Read KIMERU BIBLE PROTESTANT EDITION Kîam 17 Bible Online

Kîam 17 - KIMERU BIBLE PROTESTANT EDITION bible

Kîam 17

¹Rîrîa Abramu aakinyîrie ûkûrû bwa mîaka mîrongo kenda na kenda, MWATHANI nî aamuumîrîîre aramwîra atîrî, “Ni nî ni Mûrungu Mweneinya. Tûûraga ûkîthithagia wendi bwaakwa na ûkarage ûrî ûmwagîru.

²Naani ngeeka kîrîkanîro gîaakwa naagwe, na nthegeyie nchiarwa ciaaku mono.”

³Rîu Abramu areenamîîria mwanka nthî. Mûrungu aramwîra,

⁴“Atîrî, ngwîka kîrîkanîro naagwe. Gwe ûkaa îthe wa mîgongo îmiingî.

⁵ Naagwe ûtîtua gwîtagwa Abramu kaîrî. Kuuma nandî ûgeetagwa Abrahamu, nîkwîthîrwa nî nkweethetie îthe wa mîgongo îmiingî.

⁶Naani ngatûma ûgîe na nchiarwa inyiingî na ntûme mîgongo îmiingî yume kîrî gwe, na anene bakaumania naagwe.

⁷ Nkaarikithia kîrîkanîro gîaakwa naagwe na nkîrikithie na nchiarwa ciaaku nthukîîne ciaao cionthe, kîee kîrîkanîro gîa kenya na kenya. Nkaa Mûrungu waaku na wa nchiarwa ciaaku.

⁸ Ngakwaa nthîgûrû ya Kanaani yonthe, îrîa ûtwîre ûrî mûgeni, yee yaaku na mpe nchiarwa ciaaku yo îrî kiigai gîa kenya na kenya, naani nkaa Mûrungu waao.”

⁹Ningî Mûrungu areera Abrahamu atîrî, “Gwe na nchiarwa ciaaku bûgaatûûra bwîkîte kîrîkanîro gîaakwa nthukîîne cionthe.

¹⁰ Gîkî nîkîo kîrîkanîro gîaakwa kîrîa ûgeeka gatîgatî gaakwa naagwe na nchiarwa ciaaku: atî aana beenu ba tûîjî bonthe bataanagwe.

¹¹Bûrîtua gûtaanagwa, naru rûtaano rûu rûkaa rwano rwa kîrîkanîro gîaakwa naabuî.

¹²O kaîjî no mwanka gataanagwe gaakinyia ntukû inyaanya kuuma gaaciarwa. Thithagieni ûu nthukîîne cieenu cionthe. Kinya nkombo irîa iciarîri mûciî jwaaku, kana irîa îgûri na mbeecha kuuma kîrî muntû ûtî wa rûrîîjo rwaaku,

¹³no mwanka itaanagwe kinya ciëethîrwa irî cia gûciarîrwa mûciî jwaaku kana cia kûgûra na mbeecha. Tontû bûû, rwano rûu rûgaakaraga mîîrîîne yeenu rûrî rwa kwonanagia atî kîrîkanîro gîaakwa naabuî nî gîa kenya na kenya.

¹⁴O ntomûrûme wonthe ûrîa ûtîtaani, no mwanka eengwe atige gûtûûra amwe na antû baao nîûntû atîîkîte kîrîkanîro gîaakwa.”

¹⁵Ningî Mûrungu nî eerîre Abrahamu atîrî, “Mwekûrû waaku Sarai, ûtîcoka kûmwîtaga Sarai kaîrî. Kuuma nandî riîtwa rîaawe nî Sara.

¹⁶Nkaamûtharima na ngakwaa kaîjî kuumania nawe. Nkaamûtharima aee ng'ina wa mîgongo, nabo anene ba mîgongo bakaumania nawe.”

¹⁷Rîu Abrahamu areenamîîria mwanka nthî akîthekaga, agîciûragia na nkoro atîrî, “Mûkûrû wa mîaka îgana rî, oomba kûgîa na kaana? A-Sara we rî, ntindiri ya mîaka mîrongo kenda, kwombîka îkagîa na mwana?”

¹⁸Abrahamu areera Mûrungu atîrî, “Itû îtîkîîria Ishimaeli aee mûrîaûkua waakwa!”

¹⁹Îndî Mûrungu aramwîra atîrî, “Gûtî nkaanja, mwekûrû waaku Sara agaaciara kaîjî, naagwe ûgaageeta Isaaka. Naani nkaarikithia kîrîkanîro gîaakwa nawe kîee kîrîkanîro gîa nchiarwa ciaawe kenya na kenya.

²⁰Ningî mantûûne jegiî Ishimaeli, ndîkwigua ûrîa wauga. Nkaamûtharima, aciarane na athegee mono. Akaa îthe wa anene îkûmi na baîrî, na nkaamwethia mûgongo jûmûnene.

²¹Îndî ûrîa nkaarikithia kîrîkanîro gîaakwa nawe nî Isaaka, ûrîa Sara agaaciara mwaka jûu jûngî îgiita o ta rîrî.”

²²Mûrungu arîîkia kwaria na Abrahamu araciîtîra.

²³Ntukû o îîu, Abrahamu arajûkia mwana waawe Ishimaeli na arûme bonthe barîa baarî nkombo irîa ciaaciarîrîîtwe mûciî jwaawe na irîa aagûrîte na mbeecha ciaawe. Arabataana bonthe o ta ûrîa Mûrungu aamwîrîte.

²⁴Abrahamu aarî na ûkûrû bwa mîaka mîrongo kenda na kenda rîrîa aataanîrwe.

²⁵Mûtaana waawe Ishimaeli aataanîrwe arî na ûkûrû bwa mîaka îkûmi na îthatû.

²⁶Abrahamu na mûtaana waawe Ishimaeli baataanîrwe ntukû îmwe.

²⁷Antûarûme bonthe barîa baarî nkombo irîa ciaaciarîrîîtwe mûciî jwaawe na irîa aagûrîte na mbeecha kuuma kîrî antû ba mîgongo îngî baataananîîrue nawe.