Read KIMERU BIBLE PROTESTANT EDITION Kîam 15 Bible Online

Kîam 15 - KIMERU BIBLE PROTESTANT EDITION bible

Kîam 15

¹Nyuma ya mantû jau MWATHANI nî aarîîrie Abramu na njîra ya kîoneki aramwîra atîrî, “Ûgaakîra Abramu. Ni nî ni rong'o yaaku, na îtuui rîaaku rîkeethîrwa rîrî rîrînene mono.”

²Îndî Abramu arooria atîrî, “Itû MWATHANI Mûrungu, nîka ûgaampa îtuui rîkari, këethîra ndîgûkûra ntî mwana, na rîu mûrîaûkua wa nja yaakwa nî Eliezeri wa kuuma Damaski?”

³Abramu arauga, “Atîrî, nî wiijî gûtî mbeeû gwe ûmpeete, na nandî nî nkombo îrîa îciarîri nja yaakwa îkaa mûrîaûkua bwaakwa.”

⁴Rîu, MWATHANI aararîria Abramu aramwîra atîrî, “Mûtaana ûûjû tîwe ûgaakûrîaûkua. Ûrîa ûgaakûrîaûkua akeethîrwa arî mûtaana waaku.”

⁵ MWATHANI aracoka araumagaria Abramu oome aramwîra, “Raithîria bwa îgûrû woone këethîra woomba gûtara njota irîa irî ku. Ûu nîu nchiarwa ciaaku ikeethîrwa ing'ana.”

⁶ Abramu nî eetîkîrie ûrîa MWATHANI aamwîrîre. Tontû bûû, MWATHANI aroona wîtîkio bwaawe aramweethia ûmwagîru.

⁷Aracoka aramwîra atîrî, “Nî ni MWATHANI ûrîa waakûritîre ntûûra ya Uru ya Ababiloni, nîkenda nkwaa nthîgûrû îîjî yaa kiigai gîaaku.”

⁸Îndî Abramu aramûûria, “MWATHANI Mûrungu waakwa, nîatîa nkaamenya atî îkaa kiigai gîaakwa?”

⁹MWATHANI aramûcokeria aramwîra, “Ndeetera mwari ya mîaka îthatû, na mparika ya mîaka îthatû, na ntûrûme ya mîaka îthatû na nkûngûthikû na kîana gîa kîjea.”

¹⁰Nawe araretera MWATHANI into biu bionthe. O nyomoo aramîatûrîîra gatîgatî, aracoka arabanga o gîchunchî kîa nyomoo kîerekeene na kîngî. Îndî aratiga nyoni itîatûranîtue.

¹¹Nacio nyoni irîa irîîjaga nyama cienama ikîenda kûrîa nyama cia nyomoo iu Abramu agaciînga.

¹² Riûa rîkîthûa, Abramu aragwatwa nî toro înene, ningî arakunîkwa nî muundu jûmûnene jwa kûmakania.

¹³ Rîu MWATHANI areera Abramu atîrî, “Menya na mma atî nchiarwa ciaaku igeeta gûtûûra nthîgûrû îtî yaao. Ningî bakeethîrwa barî nkombo ku, nabo bakaainyîîrua nî antû ba nthîgûrû îîu mîaka magana jana.

¹⁴ Îndî ni naani ngaakanûkia antû ba nthîgûrû îîu barîa babaeethetie nkombo. Mûthieene, nchiarwa ciaaku ikauma nthîgûrû îîu irî na into bibingî mono.

¹⁵Îndî gwe ûgatûûra na thîîrî mwanka rîrîa ûgaakua. Ûkaathikwa ûrî na ûkûrû bwa mîaka îmiingî mma.

¹⁶Nacio nchiarwa ciaaku igaacoka gûkû nthukîîne ya inya nîkwîthîrwa ntîkanûkia Aamori nîûntû bwa meeyia jaao mwanka îgiita rîu.”

¹⁷Rîrîa riûa rîathwîîre na kwagîa muundu, rûgîo rûrî na mwanki na kînyinga gîgwakana nî biakûrûkîrîîre gatîgatî ka ichunchî biu bia nyomoo iu.

¹⁸ Ntukû îîu MWATHANI areeka kîrîkanîro na Abramu arauga, “Nthîgûrû îîjî nkamîeejana kîrî nchiarwa ciaaku, kuuma rûûjîîne rwa Misri, gwîta mwanka rûûjîîne rûrîa rûnene, rwa Eufurate.

¹⁹Nayo nîyo nthîgûrû yonthe, ya Akeni na Akenizi na Akadimoni,

²⁰na Ahiti na Aperizi na Arefaimu,

²¹na Aamori na Akanaani na Agirigashi na Ajebusi.”