Read KIMERU BIBLE PROTESTANT EDITION Kîam 19 Bible Online

Kîam 19 - KIMERU BIBLE PROTESTANT EDITION bible

Kîam 19

¹Araîka bau bobaîrî baakinyîre Sodomu kûrî ûgoro, nawe Loti aakari nthî mpingîroone ya ntûûra. Rîrîa aaboonere, arookîîra areeta kûbathagaana na aakinya akuî nabo areenamîîria mwanka nthî.

²Rîu arabeera atîrî, “Itû aathi baakwa, aûkîreeni aja nja ya nthûûmba yeenu bûthambe magûrû na bûraare ku; na rûkîîrî bwokîîra, bûciîtîre.” Îndî araîka bau baramwîra, “Arî, tûrîraara kîaragoone.”

³Îndî Loti areeta na mbere kûbakinyîîria mwanka bareetîkîîria gwaûkîra kwaawe, baratonya nyomba. Loti arabamaathîra mono, bararugîrwa mîgaate îtîkiîri mûtheega jwa kwimbithia, nabo bararîa mwanka baranyira.

⁴Îndî mbere ya araîka bau bamama, arûme bonthe, babeethî na babakûrû, ba ntûûra ya Sodomu nî baaumîre nteere cionthe cia ntûûra îîu, baracîgîîria nyomba ya Loti.

⁵ Bareeta Loti baramûûria atîrî, “Barîkû arûme barîa beejîre gwaaku ûgoro? Tuumagarîrie bo tûbatheengere.”

⁶Loti araumagara kîrî bo, na aratiga ainga mûrango.

⁷Arabeera atîrî, “Itû antû beetû ndabwerenca menyeni bûthithia mantû jamaaî.

⁸Buî nî bwijî atî ndî na aarî baakwa baîrî aja barî tûraitî. Itû rekeeni mbuumagarîrie bo bûbathithîrie o ûrîa bûkeenda. Îndî menyeni bwîja kûthengeera arûme baba nîûntû nandî barî nyomba yaakwa na barî njareene ciaakwa.”

⁹Îndî antû bau ba Sodomu bareera Loti atîrî, “Ebaebera o! Gwe ûrî muntû mûgeni gûkû, ka ûbuîri gûtwîra ûrîa tûkaathithia? Nandî nîgwe tûkaathithîria mantû jamaaî kinya nkûrûki yaao.” Baraatîka Loti nîkenda bamweberia o bauna mûrango.

¹⁰Îndî arûme barîa baîrî baarî nyomba baraikia njara baragwata Loti, baramûkuucia bwa ndeene na barainga mûrango.

¹¹ Baracoka baraeethia arûme barîa boome bonthe ntumuumu, kuuma ûrîa mûkûrû mwanka ûrîa mwanake. Tontû bûû, barageria gûcwaa arîa mûrango jwaarî mwanka baranoga.

¹²Rîu antû bau baîrî barooria Loti atîrî, “Kûrî antû bangî baaku barî ntûûreene îîjî? Kûrî na ataana kana aarî baaku kana athoni baaku kana antû ba ndûgû ciaaku barî ntûûreene îîjî! Këethîra kûrî bo barite ku.

¹³Tontû tûrî akuî kûthiria gûntû gûkû. Nîkwîthîrwa kîrîro kîegiî maatia ja antû ba Sodomu nî gîkinyîrîte MWATHANI, nawe nîwe ûtûtûmîte twîja kûthiria gûntû gûkû.”

¹⁴Tontû bûû, Loti araumagara, areeta araarîria nthaka irîa ciagambagia aarî baawe, araciîra atîrî, “Ithuranîreni buume gûntû gûkû, nîûntû MWATHANI arî akuî kûthiria ntûûra îîjî.” Îndî nthaka iu iroona ta rûûo aarî naru.

¹⁵Gwakea rûkîîrî, araîka bau bareera Loti ûjû, “Ithuranîre ûjûkie mwekûrû waaku na aarî baaku bobaîrî barîa barî aja kana bûthirue ntûûra îgîkanûkua.”

¹⁶ Îndî Loti araamba kûthaa. Nabo araîka bau baramûgwata njara na baragwata mwekûrû waawe njara, na baragwata aarî baawe bobaîrî njara, barabaumagaria barabakinyia oome ya ntûûra nîûntû MWATHANI nî aaigîîrîîtue Loti kîaao.

