Read KIMERU BIBLE PROTESTANT EDITION Kîam 18 Bible Online

Kîam 18 - KIMERU BIBLE PROTESTANT EDITION bible

Kîam 18

¹MWATHANI nî aaumîrîîre Abrahamu aarî akuî na miuuru ya Mamure. Abrahamu aakari nthî mwariine jwa îema rîaawe narîo riûa nî rîaarîte mono.

² Araciûkia meetho aroona antû bathatû barûngi mbere yaawe. Rîrîa aaboonere aroogîanga kuuma mwariine jwa îema areeta kûbathagaana. Nî eenamîîrîrie mwanka ûthiû bûratonga nthî,

³arauga atîrî, “Mwathi waakwa, ûkëethîrwa ûkwona mbagîrîte rî, menya ûnkûrûka o ûu itû ni nthûûmba yaaku.

⁴Rekeeni itû bwambe bûreeterwe tûûjî bûthambe magûrû, bûnogoke aja gîtina kîa mûtî.

⁵Naani nkaabûreetera twirio, bûrûme îkai, bûgwate kainya, rîu bûkûrûke bwîte na mbere na rûgendo rweenu, nîûntû nî bwîjîrîîre aja kîrî nthûûmba yeenu.” Nabo baramwîra, “Nîu, thithia ûu wauga.”

⁶Abrahamu nawe arakûrûka îemeene na mpwîî areera Sara atîrî, “Thuranîra mûtu mîkebe îthatû na mpwîî, ûkande mîgaate!”

⁷Ningî Abrahamu aroogîanga ndîîthieene aragwata njaû îrî na nyama imboro inthongi, areeja nayo aranenkera nthûûmba yaawe, îramîthînja na mpwîî.

⁸Rîu Abrahamu arajûkia kîrimo na îria, na nyama cia njaû îîu aathînjîte arabanenkeeria, bararîa Abrahamu arûngami akuî nabo au gîtineene kîa mûtî.

⁹Nabo baramûûria, “Arîkû Sara mwekûrû waaku?” Abrahamu nawe arabacokeria atîrî, “Arî îemeene.”

¹⁰ Ûmwe waao arauga atîrî, “Gûtî nkaanja nkeeja kîrî gwe kaîrî îgiita rîa mûnyaaro jûu jûngî, nawe mwekûrû waaku Sara agaaciara kaîjî.” Sara nawe nî aathikîîrîte arî mwariine jwa îema jûrîa jwaarî nyuma ya Abrahamu.

¹¹Îgiita rîu, Abrahamu na Sara baarî babakûrû bwega. Sara nî aarî agûkinyia rîrîa mûka atîûmba kûgîa na mwana.

¹² Tontû bûû, Sara aratheka agîciûragia wengwa atîrî, “Ni ndî ntindiri na mûkûrû waakwa nî ntindiri kinya we. Kûrî mûrîo nkaigua nkîthengeerwa?”

¹³Îndî MWATHANI arooria Abrahamu, “Nîmbi îtûmîre Sara atheka akîûragia, ‘Nîatîa gûkoombîka ngîa na mwana na ndî ntindiri?’

¹⁴ Ga kûrî ûntû bûûmba kûrema MWATHANI? Rîrîa rîtuui rîakinya tarîo îgiita rîa mûnyaaro jûu jûngî; nkeeja kîrî gwe nawe Sara akaagîa na kaîjî.”

¹⁵Sara arakaana nîûntû bwa ûguaa arauga, “Ntîratheka ni.” Îndî MWATHANI aramwîra, “Arî, gwe nî ûthekere.”

¹⁶Antû bau nabo nî bookîrîîre bareeta antû arîa barîngîona ntûûra ya Sodomu. Abrahamu nawe areetania nabo abaringîîrîîtie.

¹⁷MWATHANI araciûria atîrî, “Nkaitha Abrahamu ûntû bûrîa mpengeerie kûthithia?

