Read KIMERU BIBLE PROTESTANT EDITION Kîam 22 Bible Online

Kîam 22 - KIMERU BIBLE PROTESTANT EDITION bible

Kîam 22

¹ Îgiita rîmwe, Mûrungu nî aagererie Abrahamu. Nî aamwîtîre, “Abrahamu!” Nawe aramûcokeria aramwîra atîrî, “Ndî aja.”

² Mûrungu aramwîra atîrî, “Jûkia mûtaana waaku wa mûûmwe Isaaka ûrîa wendeete, na wîte nawe mwanka nthîgûrû ya Moria ûmûrite arî kîgongwana gîa gwakîîria kîrîmeene kîmwe kîa birîa ngakwonia.”

³Tontû bûû Abrahamu ararooka gûûkîîra rûkîîrî, arauna nkû, arataandîka ntigiri yaawe, na arajûkia nthûûmba ciaawe ijîîrî na mûtaana waawe Isaaka. Nabo baraambîrîria rûgendo rwa gwîta gûntû kûrîa Mûrungu aamwîrîrîte.

⁴Ntukû ya ithatû, Abrahamu nî aaciûkîrie meetho aroona gûntû kûu eerîîri kûrî antû atî araaja mono kuuma arîa baarî.

⁵Rîu Abrahamu areera nthûûmba ciaawe atîrî, “Tigweni aja na ntigiri, naani na mwana ûûjû twitie naarîa tûkathaathayie Mûrungu, rîu tûcoke kîrî buî.”

⁶Abrahamu arajûkia nkû cia gwakîîria kîgongwana, na arakamatithia mûtaana waawe Isaaka. Ningî arajûkia mwanki na gachiû, bareetania bobaîrî.

⁷Isaaka areeta îthe Abrahamu arauga, “Baaba!” Abrahamu areetika arauga, “Ûîî mûtaana waakwa.” Isaaka aramwîra, “Tûrî na mwanki na nkû; îndî karîkû kang'ondu ga kûrita kîgongwana?”

⁸Abrahamu aramwîra, “Mûtaana waakwa Mûrungu nîwe ûgaatwaa kang'ondu karîa tûkaarita karî kîgongwana.” Tontû bûû, bareeta na mbere na rûgendo rwaao.

⁹ Rîrîa baakinyîre antû arîa Mûrungu aamwîrîrîte, Abrahamu nî aakîre kîritîro kîa igongwana, na arabangania nkû bwega. Aracoka aratheeka mûtaana waawe Isaaka, aramûmamia kîritîroone îgûrû rîa nkû.

¹⁰Rîu Abrahamu araikia njara arajûkia gachiû nîkenda ang'eera mûtaana waawe.

¹¹Îndî mûraîka wa MWATHANI aramwîta kuuma îgûrû akiugaga atîrî, “Abrahamu! Abrahamu!” Nawe areetîka arauga, “Îîî ndî aja.”

¹²Mûraîka aramwîra, “Menya ûûraga mwana waaku kana ûmwîkîra rûgûma. Nîkwîthîrwa nandî nkûmenya atî nî ûkîrîte Mûrungu nîûntû ûtîramwata mûtaana waaku wa mûûmwe.”

¹³Abrahamu araciûkia meetho, na agîtega aroona ntûrûme nyuma yaawe, îgwati ngoji gîkambene îkaremwa nî kwirita o. Tontû bûû, Abrahamu areeta aragwata ntûrûme îîu, aramîrita îrî kîgongwana gîa gwakîîria antû a mûtaana waawe.

¹⁴Tontû bûû, Abrahamu areeta antû au riîtwa aragwîta, “MWATHANI nî aeejanaga.” Nîkîo gîtûmi antû batwîre bakiugaga mwanka nandî atî, “Kîrîmeene kîa MWATHANI gûkaeejanagwa.”

¹⁵Mûraîka wa MWATHANI nî eetîre Abrahamu kuuma îgûrû,

¹⁶ aramwîra MWATHANI ariuga atîrî, “Ndîgûciîtia na riîtwa rîaakwa ningwa; tontû gwe ûgwîtîkîîria kûthithia ûntû bûbû, na ûtîrarega kûnditîra mûtaana waaku wa mûûmwe.

¹⁷ Nî mma ûûni ngaakûtharima, na nthegeyie nchiarwa ciaaku ciingîe ta njota kana ta mûthanga. Ningî nchiarwa ciaaku igaataa nthîgûrû cia anthû baao.

¹⁸ Nayo mîgongo yonthe ya nthî îkaatharimagwa nîûntû bwa nchiarwa ciaaku nîkwîthîrwa gwe ûkwathîkîra kajû gaakwa.”

¹⁹Rîu Abrahamu aracoka kîrî nthûûmba ciaawe, baragwata rûgendo baracokania Beerisheba kûrîa aatûûrîre.

²⁰Nyuma ya mantû jau, Abrahamu nî eerîrwe atîrî, “Milika kinya we nî aciarîrîte mûtaana wa nyakwe Nahori ataana.

²¹Uzi nîwe wa kîranga, nawe Buzi aarî mûtaana wa ng'ina. Kemueli aarî îthe wa Aramu,

²²na Kesedi na Hazo, na Pilidashi na Jidilafu, na Bethueli.”

²³Bethueli nîwe waarî îthe wa Rebeka. Milika nîwe waaciarîre ataana bau banaana, na mûkûrû waawe Nahori aarî mûtaana wa ng'ina wa Abrahamu.

²⁴Ningî mûka wa gwîka wa Nahori ûrîa weetagwa Reuma kinya we nî aaciarîre Teba, na Gahamu, na Tahashi, na Maaka.