Read KIMERU BIBLE PROTESTANT EDITION Kîam 28 Bible Online

Kîam 28 - KIMERU BIBLE PROTESTANT EDITION bible

Kîam 28

¹Isaaka nî eetîre Jakubu, aramûtharima na aramwîra, “Gwe menya wîja kûgûra mûka kuuma nthîgûrû ya Kanaani.

²Ûkîîra wîte Padani-aramu, nja ya ûjûûgu Bethueli, wîte ûgûre mûka nao kuuma kîrî aarî ba muntwenu Labani.

³Mûrungu Mweneinya arokûtharima na agakwaa nchiarwa. Ningî arotûma ûthegea na waa îthe wa mîgongo îmingî.

⁴ Ningî arokwaa kîtharimo o kîrîa aaere Abrahamu, gwe na nchiarwa ciaaku, nîkenda ûkaajûkia nthîgûrû îîjî ûtwîre ûrî mûgeni îrîa Mûrungu aaere Abrahamu.”

⁵Isaaka ararekeeria Jakubu araciîtîra. Areeta mwanka Padani-aramu kîrî Labani, mûtaana wa Bethueli, Mûaramu. Labani aarî mûtaana wa ng'ina wa Rebeka, ûrîa waarî ng'ina wa Jakubu na Esaû.

⁶Esaû nî oonere ûrîa Isaaka aatharimîre Jakubu na aramûtûma Padani-aramu eeta kûgûrana nao. Ningî akîmûtharima nî aamwîrîre atî, “Ûkorogûra mûka kuuma nthîgûrû ya Kanaani.”

⁷Jakubu nî aathîkîîre îthe na ng'ina areeta Padani-aramu.

⁸Tontû bûû, Esaû nî aamenyere atî îthe ataagwîragua nî aka kuuma nthîgûrû ya Kanaani.

⁹Nî eetîre Mahalathi arî mwekûrû wa bathatû. Mahalathi aarî mwarî wa Ishimaeli, nawe Ishimaeli aarî mûtaana wa Abrahamu. Mahalathi aarî mwarî wa ng'ina wa Nebaiothi.

¹⁰Jakubu auma Beerisheba nî aagwatîre rûgendo rwa gwîta Harani.

¹¹Arakinya antû amwe araraarîîra o nîûntû riûa nî rîarî rîkûthwa. Arajûkia iiga rîmwe ararîîka rungu rwa mûtwe jwaawe aramama.

¹² Nawe araroota akîonaga nkathî îkinyithîtue nthî na mûthia jwaayo jûgîkinyaga îgûrû buru. Nabo araîka ba Mûrungu nî baitagia na bakîînamaga nayo.

¹³ MWATHANI nî aarûngi îgûrû rîaayo nawe arauga, “Nî ni MWATHANI, Mûrungu wa ûjûûgu Abrahamu, na Mûrungu wa Isaaka. Nthîgûrû îîjî ûmami ngaakwaa yo, na mpe nchiarwa ciaaku yo.

¹⁴ Nacio nchiarwa ciaaku ikaingîa o ta mûthetu. Nacio igaataamba nthîgûrû yonthe bwa rûgûrû na bwa gaiti na bwa ûrîo na bwa ûmotho. Nayo mîîrîga ya antû ba nthî yonthe îkaatharimagwa nîûntû bwaaku na nchiarwa ciaaku.

¹⁵Ningî nkethagîrwa ndî amwe naagwe, na ngagûkaragia gûntû kunthe kûrîa ûgeetaga. Naani ngagûcokia nthîgûrû îîjî nîkwîthîrwa ni ntîkorogûtiga mwanka mbûjûrie mantû jau ndakwîra.”

¹⁶Rîu Jakubu arookîîra kuuma toroone arauga, “Nî mma MWATHANI arî antû aja îndî ni ntîkûmenyaga.”

¹⁷Nawe araigua ûguaa, arooria, “Nîatîa antû aja agûtûma nkaigua ûguaa? Aja atîûmba kwîthîrwa arî antû angî tiga nyomba ya Mûrungu. Îîjî nîyo mpingîro ya gwîta îgûrû.”

¹⁸Rûûneene rûkîîrî, Jakubu arajûkia iiga rîrîa aamamîrîtie mûtwe jwaawe ararîînjîra nthî nîkenda rîaa iiga rîa kîririkano, ningî areetûûrîria maguta îgûrû rîaarîo.

¹⁹Nawe areeta antû au Betheli[18] kinya këethîra mbereene, ntûûra îîu yeetagwa Luzi.

²⁰Jakubu aracoka araciîtia mûciîtio arauga, “Mûrungu akëeja gûkara amwe naani, na akamenyeera rûgendoone rûrû mbîtîte, ningî agampa irio biakûrîa na nguû cia gwîkîra

²¹mwanka ngacoka ndî thîîria nja ya baaba, rîu MWATHANI nîwe ûkaa Mûrungu waakwa.

²²Narîo iiga rîrî ndeenjîra aja rîa kîririkano nîrîo rîkaa nyomba ya Mûrungu, na kîrîa kîonthe ûgaampeejaga, ngakwejaga gîchunchî kîmwe kuuma kîrî îkûmi.”