Read KIMERU BIBLE PROTESTANT EDITION Kîam 26 Bible Online

Kîam 26 - KIMERU BIBLE PROTESTANT EDITION bible

Kîam 26

¹Nî kwagîîre mpara îngî nthîgûrûûne, tiga îrîa yaarî ku îgiiteene rîa Abrahamu. Tontû bûû, Isaaka areeta Gerari kîrî Abimeleki mûnene wa Afilisti.

²MWATHANI nî aamuumîrîîre aramwîra atîrî, “Ûgeeta Misri tûûra nthîgûrû îrîa ngaakwîrîra.

³ Ûtûûre ta mûgeni nthîgûrû îîjî, naani ngaagûkaria na ngaakûtharima. Nîkwîthîrwa ngaakwaa nthîgûrû îîjî yonthe, na mpe nchiarwa ciaaku yo, mbûjûrie mûciîtio jûrîa ndaaciîtîîrie abaagu Abrahamu.

⁴Nkaingîyia nchiarwa ciaaku ta njota na mpe nchiarwa ciaaku nthîgûrû îîjî yonthe. Nayo mîgongo yonthe ya nthîgûrû îkaatharimagwa nîûntû bwa nchiarwa ciaaku.

⁵Nîkwîthîrwa Abrahamu nî aambathîkîîre na araathîkîra matua jaakwa, na maathana jaakwa, na mawaatho jaakwa na mawîthîre jaakwa.”

⁶Tontû bûû, Isaaka nî aatûûrîre kûu Gerari.

⁷ Rîrîa arûme ba gûntû kûu, beendere kûmenya mantû ja mwekûrû waawe, Isaaka nî aabeerîre, “Ûûjû nî mwarî wa chiaa,” nîûntû nî aakîraga kûbeera, “Nî mwekûrû waakwa.” Tontû aathûgaanagia atîrî, “Arûme ba gûntû kûu boomba kûmbûraga nîkenda bajûkia Rebeka nîûntû nî ûmûthongi.”

⁸Îndî rî, nyuma ya Isaaka gûkara gûntû kûu matukû jamaingî, ntukû îmwe Abimeleki mûnene wa Afilisti nî aategereere ndiriceene aroona Isaaka agîtongatonga mwekûrû waawe Rebeka.

⁹Tontû bûû, Abimeleki areeta Isaaka aramwîra, atîrî, “Anga Rebeka nî mwekûrû waaku? Nîmbi îndî îratûmaga gwe uuga, ûûjû nî mwarî wa nyakwe?” Isaaka aramwîra atîrî, “Nîka ndîrathûgaanagia bwoomba kûmbûraga nîkenda bûmûjûkia.”

¹⁰Abimeleki aramûûria atîrî, “Nîatîa ûjû ûtûthîthîrîtie? Këethîra muntû ûmwe weetû nî aathengereere mwekûrû waaku rî, tîka ûrîngîîthîrwa ûtûreetereete mûgiro?”

¹¹Abimeleki ararita waatho, areera antû bonthe ûjû, “Muntû ûreeja kûringithia muntû ûûjû kana mwekûrû waawe no mwanka ooragwe.”

¹²Isaaka nî aandîre irio nthîgûrû îîu, nawe araketha irio bibingî mono mwakeene jûu. MWATHANI nî aamûtharimîre.

¹³Aratonga na into bireeta na mbere kwongeereka mwanka araa gîtonga gîkîneene.

¹⁴Nawe nî aarî na ndîîthia inyingî cia ng'ondu na cia ng'ombe, na nkombo inyingî. Nabo Afilisti nî baaigîrue rûriitho.

¹⁵Tontû bûû, nî baakunîkîre ithima bionthe na mîthetu biranyaara. Ithima biu bieenji nî nthûûmba cia îthe Abrahamu rîrîa aarî mwoyo.

¹⁶Nîrîo Abimeleki eerîre Isaaka atîrî, “Nandî thaama uume kîrî tuî nîûntû nî ûgîîte inya nkûrûki yeetû.”

