Read KIMERU BIBLE PROTESTANT EDITION Kîam 2 Bible Online

Kîam 2 - KIMERU BIBLE PROTESTANT EDITION bible

Kîam 2

¹Nakû kûûmbwa kwa îgûrû na nthî na birîa bionthe birî ku nî kwaathirîre.

² Ntukû ya mûgwanja Mûrungu nî aarî akûthiria ngûgî yaawe îrîa aaritaga. Ntukû îîu ya mûgwanja aranogoka kuuma kîrî ngûgî îrîa aaritaga.

³Tontû bûû, Mûrungu aratharima ntukû îîu ya mûgwanja na aramîathûra, nîkwîthîrwa nîyo aanogokere kuuma kîrî ngûgî îrîa aaritaga.

⁴Ûjû nîu mantû jaathingatanîre rîrîa îgûrû na nthî bioombagwa. Rîrîa MWATHANI Mûrungu oombîre nthî na îgûrû,

⁵gûtî mûtî jwaarî nthîgûrûûne, ningî gûtî nyaki yaarî îkuuma, tontû MWATHANI Mûrungu ataarî akuurithia ngai nthîgûrûûne, na gûtaarî na muntû wa kûrîma nthîgûrû.

⁶Îndî îme nîrîo rîaumaga nthî narîo rîkooroyia mûthetu.

⁷ Rîu MWATHANI Mûrungu nî oombîre muntû na mûthetu na aramuuîîra mîrukî ya mwoyo nyiûrûûne ndeene, nawe muntû araambîrîîria gûtûûra mwoyo.

⁸MWATHANI Mûrungu nî aandîre muunda jweetagwa Edeni, rûteere rwa bwa gaiti, areeka muntû ûrîa aarî akûûmba ku.

⁹ MWATHANI Mûrungu nî aatûmîre mîtî îrîa mîthongi îkîonwa, na îmîega ya biakûrîa îkûra kuuma mûthetuune. Mûtî jwa mwoyo nî jwaarî gatîgatî ka muunda jûu, na kinya mûtî jwa kûmenya wega na ûûî nî jwaarî ku.

¹⁰Kûrî mûuro jwaarî Edeni nîûntû bwa kworoagia muunda jûu. Mûuro jûu jwauma Edeni nî jwagaûkanaga jûkaa mîuro îna.

¹¹Riîtwa rîa mûuro jwa mbere nî Pishoni, naju nîju jwathiûrûkanîtie na nthîgûrû yonthe ya Havila, kûrîa kûrî thaabu,

¹²nayo thaabu ya nthîgûrû îîu nî înjega. Kûu nîku kwonekaga maguta jakweera bwega jeetagwa bideliumu na twiga twa goro twîtagwa onekisi.

¹³Riîtwa rîa mûuro jwa îîrî nî Gihoni. Naju nîju rûûjî rûrîa rûthiûrûkanîtie na nthî yonthe ya Ethiopia.

¹⁴Riîtwa rîa mûuro jwa îthatû nî Tigirisi, naru nîru rwînamagîîra nthîgûrû ya Asîria bwa gaiti. Naru Rûûjî rwa inya nî Eufurate.

¹⁵MWATHANI Mûrungu nî aajûkîrie muntû ûrîa oombîte aramwîka muundeene jwa Edeni nîkenda ajûrîmaga na ajûmenyagîîra.

¹⁶MWATHANI Mûrungu nî eerîre muntû ûjû, “Nî wîtîkîrîtue kûrîîjaga matuunda ja mîtî yonthe îrîa îrî muundeene jûjû.

¹⁷Îndî matuunda ja mûtî jwa kûmenyithania wega na ûûî, menya ûjarîa, nîûntû ntukû îrîa ûkaajarîa nî mma ûgaakua.”

¹⁸MWATHANI Mûrungu arauga, “Tî bûbwega muntû kwîthîrwa arî wenka; nkaamûthithîria mûteethia ûrîa ûkaaganîra nawe.”

¹⁹Tontû bûû, MWATHANI Mûrungu aroomba nyamû cionthe na nyoni cionthe kuuma mûthetuune. Rîu araireeta kîrî muntû nîkenda aigua ûrîa agaaciîta. O riîtwa rîrîa eetaga kîûmbe kinya kîrîkû kîrîa kîrî mwoyo, noo rîo gîtagwa kinya naarua tûrî.

²⁰Muntû araa nyomoo cionthe mariîtwa na nyoni cionthe, na kinya nyamû cionthe cia kîthaka mariîtwa. Îndî we atoona mûteethia ûng'uaneene nawe.

²¹MWATHANI Mûrungu aratûma muntû agwatwa nî toro înene. Muntû ûu aramama. MWATHANI Mûrungu aramûrita rûbaru rûmwe na aratumania nyama au aarûritîte.

²²Naru rûbaru rûu MWATHANI Mûrungu aaritîte kuuma kîrî muntû, ararûthithia rûraa mûka, aramûreeta kîrî muntû ûu.

²³Rîu muntû arauga, “Nandî ûûjû nî kîrûitû kîa marûitû jaakwa, na nyama ya nyama ciaakwa. Agaatua gwîtagwa mûka, nîûntû aritîtwe kuuma kîrî ntomûrûme.”

²⁴ Tontû bûû, ntomûrûme agaatiganaga na îthe na ng'ina akagwatana na mûka waawe, nabo bakaa mwîrî jûmwe.

²⁵Nabo bobaîrî baarî kîthûnû, na bataigagua nthoni.