Read KIMERU BIBLE PROTESTANT EDITION Kîam 20 Bible Online

Kîam 20 - KIMERU BIBLE PROTESTANT EDITION bible

Kîam 20

¹Abrahamu nî aaumîre kûu aarî areeta rwanda rwa Negebu, aratûûra gatîgatî ga Kadeshi na Shuri. Abrahamu rîrîa aakaraga Gerari ta mûgeni,

² nî aaragia bwa Sara mwekûrû waawe akiugaga atîrî, “Sara nî mwarî wa chiaa.” Tontû bûû, Abimeleki mûnene wa Gerari nî aatûmanîre na Sara araikua kîrî we.

³Îndî Mûrungu araumîîra Abimeleki kîrootoone kûrî ûtukû aramwîra atîrî, “Nandî gwe ûgûkua nîkwîthîrwa mûka ûûjû ûjûkîîtie nî mwekûrû wa muntû ûngî.”

⁴Îndî Abimeleki ataarî akûmûthengeera. Tontû bûû, arooria atîrî, “Itû MWATHANI, ka ûkooraga muntû ûtî na maatia?

⁵Uga tî Abrahamu wengwa ûrambîîrîre ûûjû nî mwarî wa ng'ina, na kinya mûka ûûjû wengwa aambîîra, Abrahamu nî mûtaana wa ng'ina? Ntîkwona ndî na maatia nîûntû ndîrathithîrie ûntû bûbû ndî na mma atî nî ûntû bûbwega nkûthithia.”

⁶Ningî MWATHANI areera Abimeleki o arî kîrootoone atîrî, “Îî, nî mbijî ûthithîtie ûntû bûbû ûkîthûgaanagia nkoroone yaaku atî nî ûntû bûbwega ûkûthithia. Menya nî ni nkûgirîîtie ûtîkeeyie meethoone jaakwa. Nîkîo gîtûmi ndîrakûrigîrîîrie ûtîkamûthengeere.

⁷Nandî rî, cokia mwekûrû wa mwene. Mûkûrû waawe nî kîroria, nawe agaakûrombera nîkenda ûtîgaakue. Îndî waarega kûmûcokia, ûmenye naagwe no gûkua ûgaakua amwe na antû baaku bonthe.”

⁸Tontû bûû, Abimeleki ararooka gûûkîîra rûkîîrî, areeta nthûûmba ciaawe cionthe, araciîra mantû jau jonthe. Nabo antû bau baraigua ûguaa bûbwingî mono.

⁹Rîu Abimeleki areeta Abrahamu aramûûria, “Nîatîa ûjû watûthithîria? Nî ûthûûku bûrîkû nkûthithîrîtie bûgûtûma ûndeteera meeyia jamanene ûjû amwe na nthîgûrû yaakwa? Mantû jarîa ûnthithîrîtie jatîbuîrîte kûthithua.”

¹⁰Ningî aramûûria atîrî, “Nîatîa ûrathûgaanîtie ûkîthithia ûntû ta bûbû?”

¹¹Abrahamu aramûcokeria atîrî, “Ndîrathithîrie u nîûntû ndîrathûgaanagia antû batîkîraga Mûrungu gûntû gûkû, na boomba kûmbûraga nîkenda bajûkia mwekûrû waakwa.

¹²Tî ûrongo, we nî mwarî wa baaba. Tûtî ba ng'ina ûmwe, îndî tûrî ba îthe ûmwe, nawe nî aaere mwekûrû waakwa.

¹³Rîrîa Mûrungu aatûmîre mpuuma nja ya baaba ndiûngania na nthî nîrîo ndeerîre mwekûrû waakwa atîrî: Weega bûrîa nkwenda ûtua kûnthithagîria nî bûbû; o kûrîa kunthe tûgeetaga gwe uugage, ‘Ûûjû nî mûtaana wa chiaa.’”

¹⁴Rîu Abimeleki arajûkia ng'ondu na ng'ombe na nkombo cia arûme na cia aka, aranenkera Abrahamu na aramûcokeria mwekûrû waawe Sara.

¹⁵Ningî Abimeleki areera Abrahamu atîrî, “Nthîgûrû yaakwa nîyo îîjî mbere yaaku; tûûra arîa ûkeenda.”

¹⁶Ningî areera Sara atîrî, “Tega, nkûnenkera mûtaana wa nyakwe ichunchî ngiri îmwe bia fetha bia gûkûrita îgi meethoone ja barîa bonthe bûrî nabo. Nandî îgi rîkûthira.”

¹⁷Abrahamu nî aarombere Mûrungu, nawe Mûrungu arooria Abimeleki amwe na mwekûrû waawe, na nkombo ciaawe cia aka, nabo baragîa na twaana,

¹⁸nîkwîthîrwa MWATHANI nî aaethetie aka bonthe ba nja ya Abimeleki nthaata nîûntû bwa Sara, mwekûrû wa Abrahamu.