Read KIMERU BIBLE PROTESTANT EDITION Kîam 16 Bible Online

Kîam 16 - KIMERU BIBLE PROTESTANT EDITION bible

Kîam 16

¹Sarai, mwekûrû wa Abramu, aarî nthaata. Îndî Sarai nî aarî na nthûûmba ya mwarî Mûmisri weetagwa Hagari.

²Tontû bûû, Sarai areera Abramu atîrî, “Nandî nîûntû MWATHANI nî ambatîte aana rî; thengeera nthûûmba îîjî yaakwa, kwombîka nkoona aana kuumania nayo.” Abramu nawe arathithia ûrîa Sarai aamwîrîre.

³Sarai, mwekûrû wa Abramu, areetîkîîria nthûûmba îîu yaawe, Hagari Mûmisri, aa mwekûrû wa mûkûrû waawe Abramu. Îgiita rîu Abramu aarî agûtûûra nthîgûrû ya Kanaani mîaka îkûmi.

⁴Abramu nawe aratheengeera Hagari, nawe aragîa îu. Rîrîa Hagari oonere atî aakûgîa îu, araambîrîria kûmena mwathi waawe Sarai.

⁵Sarai nawe areera Abramu atîrî, “Ûthûûku bûbû nthithîrîtue bûrogûcokera gwe! Nî ni ndaakûnenkeere nthûûmba yaakwa ya mwarî ûmîthengeera, îndî rîrîa yoonere atî îkûgîa îu, îraambîrîria kûûmena. Nandî MWATHANI nîwe ûkaagiita îgamba gatîgatî gaakwa naagwe.”

⁶Îndî Abramu areera Sarai atîrî, “Tega nthûûmba îîjî îrî waathoone bwaaku; mîthithîrie ûrîa ûkeenda.” Rîu Sarai araiinyîîria Hagari mono, mwanka aramatûka arauma kîrî we.

⁷Mûraîka wa MWATHANI nî eethîîre Hagari aarî rûteere rwa kîthima kîa rûûjî kîrîa kîaarî rwanda. Ningî nî kîaarî akuî na njîra ya gwîta Shuri.

⁸Mûraîka ûu aramûûria, “Hagari, nthûûmba ya Sarai, nîkû uumîte na nîkû wîîtîte?” Nawe aracokia arauga, “Nîka matûkîte mpuuma kîrî mwathi waakwa, Sarai.”

⁹Mûraîka wa MWATHANI aramwîra, “Coka kîrî mwathi waaku, naagwe winyiie.”

¹⁰Ningî mûraîka ûu wa MWATHANI aramwîra atîrî, “Nkaathegeyia nchiarwa ciaaku mono mwanka ireme gûtarîka nî kwingîa.”

¹¹Mûraîka ûu wa MWATHANI aramwîra ûjû, “Ûrî na îu na nî kaîjî ûgaaciara. Naagwe ûgeete Ishimaeli[5] nîûntû MWATHANI nî arîîkîîtie kwona mîthangîko yaaku.

¹²Agaatûûraga akari ta ntigiri ya kîthaka. Agaatua kûrûjaga na antû bonthe, na o muntû wonthe agaatua kûrûjaga nawe. Ningî we agaatûûraga atî na ngwatanîro na ndûgû ciaao cionthe.”

¹³Hagari araa MWATHANI ûu waarîtie nawe riîtwa aramwîta, “Gwe nîgwe Mûrungu ûrîa wonaga,” nîûntû aaciûragia atîrî, “Nî mma nîka ndoona Mûrungu na nandî noo ndî mwoyo?”

¹⁴Tontû bûû, kîthima kîu kîreetwa “Kîthima kîa ûrîa ûtûûraga mwoyo ûrîa woonaga” nakîo kîrî gatîgatî ga Kadeshi na Beredi.

¹⁵ Hagari araciara kaîjî, nawe Abramu arageeta Ishimaeli.

¹⁶Abramu aarî na ûkûrû bwa mîaka mîrongo înaana na îtantaatû (86) rîrîa Hagari aaciarîre Ishimaeli.