Read KIMERU BIBLE PROTESTANT EDITION Kîam 21 Bible Online

Kîam 21 - KIMERU BIBLE PROTESTANT EDITION bible

Kîam 21

¹MWATHANI nî aaririkanîre Sara aramûthithîria o ûrîa augîîte.

² Tontû bûû, Sara, ûkûrûûne bwaawe aragîa îu na araciara kaîjî, o rîrîa rîongwa Mûrungu eerîîrîte Abrahamu.

³Abrahamu areeta mwana ûu Isaaka.

⁴ Abrahamu nî aataanîre Isaaka aakinyia ûkûrû bwa ntukû inyaanya, o ta ûrîa Mûrungu aamwîrîte.

⁵Abrahamu aarî na ûkûrû bwa mîaka îgana rîmwe (100) rîrîa mûtaana waawe Isaaka aaciarîrwe.

⁶Sara arauga, “Mûrungu agûmpa gîtûmi gîa kûtheka. Barîa bakaigua mantû jaja kinya bo bakaatheka amwe naani.”

⁷Ningî arauga atîrî, “Nûû ûrîngîkwîra Abrahamu atî Sara agoonkia twaana? Îndî ndîkûmûciarîra kaîjî ûkûrûûne bwaawe.”

⁸Mwana ûu areeta na mbere gûkûra mwanka aratiga gwonka. Abrahamu arathithia kîatho gîkînene mono ntukû îrîa Isaaka aatigîre gwonka.

⁹Ntukû îmwe Sara nî oonere mwana wa Hagari Mûmisri agîtindania na mûtaana waawe Isaaka.

¹⁰ Tontû bûû, areera Abrahamu ûjû, “Înga mûka ûûjû nkombo amwe na mûtaana waawe, nîûntû mûtaana wa mûka ûûjû nkombo atîaa mûrîaûkua amwe na mûtaana waakwa Isaaka.”

¹¹Ûntû bûu bûratûma Abrahamu aigua bûbûûî mono nîûntû Ishimaeli kinya we aarî mûtaana waawe.

¹² Îndî Mûrungu areera Abrahamu atîrî, “Tiga kwigua bûbûûî nîûntû bwa kaîjî kau gaaku kana wigua bûbûûî nîûntû bwa mûka nkombo ûu waaku. O bûrîa bunthe Sara agaakwîra, thithia bu, nîûntû nchiarwa cia Isaaka nîcio igatûûria riîtwa rîaaku.

¹³Mûtaana ûu wa mûka nkombo kinya we ngatûma aee mûgongo jûmûnene nîûntû kinya we nî mbeeû yaaku.”

¹⁴Tontû bûû, Abrahamu arookîîra rûkîîrî kainda, arajûkia biakûrîa na kiujo kîa rûûjî kîaathithîtue na mûgûûta aranenkera Hagari. Ararîkîîra into biu amwe ituroone bia Hagari na aramûnenkeeria mwana na aramwîra aciîtîre. Hagari araciîtîra, areeta rwanda rwa Beerisheba.

¹⁵Rîrîa rûûjî rwathirîre kiujoone, Hagari areeka mwana antû amwe rungu rwa gîkamba,

¹⁶Nawe areeta arakara nthî gataaria ka mita mîrongo îthatû, kuuma arîa mwana aarî araambîrîria kûrîra akiuga atîrî, “Ntîûmîîria kwona mwana waakwa agîkua.”

¹⁷Mûrungu nî aaigîrue kîrîro kîa mwana ûu. Mûraîka wa Mûrungu areeta Hagari kûûma îgûrû aramûûria, “Nîmbi îgûkûthangîkia? Ûgakîra nîûntû Mûrungu aakwigua kîrîro kîa mwana ûu arî o au arî.

¹⁸Ûkîîra ûjûkie mwana ûmûgwate, nîûntû nkaamwethia mûgongo jûmûnene.”

¹⁹Rîu Mûrungu aratûma Hagari aroona kîthima kîa rûûjî. Areeta aroojûria kiujo rûûjî, arakundia mwana.

²⁰Mûrungu nî aamenyereere mwana ûu arakûra bwega. Aratûûra rwanda rwa Parani araa mûthoogi ûmûnene.

²¹Ng'ina aramûcwîra mwarî kuuma nthî ya Misri aramûgûra.

²² Naku nî gwakarîre atîrî, îgiiteene rîu Abimeleki barî na Fikoli, mûtongeeria wa njûûrî yaawe nî beerîre Abrahamu atîrî, “Mûrungu nî eethagîrwa arî amwe naagwe mantûûne jonthe jarîa ûthithagia.

²³Tontû bûû, rî, nciîtîria nandî na riîtwa rîa Mûrungu uuge atî ûtîkorompaîria, kana waîria nchiarwa ciaakwa. Îndî o ta ûrîa ntwîre ndî mwîtîkua kîrî gwe, kinya gwe wîthîrwe ûrî mwîtîkua kîrî ni, na nthîgûrû îîjî ûtwîre ûrî mûgeni.”

²⁴Abrahamu arauga, “Ndîgûciîtia.”

²⁵Abrahamu aranung'una areera Abimeleki atîrî, “Nthûûmba ciaaku nî intuunyîte kîthima.”

²⁶Abimeleki aramwîra, “Ni ntiijî ûrîa ûthithîtie ûntû bûu. Gwe ûtambîîra, na nî naarua nkwigua ûntû bûu rîa mbere.”

²⁷Tontû bûû, Abrahamu arajûkia ng'ondu na ng'ombe, aranenkera Abimeleki, nabo barathithia kîrîkanîro.

²⁸Ningî Abrahamu arataara mîatî mûgwanja aramîîka mwanya na ng'ondu ingî.

²⁹Abimeleki arooria Abrahamu atîrî, “Nîmbi yatûma wathûra mîatî îîjî mûgwanja?”

³⁰Abrahamu aramwîra, “Ûrîjûkia mîatî îîjî mûgwanja nîkenda waa mûkûûjî waakwa atî nî ni ndeenjîre kîthima gîkî.”

³¹Tontû bûû, antû au areetwa Beerisheba nîûntû nîo antû bau bobaîrî beekanîîre mûciîtio.

³²Nabo baathiria kûthithîria kîrîkanîro kûu Beerisheba, Abimeleki na Fikoli mûtongeeria wa njûûrî yaawe barookîîra, baracoka nthîgûrû ya Afilisti.

³³Abrahamu nî aandîre mûtî jwa mûrangi kûu Beerisheba na arathaathayia MWATHANI, Mûrungu wa kenya na kenya arî antû au.

³⁴Ningî Abrahamu nî aatûûrîre arî mûgeni nthîgûrû ya Afilisti îgiita rîrîraaja.