Read KIMERU BIBLE PROTESTANT EDITION Kîam 23 Bible Online

Kîam 23 - KIMERU BIBLE PROTESTANT EDITION bible

Kîam 23

¹Sara nî aatûûrîre arakinyia ûkûrû bwa mîaka îgana rîmwe rîa mîrongo îîrî na mûgwanja (127).

²Sara nî aakuîrîîre Kiriathiaraba (naku nîku Heburoni) nthîgûrû ya Kanaani. Abrahamu arakara aithikîîrîte na akîrîraga nîûntû bwa gîkuû gîa Sara.

³Abrahamu aracoka arookîîra arauma arîa kiimba kîa mwekûrû waawe kîaarî areeta araaria na Ahiti arabeera atîrî,

⁴ “Ûûni ndî mûgeni ûrîa ûtwîre amwe naabuî. Mpeeni antû a kûthika mwekûrû waakwa ntige kûmwona.”

⁵Nabo Ahiti baramûcokeria baramwîra atîrî,

⁶“Thikîîra nandî gwe mwathi weetû: gwe ûrî mûtongeeria ûthuuri nî Mûrungu gatîgatî geetû. Thika mwekûrû waaku mbîrîreene o îrîa ûkeenda. Gûtî weetû ûgaakûgiria ûtumîra mbîrîra yaawe ûthika mwekûrû waaku.”

⁷Abrahamu ararûngama areenamîîria mbere ya Ahiti bau eene nthî îîu.

⁸Arabaarîria arabeera atîrî, “Këethîra nî bûkwenda nthika mwekûrû waakwa ntiga kûmwona, nthikîîreeni. Mbûûrîrieeni Efuroni mûtaana wa Zohari

⁹ampenderie gîkurungu kîaawe kîa Maki-pela kîrîa kîrî mûthia jwa kîthaka kîaawe. Nî ampenderie kîo ûrîa kîbuîrîte kwendua mbere yeenu nîkenda kîaa gîaakwa gîa kûthikaga akuû.”

¹⁰ Efuroni aakari nthî amwe na Ahiti bangî. Tontû bûû, aracokeria Abrahamu, Ahiti bangî bonthe ba ntûûra yaao bakiigagua, arauga atîrî,

¹¹“Arî mwathi waakwa; thikîîra, ngûkwaa kîthaka kîu amwe na gîkurungu kîrîa kîrî ku. Ngûkwaa bio aja mbere ya antû beetû. Nthiî ûthike mwekûrû waaku.”

¹²Abrahamu areenamîîria mbere ya antû bau ba nthî îîu.

¹³Ningî araarîria Efuroni antû bau ba nthî îîu bakiigagua, aramwîra atîrî, “Këethîra wambîtîkîîria rî, ndakûrîaa mbeecha irîa ibuîrîte kûgûra kîthaka kîu. Îtîkîîria nkûrîee nîkenda nthika mwekûrû waakwa ku.”

¹⁴Efuroni nawe aramûcokeria, aramwîra atîrî,

¹⁵“Thikîîra mwathi waakwa; kîthaka nî kîa ûgûri bwa kilo inya na nusu cia fetha. Îndî iu nîmbi kîrî gwe na ûûni? Nthiî ûthike mwekûrû waaku.”

¹⁶Tontû bûû, Abrahamu areetîkîîria ûrîa Efuroni augîre, na arathima kilo inya na nusu cia fetha îrîa Efuroni augîrîte; arathima kilo inya na nusu cia fetha kûringana na kîthimi kîrîa gîatumagîrwa îgiita rîu nî aringi biashara.

¹⁷Tontû bûû, kîthaka kîu kîa Efuroni kîrîa kîaarî Maki-pela bwa gaiti ya Mamure, amwe na gîkurungu kîrîa kîaarî ku na mîtî yonthe îrîa yaarî ku, o ûrîa kîang'anaga kîonthe, nî kîaagûrîrwe

¹⁸nî Abrahamu mbere ya Ahiti bonthe barîa baarî mpingîroone ya ntûûra îîu.

¹⁹Nyuma ya bûu, Abrahamu nî aathikîre mwekûrû waawe Sara gîkurunguune kîrîa kîaarî Maki-pela bwa gaiti ya Mamure (na nîyo Heburoni) nthîgûrûûne ya Kanaani.

²⁰Ûu nîu kîthaka kîu na gîkurungu kîu kîaagûrîrwe kuuma kîrî Ahiti, kîraa kîa eere kîa Abrahamu gîa kûthikaga akuû.