîtharimo kîrî antû bangî.

³ Nkaatharimaga barîa bagaakûtharimaga, nawe ûrîa ûgaakûrumaga nkaamûrumaga. Nayo mîgongo yonthe ya nthîgûrû îkaatharimagwa nîûntû bwaaku.”

⁴Tontû bûû, Abramu araambîrîria rûgendo, o ta ûrîa MWATHANI aamwîrîte na Loti areetania nawe. Abramu aarî na ûkûrû bwa mîaka mîrongo mûgwanja na îtaano (75) rîrîa aaumîre Harani.

⁵Abramu arajûkia mwekûrû waawe Sarai, na Loti mwana wa mûtaana wa ng'ina, na into bionthe birîa baarî bakûgîa nabio. Ningî arajûkia kinya nthûûmba irîa baarî bakûgîa nacio kûu Harani. Nabo baraambîrîîria rûgendo rwa gwîta nthîgûrû ya Kanaani. Nabo baakinya nthîgûrû ya Kanaani,

⁶Abramu arakûrûka nthîgûrû îîu mwanka ntûûra ya Shekemu, antû arîa kwaarî na muuru jwa More. Îgiita rîu Akanaani nî baatwîre nthîgûrûûne îîu.

⁷ MWATHANI nî aaumîrîîre Abramu, aramwîra atîrî, “Nthîgûrû îîjî nkamîeejana kîrî nchiarwa ciaaku.” Tontû bûû, Abramu araakîra MWATHANI ûu wamuumîrîre kîritîro kîa igongwana antû au.

⁸Kuuma au Abramu areeta mwanka irîmeene birîa birî rûteere rwa bwa gaiti ga ntûûra ya Betheli na araamba îema rîaawe ku. Betheli îrî bwa rûgûrû rwa îema, na ntûûra ya Ai îrî bwa gaiti. Araakîra MWATHANI kîritîro kîa igongwana antû au na aramûthaathayia.

⁹Abramu areeta na mbere na rûgendo rwaawe eerekerete bwa rwanda rûrîa rwaarî bwa ûmotho bwa Kanaani.

¹⁰Naku nî kwagîîre mpara nthîgûrû îîu ya Kanaani. Tontû bûû, Abramu areeta Misri gûkara ku, nîkwîthîrwa mpara nî yaaneneete mono nthîgûrûûne ya Kanaani.

¹¹Rîrîa baarî akuî gûtonya nthîgûrû ya Misri, Abramu areera mwekûrû waawe Sarai atîrî, “Nî mbijî ûrî mwekûrû ûmûthongi mono.

¹²Amisri baakwona bakauga atîrî, ‘Ûûjû nî mwekûrû waawe,’ nabo bambûrage, îndî gwe bagûtige ûrî mwoyo.

¹³ Ûbeere ûrî mwarî wa chiaa nîkenda baanthithîria mantû jameega, na nîkenda nteetha nîûntû bwaaku.”

¹⁴Rîrîa Abramu atonyere Misri, antû ba Misri baroona mwekûrû ûu wa Abramu arî ûmûthongi mono.

¹⁵Rîrîa atongeeria bamwe boonere Sarai arî ûmûthongi, nî beetîre baramûkaathîria kîrî Farao. Mûka ûu arajûkua na araikua nyomba ya Farao.

¹⁶Farao arathithîria Abramu mantû jameega nîûntû bwa mûka ûu. Abramu araeewa ng'ondu na ng'ombe na ntigiri na nkamîîra na nthûûmba cia arûme na cia aka.

¹⁷Îndî MWATHANI arakanûkia Farao na nja yaawe, arabatûmîra mîrimo îmîthûûku mono nîûntû bwa Sarai mwekûrû wa Abramu.

¹⁸Farao aratûmanîra Abramu aramûûria atîrî, “Nîatîa ûjû ûnthithîrîtie? Nîkî kîragiragia ûmbîîra atî ûûjû nî mwekûrû waaku?

¹⁹Nîkî kîratûmîte uuga ûûjû nî mwarî wa nyakwe? Watûma mûjûkia mweethia mûka waakwa. Nandî tî we ûûjû mwekûrû waaku; mûjûkie, bwîîte.”

²⁰Farao ararita Waatho kîrî antû baawe bwegiî Abramu, nabo baramûgwatithia njîra, areeta amwe na mwekûrû waawe na birîa bionthe aarî nabio.