¹⁸Anga Abrahamu tîwe ûkaa mûgongo jûmûnene na jûrî na inya na mîgongo yonthe ya nthîgûrû îkathaarîmwa nîûntû bwaawe?

¹⁹Arî ntîmwitha, nîûntû nîwe nthuurîte nîkenda aritana aana baawe na antû ba mûciî jwaawe nîkenda baathîkagîra MWATHANI, na bathithagia mantû jarîa ja waagîru na ja îota. Baathithia ûu MWATHANI akoojûrîria Abrahamu mantû jarîa aamwîrîte.”

²⁰Rîu MWATHANI arauga ûjû, “Kîrîro kîegiî maatia ja Sodomu na Gomora nî gîkînene, na meeyia jaao nî jamathûûku mono.

²¹Nkeenama nkoone këethîra nî mma nî bathithîtie ûu ungwa mbigîîtue; na këethîra tî u, nkaamenya ûrîa nkaathithia.”

²²Tontû bûû, antû bau barauma au, bareeta beerekerete Sodomu. Îndî Abrahamu aratigwa arûngi mbere ya MWATHANI.

²³Abrahamu arakuîrîîria MWATHANI, aramûûria atîrî, “Nî mma atî ûkaathiranîria antû barîa baagîrîte amwe na barîa baaî?

²⁴A-gûkëeja kwîthîrwa kûrî na antû mîrongo îtaano babaagîru ntûûreene; nîka ûkaamîthiria buru na ûrege kûmîcaîîra nîûntû bwa antû bau mîrongo îtaano babaagîru barîa barî ku?

²⁵Nî mma wenda kûûraganîria barîa baagîru amwe na barîa baaî? Ai, ûtîenda kûthithia ûntû ta bûu nîûntû gwe ûgiitaga magamba ja antû bonthe ba nthîgûrû na îota.”

²⁶MWATHANI aramûcokeria atîrî, “Nkëeja kwîthîra antû mîrongo îtaano babaagîru ntûûreene ya Sodomu, nkaarekana nayo nîûntû bwaao.”

²⁷Abrahamu aramûcokeria kaîrî arauga atîrî, “Itû mbîtîkîîria mbîte na mbere gûkwarîria MWATHANI, kinya këethîra ni ndî mûthetu na mûju.

²⁸A-gûkëeja kwîthîrwa kûrî na antû mîrongo îna na bataano babaagîru ntûûreene îîu nîka ûkaathiria ntûûra yonthe nîûntû bwa kwaga bau bataano?” MWATHANI aramwîra, “Nkëeja kwîthîra antû mîrongo îna na bataano ku babaagîru, ntîmîthiria.”

²⁹O kaîrî Abrahamu araarîrîa MWATHANI arauga, “A-gûköoneka antû mîrongo îna babaagîru ku?” MWATHANI aramwîra atîrî, “Ntîthithia ûntû bûu kwëethîrwa kûrî na antû mîrongo îna.”

³⁰Abrahamu arauga atîrî, “Itû MWATHANI menya ûthûûra, ka mbarie kaîrî. A-gûköoneka antû mîrongo îthatû ku.” MWATHANI arauga, “Ntîthiria ntûûra îîu yethîrwa îrî na antû mîrongo îthatû babaagîru.”

³¹Abrahamu arauga, “Itû mbîtîkîîria mbîte na mbere na gûkwarîria MWATHANI. A-gûköoneka antû mîrongo îîrî babaagîru?” MWATHANI nawe aramwîra, “Kwëethîrwa kûrî na antû mîrongo îîrî babaagîru, ntîthiria ntûûra.”

³²Abrahamu arauga kaîrî ûjû, “Itû MWATHANI menya ûthûûra, ka mbarie nandî rîa mûthia. A-gûköoneka antû îkûmi babaagîru?” MWATHANI nawe arauga, “Gûkëeja kwonora antû îkûmi babaagîru, ntîthiria ntûûra îîu.”

³³MWATHANI aarîîkia kwaria na Abrahamu, araciîtîra, nawe Abrahamu aracoka kwaawe.