¹⁷Tontû bûû, Isaaka arathaama gûntû kûu, areeta araamba maema jaawe mûgwanthîîne jwa Gerari, aratûûra ku.

¹⁸Isaaka aracoka arathikûra ithima bia rûûjî birîa bieenji îgiita rîa îthe Abrahamu, birîa Afilisti baarî bakûthika na mûthetu nyuma ya Abrahamu agûkua. Ningî arabiîta mariîtwa o jarîa îthe aabiîtîte.

¹⁹Nacio nthûûmba cia Isaaka nî cieenjîre kîthima kîa rûûjî rûrwega mûgwanthîîne jûu.

²⁰Îndî arîîthi ba kûu Gerari baratetera kîthima kîu na arîîthi ba Isaaka bakiugaga, “Rûûjî rûrû nî rweetû.” Tontû bûû, Isaaka areeta kîthima kîu Eseki[13] nîûntû bwa ûrîa gîateteerwe.

²¹Arîîthi ba Isaaka baracoka bareenja kîthima kîngî, na kinya kîu nakîo arîîthi ba Gerari baragîtetera. Tontû bûû, Isaaka aragîîta Sitina.[14]

²²Isaaka arathaama antû au na areeta areenja kîthima kîngî, îndî kîu gîtaateterwa. Tontû bûû, aragîîta Rehobothi,[15] arauga, “Nandî MWATHANI agûtûthithîria webero nthîgûrûûne îîjî naatuî tûkathegea.”

²³Kuuma au, Isaaka nî eetîre Beerisheba.

²⁴MWATHANI aramuumîîra ûtukû o bûu aramwîra, “Nî ni Mûrungu wa abaagu Abrahamu. Ûgákîra nîûntû ndî amwe naagwe. Ngakûtharima na nkathegeyia nchiarwa ciaaku nîûntû bwa nthûûmba yaakwa Abrahamu.”

²⁵Tontû bûû, Isaaka araaka kîritîro kîa igongwana antû au na arathaathayia MWATHANI na gûkumia riîtwa rîaawe. Ningî araamba maema jaawe antû au na nthûûmba ciaawe ireenja kîthima o.

²⁶ Abimeleki arî amwe na Ahuzathi mûmwathi kîrîra, na Fikoli, mûtongeeria wa njûûrî yaawe ya ndwaa nî baaumîre Gezari bareeta kwona Isaaka.

²⁷Isaaka arabooria, “Nîmbi bwejîra kîrî ni na nî bwanthûûrîre na bûrampînga kweenu?”

²⁸Nabo baramwîra, “Nî twoneete na mma atî MWATHANI arî amwe naagwe. Naatuî twauga nî kaaba tûnyue muuma na twîke wîrane naagwe,

²⁹nîkenda ûtîkeeje gûtûthithîria bûbûûî nîûntû kinya tuî tûtaakûthithîria bûbûûî, no mantû jameega akî twakûthithîîrie, tûracoka tûratûma ûthaama na thîîrî, na nandî nî tûkwona MWATHANI nî akûtharimîte.”

³⁰Isaaka arabamaathîra, bararîa na baranyua.

³¹Bagûûkîîra rûûneene rûkîîrî, nî beekanîîre wîrane, Isaaka arabarekeeria baraciîtîra na thîîrî.

³²O ntukû îîu, nthûûmba cia Isaaka nî cieejîre îramwaa nteto cia kîthima kîrîa cieenjîte, iramwîra atîrî, “Tûkwona rûûjî!”

³³Nawe areeta kîthima kîu Shiba.[16] Kîu nîkîo gîtûmi ntûûra îîu îtagwa Beerisheba[17] mwanka nandî.

³⁴Esaû aakinyia mîaka mîrongo îna, nî aagûrîre mûka ûgwîtwa Judîthi, mwarî wa Mûhiti weetagwa Beeri. Ningî aragûra Basemathi, kinya we, mwarî wa Mûhiti weetagwa Eloni.

³⁵Aka bau nî baatûmîre Isaaka na Rebeka bakara batîng'anîri ûtûûroone bwaao.