Read KIMERU BIBLE PROTESTANT EDITION Kîam 14 Bible Online

Kîam 14 - KIMERU BIBLE PROTESTANT EDITION bible

Kîam 14

¹Nî gwaakarîre atîrî, Amurafeli mûnene wa Shinari, na Arioki mûnene wa Elasari, na Kedori-Iaomeri mûnene wa Elamu, na Tidali mûnene wa Goiimu,

²nî beetîre kûrwaa na Bera mûnene wa Sodomu, na Birisha mûnene wa Gomora, na Shinabu mûnene wa Adima, na Shemeberi mûnene wa Zeboiimu, na mûnene wa Bela (tayo Zoari).

³Anene bau nabo baragwatanîra bararinganîra njûûrî ciaao kûu mûgwanthîîne jwa Sidimu kûrîa nandî gwîtagwa îria rîa Chumbî.

⁴Anene bau nî baatumîkîrîte Kedori-Iaomeri mîaka îkûmi na îîrî, îndî mwakeene jwa îkûmi na îthatû bararega kûmwathîkîra.

⁵Mwakeene jwa îkûmi na îna Kedori-Iaomeri na anene barîa baarî amwe nawe nî beetîre baraûûra Arefaimu barîa baatwîre Ashiterothi-karanaimu na Azuzimu barîa baatwîre nthî ya Hamu na Emimu barîa baatwîre Shave-kiriathaimu,

⁶na Ahori barîa baatwîre kuuma kîrîmeene gîa Seiri mwanka Eliparani îrîa yaankanîte na bûûrî.

⁷Baragarûka baracoka bareeta mwanka Enimishipati (tayo Kadeshi), na baraûûra nthîgûrû yonthe ya Amaleki na Aamori barîa baatwîre Hazazoni-tamari.

⁸Îgiita rîu mûnene wa Sodomu, na mûnene wa Gomora, na mûnene wa Adima, na mûnene wa Zeboiimu, na mûnene wa Bela (kana Zoari), nî baumagarîre bareeta mûgwanthîîne jwa Sidimu.

⁹Nabo bararwaa na Kedori-Iaomeri mûnene wa Elamu, na Tidali mûnene wa Goiimu, na Amurafeli mûnene wa Shinari, na Arioki mûnene wa Elasari: anene bana bakîrûjaga na anene bataano.

¹⁰Nakû kûu mûgwanthîîne jwa Sidimu nî kwaarî na marinya joojuri rami. Nabo anene ba Sodomu na Gomora rîrîa baamatûkîte bamwe nî baagwîre marinyeene jau na bangî baramatûka irîmeene.

¹¹Tontû bûû, anthû baao barataa into bionthe bia Sodomu na Gomora, na ningî barajûkia kinya biakûrîa biaao bionthe baraciîtîra.

¹²Ningî barajûkia Loti, mûtaana wa mûtaana wa ng'ina wa Abramu. Nî baamûjûkirîe amwe na into biaawe bareeta nawe. Loti aratua gûtûûraga kûu Sodomu.

¹³Îndî muntû ûmwe wa barîa baamatûkîre, nî eetîre areera Abramu ûrîa waarî Mûhibirania mantû jau. Abramu atûûraga akuî na miuuru ya Mamure ûrîa waarî Mûamori. Mamure na mûtaana wa ng'ina wa Eshikoli na Aneri nî baarî na ngwatanîro na Abramu.

¹⁴Rîrîa Abramu aaigîrue atî muntû wa ndûgû ciaawe nî ûmûtae, nî aaumagarîre atongeeretie antû baawe magana jathatû ja îkûmi na banaana (318), barîa baaciarîri kwaawe na bararitanwa kûrwaa. Bareengana na anthû mwanka ntûûra ya Dani.

¹⁵Abramu aragaania antû baawe baraithûkîra anthû bau kûrî ûtukû. We na nthûûmba ciaawe baroomba antû bau na bareengana nabo mwanka Hoba, bwa ûrîo bwa Damaski.

¹⁶Abramu aratunyûkia Loti na eekûrû baawe na antû bangî barîa baatai na kinya into bionthe birîa biatai.

¹⁷Rîrîa Abramu aacokere kuuma ndweene îrîa aarî akûûmba Kedori-Iaomeri na anene barîa baarî rûteere rwaawe ndweene, mûnene wa Sodomu nî aaumagarîre kûmûthagaana kûu mûgwanthîîne jwa Shave (na nîju jwîtagwa Mûgwanthî jwa Mûnene).

¹⁸ Melikizedeki mûnene wa Salemu arareeta mîgaate na ndibei. Melikizedeki aarî mûthînjîri-Mûrungu Ûrîa Ûrî Îgûrû buru.

¹⁹Aratharima Abramu akiugaga ûjû, “Abramu arotharimwa nî Mûrungu Ûrîa Ûrî Îgûrû buru, mûûmbi wa îgûrû na nthî.

²⁰Mûrungu Ûrîa Ûrî Îgûrû buru arokumua, we ûrîa ûtûmîte woomba anthû baaku ndweene!” Abramu aranenkera Melikizedeki gîchunchî kîmwe kuuma kîrî îkûmi kîa into bionthe birîa aarî nabio.

²¹Mûnene wa Sodomu areera Abramu atîrî, “Nenkera antû îndî wîîte na into.”

²²Îndî Abramu areera mûnene wa Sodomu atîrî, “Ûûni nî nciîtîrîtie MWATHANI Mûrungu Ûrîa Ûrî Îgûrû buru, Mûûmbi wa îgûrû na nthî,

²³atî gûtîkîo nkaajûkia gîa into biaaku, kinya rûrigi rwa nguû kana mûrigi jwa kîraatû, ûtîkeeje kuuga atî, nîgwe ûtûmîte ni ntonga.

²⁴Gûtî gîntû ûûni ngeetîkîîria kûjûkia tiga kîrîa nthaka irîte na into birîa antû barîa ndîreetanîtie nabo bakaajûkia. Nabo nî Aneri, na Eshikoli, na Mamure.”