¹⁷Baathiria kûbaumagaria, ûmwe areera Loti ûjû, “Matûka ûcionokie! Menya ûciûgûra kana ûrûngama noo kû mûgwanthîîne. Matûka mwanka irîmeene ûtîkeeje kûthirua.”

¹⁸Îndî Loti arauga atîrî, “Arî itû mwathi waakwa!

¹⁹Gûtî nkaanja nî wooneete nthûûmba yaaku yaagîrîte, na ningî nî ûûmbonetie kîaao gîkînene wambonokia; îndî ntîûmba gûkinya irîmeene îkanûkia rîu rîa Sodomu rîtîrankinyîra rîmbûraga.

²⁰Atîrî, tî-kaarîa gatûûra karî akuî antû arîa mpûûmba kûmatûka. Rekeeni matûke ku, nîûntû nî kaniini mbonokie mwoyo jwaakwa!”

²¹Aramûcokeria aramwîra atîrî, “Nîu ni; ndîgwîtîkîîria îromba rîu, na ntîthiria gatûûra kau waugîra.

²²Nandî matûkanga nao, nîûntû ntîthithia noo atîa ûtîkinyîte ku.” Kîu nîkîo gîatûmîre ntûûra îîu îîtwa Zoari.[6]

²³Loti aakinyîre Zoari riûa rîkuuma.

²⁴ Nîrîo MWATHANI aaurithîîrie Sodomu na Gomora ngai ya mwanki jwa ûbiriti kuuma îgûrû.

²⁵Arathiria ntûûra iu na mûgwanthî junthe amwe na antû bonthe barîa baatûûraga ku na kinya imera bionthe.

²⁶ Îndî mwekûrû wa Loti ûrîa waarî nyuma yaawe nî aaciûgûrîre nawe araa iiga rîa chumbî.

²⁷Rûkîîrî rûu Abrahamu ararooka gûûkîîra areeta antû arîa aarûngi mbere ya MWATHANI.

²⁸Nawe atega bwa Sodomu na Gomora na bwa mûgwanthî junthe aroona toogi înyingî îkiumaga gûntû kûu îgaitia bwa îgûrû ja toogi ya mwanki jûmûnene.

²⁹Naku kûrakara atîrî, rîrîa Mûrungu aathiragia ntûûra irîa ciaarî mûgwanthîîne, kûrîa Loti aatûûraga, nî aaririkanîre Abrahamu nawe aroonokia Loti atîkathirîrue ku.

³⁰Loti nî aumîre Zoari areeta na aarî baawe bobaîrî gûtûûra irîmeene nîûntû nî aakîrîre gûtûûra Zoari. Aatûûraga gîkurunguune amwe na aarî baawe bobaîrî.

³¹Mwarî ûrîa mûkûrû areera ûrîa mwanake atîrî, “Baaba agûkûra, na gûtî ntomûrûme ûrî o wa gûtûgûra ta ûrîa antû bathithagia nthîgûrûûne kunthe.

³²Tûthithie ûjû, tûtûme baaba anyue ndibei oogite naatuî tûmûthengeere nîkenda tûtûûria rûrîîjo rwa baaba.”

³³Tontû bûû, baratûma îthe anyua ndibei ûtukû bûu; nawe mwarî ûrîa mûkûrû areeta arathengeera îthe. Îndî nîûntû bwa mbogita Loti ataamenya mwarî akîmûthengeera.

³⁴Rûûneene rwa ntukû îîu mwarî ûu mûkûrû areera ûrîa mwanake atîrî, “Ûtukû nî ndîrathengereere baaba. Gatûtûme anyue ndibei kinya ûtukû bwa naarua naagwe wîte ûmûthengeere nîkenda tûtûûria rûrîîjo rwa baaba.”

³⁵Ûtukû bûu kinya bu baratûma îthe anyua ndibei, nawe mwarî ûrîa mwanake areeta aramûthengeera. Îndî nîûntû bwa mbogita Loti ataamenya mwarî akîmûthengeera.

³⁶Tontû bûû, aarî ba Loti bobaîrî baragîa aana kuumania na îthe.

³⁷Mwarî ûrîa mûkûrû araciara kaîjî arageeta Moabu.[7] Antû ba Moabu bonthe baumanîrie na kaîjî kau.

³⁸Mwarî ûrîa mwanake kinya we araciara kaîjî, nawe arageeta Beni-ami.[8] Antû ba Amoni bonthe baumanîrie na kaîjî kau.