Read KIMERU BIBLE PROTESTANT EDITION Kîam 27 Bible Online

Kîam 27 - KIMERU BIBLE PROTESTANT EDITION bible

Kîam 27

¹Rîrîa Isaaka aakûrîre, meetho jaawe nî jaaûrîre, araremwa nî kwona. Nî eetîre, Esaû mûtaana waawe ûrîa mûkûrû aramwîra atîrî, “Mûtaana waakwa!” Esaû aramwîtîka arauga, “Îîî ndî aja.”

²Isaaka aramwîra, “Nî ûkwona nandî ndîgûkûra na ntiijî rîrîa ngaakua.

³Nandî itû jûkia ûta na mîgwî, wîte kîthakeene ûkandathîre nyamû.

⁴Rîu wîje ûndugîre biakûrîa birî mûrîo birîa mpendeete mono, ûndetere ndîe nîkenda nkûtharima mbere ya ntîrakua.”

⁵Îndî Rebeka nî aaigîrue nteto irîa Isaaka eeraga Esaû mûtaana waawe. Rîrîa Esaû aumagarîre areeta kîthakeene kûthooga,

⁶Rebeka nî aarîîrie Jakubu mûtaana waawe aramwîra,

⁷“Atîrî, nkwigua abaagu akîarîria mûtaana wa nyakwe Esaû amwîra, ‘Ndeetera nyamû na ûndugîre biakûrîa birî mûrîo, ndîe nkûtharime mbere ya MWATHANI mbere ntîrakua.’

⁸Nandî mwana waakwa, thikîîra ûrîa ngûkwîra na ûthithie u.

⁹Îtanga ndîîthieene ûngîîrîre tûbûri twîrî tûtûnoru. Naani nkaaruga biakûrîa birî mûrîo ta birîa abaagu eendeete.

¹⁰Naagwe wikîrie abaagu arîe akûtharime atîrakua.”

¹¹Îndî Jakubu areera ng'ina Rebeka atîrî, “Nî wiijî gwe atî mûtaana wa chiaa Esaû oojûri ruuri mwîrî, îndî ni ndî muntû ûtî ruuri.

¹²Kwombîka baaba akambataata mwîrî, akamenya nîka nkûmwayia, naani nkaireetera kîrumi antû a kîtharimo.”

¹³Nawe ng'ina aramwîra atîrî, “Kîrumi gîaaku mwana waakwa kîrongwata! Gwe thithia ûu ndaakwîra, wîte ûngîîrîre tûbûri.”

¹⁴Tontû bûû, Jakubu areeta aragwata tûbûri, araretera ng'ina, nawe ng'ina araruga irio birî mûrîo ta birîa Isaaka eendeete.

¹⁵Rîu Rebeka arajûkia nguû irîa nthongi cia Esaû, mûtaana waawe ûrîa mûkûrû, irîa aatigîte nyomba, areekîra Jakubu, mûtaana waawe ûrîa mwanake.

¹⁶Ningî aramwîkîra mîgûûta ya tûbûri njara na nkingo kûrîa gûtaarî na ruuri.

¹⁷Aracoka aranenkera mûtaana waawe Jakubu irio biu birî mûrîo na mûgaate jûrîa aakandîte.

¹⁸Jakubu arakûrûka kîrî îthe aramwîta, “Baaba!” Isaaka areetîka arauga, “Ûûî! Nîgwe ûû mwana waakwa?”

¹⁹Jakubu areera îthe, “Nî ni mûtaana waaku wa kîranga, Esaû. Nkûthithia ûrîa ûkûmbîîrîte nthithie. Nandî ûkîîra ûkare nthî ûrîe nyama cia nyamû ya waathi nîkenda ûntharima.”

²⁰Îndî Isaaka arooria mûtaana waawe atîrî, “Nîatîa woona nyamû ya kûratha na mpwîî ûjû mwana waakwa?” Jakubu aramwîra, “Tontû MWATHANI Mûrungu waaku agûtûma yeeja ûrîa ndî.”

²¹Rîu Isaaka areera Jakubu, “Îjaîja akuî mwana waakwa ngwataate mbigue këethîra na mma nîgwe mûtaana waakwa Esaû.”

²²Jakubu areetaîta akuî na îthe Isaaka, nawe aramwataata arauga, “Mûgambo nî jwa Jakubu, îndî njara nî cia Esaû.”

²³Tontû bûû, Isaaka ataamûmenya nîûntû njara ciaawe ciaarî na ruuri ta cia mûtaana wa ng'ina Esaû. Tontû bûû, Isaaka aramûtharima.

²⁴Aramûûria, “Nî mma nîgwe mûtaana waakwa Esaû?” Jakubu aramwîra, “Nî ni.”

²⁵Isaaka rîu aramwîra, “Nenkeeria irio nandî ndîe nyama cia wathi bwa mûtaana waakwa nîkenda nkûtharima.” Aramûnenkeeria, nawe ararîa. Ningî aramûretera ndibei aranyua.

²⁶Rîu îthe Isaaka aramwîra, “Nandî îjaîja ûncûûnce mûtaana waakwa.”

