Read KIMERU BIBLE PROTESTANT EDITION Kîam 25 Bible Online

Kîam 25 - KIMERU BIBLE PROTESTANT EDITION bible

Kîam 25

¹Abrahamu nî aacokere aragûra mûka ûngî weetagwa Ketura.

²Nawe araciara Zimurani na Jokishani na Medani na Midiani na Ishibaki na Shuha.

³Jokishani aarî îthe wa Sheba na Dedani. Nabo ataana ba Dedani baarî Ashurimu na Letushimu na Leumimu.

⁴Ataana ba Midiani nabo baarî Efa na Eferi na Hanoki na Abida na Elida. Bau bonthe baarî ba rûrîîjo rwa Ketura.

⁵Abrahamu nî aanenkeere Isaaka into bionthe birîa aarî nabio.

⁶Îndî ataana barîa Abrahamu aagîîte na aka ba gwîka nî aabaeere biewa, na o arî mwoyo arabaathûrana na Isaaka bareeta nthîgûrû ya bwa gaiti.

⁷Abrahamu aatûûrîre mîaka îgana rîa mîrongo mûgwanja na îtaano (175).

⁸Abrahamu nî aakuîre agûtindira mma.

⁹Ataana baawe, Isaaka na Ishimaeli baramûthika gîkurunguune kîa Maki-pela muundeene jwa Efuroni mûtaana wa Zohari ûrîa Mûhiti, bwa gaiti ya Mamure.

¹⁰Munda jûu nîju jûrîa Abrahamu aagûrîte kuuma kîrî Ahiti. Abrahamu na mûka waawe Sara nîku baathikîrwe.

¹¹Nyuma ya gîkuû kîa Abrahamu, Mûrungu nî aatharimîre mûtaana waawe Isaaka. Isaaka nî aatûûrîre Beeri-Iahai-roi.

¹²Iji nîcio nchiarwa cia Ishimaeli mûtaana wa Abrahamu ûrîa Abrahamu aaciarîîrwe nî Hagari Mûmisri, ûrîa waarî nthûûmba ya Sara.

¹³Jaja nîjo mariîtwa ja ataana ba Ishimaeli bathingateene kûringana na ûrîa baaciari. Nabo nî Nebaiothi ûrîa waarî mwana wa kîranga, arathingatwa nî Kedari na Adibeeli na Mibisamu,

¹⁴na Mishima na Duma na Massa,

¹⁵na Hadadi na Tema na Jeturi na Nafishi na Kedema.

¹⁶Bau nîbo baarî ataana ba Ishimaeli na jau nîjo mariîtwa jaao na ntûûra ciaao na ja gûntû kûrîa baambaga maema. Bau nîbo baaere atongeeria îkûmi na baîrî barîa baambîrîîrie mîîrîga yaao.

¹⁷Ishimaeli aakuîre agûtûûra ûkûrû bwa mîaka îgana rîmwe rîa mîrongo îthatû na mûgwanja (137).

¹⁸Nchiarwa cia Ishimaeli ciatûûrîre nthîgûrû îrîa yaarî gatîgatî ka Havila na Shuri, bwa gaiti ya Misri, na gwîta bwa nthî ya Asîria. Nchiarwa cia Ishimaeli nî ciatûûrîre itî na ngwatanîro na ndûgû ciaao cionthe.

¹⁹Iji nîcio nchiarwa cia Isaaka mûtaana wa Abrahamu. Abrahamu nîwe waarî îthe wa Isaaka.

²⁰Isaaka aarî na ûkûrû bwa mîaka mîrongo îna (40) rîrîa aagûrîre Rebeka mwarî wa Bethueli. Bethueli aarî Mûaramu wa kuuma Padani-aramu. Ningî Rebeka aarî mwarî wa ng'ina wa Labani.

²¹Isaaka nî aarombere MWATHANI nîûntû bwa mwekûrû waawe nîkwîthîrwa aarî nthaata. MWATHANI aaigîrue îromba rîaawe, na mwekûrû waawe Rebeka aragîa îu.

²²Îndî twaana tûratua gûtindîkana tûrî kîu kîa ng'ina, nawe Rebeka araciûria, “Nîatîa gûkari kîu gîkî?” Nawe areeta kûûria MWATHANI ûntû bûu.

²³ MWATHANI aramwîra atîrî, “Mîgongo îîrî îrî kîu gîaaku. Ûgaaciara antû baîrî nabo batîgwatanagîra; ûmwe agaakîria ûngî inya na ûrîa mûkûrû akaa nthûûmba ya ûrîa mwanake.”

²⁴Rîrîa îgiita rîaawe rîa kuurûka rîakinyîre, nawe araciara maatha.

²⁵Mwana wa mbere aarî ûmûtuune, na mwîrî jwaawe jûnthe jwoojûri ruuri. Nawe areetwa Esaû.[10]

²⁶Mûtaana wa ng'ina aracoka arauma agwete Esaû gatakino. Nawe areetwa Jakubu.[11] Isaaka aarî na ûkûrû bwa mîaka mîrongo îtaantatû (60) rîrîa Rebeka aaciarîre aana bau.

²⁷Biîjî biu bigûkûra, Esaû nî aaere mûthoogi ûmûnene, na aatindaga ithakeene. Jakubu nî aaere muntû ûmûkiri na aatindaga maemeene.

²⁸Isaaka nî eendeete Esaû, nîûntû nî eendeete kûrîa nyama irîa aathoogaga. Îndî Rebeka eendeete Jakubu.

²⁹Ntukû îmwe Jakubu nî aarugîre gîtweero gîkîega. Esaû areeja arî na mpara mono aumîte kîthakeene.

³⁰Esaû areera Jakubu atîrî, “Ndûmia gîtweero kîu kîa nthoroko intuune, nîûntû ndî na mpara îmbîî.” (Kîu nîkîo gîtûmi eetîrwe Edomu[12])

³¹Jakubu aramwîra atîrî, “Mbere mpenderia kiigai gîaaku kîa ûrikithathi.”

³²Esaû arauga atîrî, “Nandî ka ngûkua nî mpara; kiigai kîa ûrikithathi kîrî na gîtûmi kîrîkû kîrî ni?”

³³ Jakubu aramwîra “Amba ûciîtie.” Esaû araciîtia, atî akamwenderia kiigai kîaawe kîa ûrikithathi.

³⁴Rîu Jakubu ararûmia Esaû mûgaate na gîtweero kîa nthoroko. Esaû ararîa na aranyua. Aracoka arookîîra, araciîtîra. Ûu nîu Esaû aiteereere kiigai kîaawe kîa ûrikithathi.