²⁷ Jakubu areetaîta akuî, aramûcûnca. Isaaka aigua mûrukî jwa nguû ciaawe, aramûtharima arauga, “Îî, yeera rîa mûtaana waakwa nî ta yeera rîa muunda jûmûtharime nî MWATHANI.

²⁸Mûrungu arotûma îmee rîgûûjagîra imera kuuma îgûrû, na agakwejaga mûthetu jûmûnoru, jûrî na irio bibingî na ndibei.

²⁹ Antû barogûtumîkagîra; nayo mîgongo îgakwathîkagîra. Ûrwaa mwathi wa ndûgû ciaaku; ataana ba nyakwe barokwathîkagîra. Barîa bagaakûrumaga barogwatagwa nî kîrumi; barîa bagaakûtharimaga baroonaga kîtharimo.”

³⁰Isaaka akûthiria kûtharima Jakubu, na mbere ya Jakubu eeta kûraaja kuuma arîa îthe Isaaka aarî, mûtaana wa ng'ina Esaû nî aakinyîre aumîte kûthooga.

³¹Esaû kinya we arathuranîra irio birî mûrîo araikîria îthe. Areera îthe atîrî, “Nandî ûkîîra baaba ûrîe nyama cia nyamû ya wathi bwa mûtaana waaku nîkenda ûntharima.”

³²Nawe îthe aramûûrîa, “Nîgwe ûû?” Esaû aramwîra, “Nî ni mûtaana waaku wa kîranga Esaû.”

³³Isaaka aramaka mono na arooria atîrî, “Nûû ûu ûkûthoogeete nyamû na aandetera? Naani nî ngûkarî ndîkûrîa nyama ciaayo mbere ya ûkinya na nî mûtharimîre. Rîu nandî, kîtharimo nî kîaawe.”

³⁴Rîrîa Esaû aaigîrue ûrîa îthe auga nî aarîrîre mono arî na ûrûrû bûbwingî. Areera îthe atîrî, “Ntharima baaba; itû ntharima kinya ni!”

³⁵Îndî îthe aramwîra, “Mûtaana wa nyakwe eejîre na waayia na aajûkia kîtharimo gîaaku.”

³⁶ Esaû arauga, “Nîkîo gîtûmi eetîrwe Jakubu. Rîrî nîrîo rîa jaîrî gûmpayia. Nî aajûkîrie ûrikithathi bwaakwa, na nî ûkwona nandî aakûjûkia kîtharimo gîaakwa.” Arooria îthe atîrî, “Gûtî kîtharimo ûrantigarîria?”

³⁷Isaaka aracokeria Esaû aramwîra atîrî, “Nkûmweethia mwathi waaku na nkweejana ndûgû ciaawe cionthe kîrî we imûtumîkagîra ta nthûûmba, ningî nkûmûtharimîra irio na ndibei. Nandî gwe rî, nîatîa mpûûmba gûkûthithîria mwana waakwa.”

³⁸ Esaû arooria îthe atîrî, “Ga-kîtharimo gîaaku kîrî kîmwe akî baaba? Ntharima baaba; itû ntharima kinya ni!” Esaû ararîra na kajû gakanene.

³⁹ Rîu îthe Isaaka araarîria Esaû aramwîra, “Ûgaatûûraga kûraaja na mûthetu jûrîa mûnoru na kûrîa îme rîgûûjaga kuuma îgûrû.

⁴⁰ Rûchiû rwaaku nîru rûgaagûtûûragia, naagwe ûgaatumîkagîra mûtaana wa nyakwe. Îndî rîrîa ûkaaregana na waatho bwaawe, nîrîo ûkoomba kwirita ûkomboone bwaawe.”

⁴¹Esaû nî aathûûrîre Jakubu mono nîûntû bwa ûrîa îthe aamûtharimîre. Nawe arauga nkoroone yaawe ûjû, “Îgiita rîa kûrîra nîûntû bwa gîkuû kîa baaba rîrî akuî, rîathira nîrîo nkooraga mûtaana wa chiaa Jakubu.”

⁴²Îndî Rebeka nî eerîrwe ûrîa Esaû, mûtaana waawe ûrîa mûkûrû aaugîîte. Nawe aratûmanîra Jakubu, mûtaana waawe ûrîa mwanake aramwîra, “Nî wiijî? Mûtaana wa nyakwe Esaû arîenda gûkûûra nîkenda aiboreria gîkuû kîa îthe.

⁴³Tontû bûû, gwe mwana waakwa thithia ûrîa ngûkwîra. Ûkîîra ûmatûke wîte Harani kîrî mûtaana wa chiaa Labani.

⁴⁴Naagwe ûkare kîrî we mwanka marûrû ja mûtaana wa nyakwe jathire.

⁴⁵Mûthûûro jwa mûtaana wa nyakwe jwaathira, na oorîrua nî mantû jarîa ûmûthithîrîtie, nîrîo ngagûtûmanîra uume nao, ûcoke. Ntîûmîîria gûkuîrwa nî antû baîrî ntukû îmwe.”

⁴⁶Rebeka aracoka areera Isaaka atîrî, “Ni nandî nî nogeete gûtûûra mwoyo nîûntû bwa aka baba Ahiti. Jakubu akëeja kûgûra mûka ûkari ta Ahiti baba rî, kûrî gîtûmi gîa ntûûra mwoyo?”