Read KIMERU BIBLE PROTESTANT EDITION Kîam 29 Bible Online

Kîam 29 - KIMERU BIBLE PROTESTANT EDITION bible

Kîam 29

¹Jakubu nawe nî aagwatîre rûgendo rwaawe kaîrî areeta arakinya nthîgûrû ya bwa gaiti.

²Nawe agîtega aroona kîthima kîa rûûjî bûûrîîne. Nî kwaarî na ikundi bithatû bia ng'ondu biamami rûteere rwaakîo nîûntû kîthima kîu nîo ng'ondu cianyuithagua rûûjî. Narîo iiga rîrîa rîakunîkaga kîthima kîu rîaarî rîrînene.

³Rîrîa mathiû jonthe jaakinya au kîthimeene nîrîo arîîthi baaingiritagia iiga rîu kuuma mûromoone jwa kîthima, bagakundia ng'ondu rûûjî, baathiria bagacokia iiga rîu arîa rîakaraga mûromoone jwa kîthima.

⁴Jakubu nî ooririe arîîthi bau atîrî, “Ataana ba baaba, bûrî ba kuuma kû?” Nabo baramwîra, “Tûrî ba kuuma Harani.”

⁵Jakubu arabooria, “Nî bwijî muntû wîtagwa Labani mûtaana wa Nahori?” Nabo baramwîra, “Îî nî tûmwijî.”

⁶Arabooria, “Nî ûmwega?” Nabo baramwîra, “Îî nî ûmwega. Ningî tîwe ûu mwarî waawe Raeli wîjîte na ng'ondu.”

⁷Jakubu arabeera, “Atîrî, rîu riûa no rîarîte na gûtîrarura na iji tîcio thaa cia kûûthûrania mathiû amwe. Nyuithieeni ng'ondu bwîte bûkairîîthie.”

⁸Îndî baramwîra, “Tûtîûmba kûthithia ûu mwanka ndîîthia cionthe ciûthûrane. Rîu nîrîo iiga rîkaingiritua kuuma mûromoone jwa kîthima naatuî tûnyuithie ng'ondu.”

⁹O rîrîa Jakubu aaragia nabo, Raeli nî aakinyîre arî na ng'ondu cia îthe nîûntû nîwe wairîîthagia.

¹⁰Rîrîa Jakubu oonere Raeli, mwarî wa Labani muntwoo arî na ng'ondu cia îthe Labani, Jakubu nî eetaîtîre akuî, na araingiritia iiga kuuma mûromoone jwa kîthima, aranyuithia ng'ondu iu.

¹¹Jakubu aracoka aracûnca Raeli, ningî ararîra na inya.

¹²Jakubu areera Raeli atî we nî muntû wa ndûgû cia ba-îthe, Labani, na atî we nî mûtaana wa Rebeka. Raeli aramatûka kwîra îthe.

¹³Rîrîa Labani aaigîrue nteto iu ciegiî Jakubu, mûtaana wa mwarî wa ng'ina, nî eetîre na rwîro kûmûthagaana. Nawe aramûkumbatîria na aramûcûnca, na aracoka aramwikia kwaawe nja. Jakubu nî eerîre Labani mantû jonthe jarîa jaakarîkîte.

¹⁴Labani aramwîra, “Gûtî nkaanja rigî, tûrî ba kîero kîmwe.” Jakubu arakara kwa Labani mweri jûmwe.

¹⁵Rîu Labani areera Jakubu atîrî, “Kinya këethîra gwe ûrî wa ndûgû cieetû rî, ka ûbuîrîte kûnditagîra ngûgî o ûu ûtheri? Mbîîra mûchaara jûrîa wenda nkûrîaa.”

¹⁶Labani nî aarî na aarî baîrî. Ûrîa mûkûrû eetagwa Lea, na ûrîa mwanake eetagwa Raeli.

¹⁷Lea aarî meetho jataathongi, îndî Raeli aarî ûmûthongi nkûrûki.

¹⁸Jakubu nî eendeete Raeli. Tontû bûû, arauga, “Ngaakûritîra ngûgî mîaka mûgwanja nîkenda ûmpa Raeli mwarî waaku ûu mwanake.”

¹⁹Labani arauga, “Nî kaaba nkweete we nkûrûki ya kûmweejana kîrî muntû ûngî. Kara gwaakwa.”

²⁰Tontû bûû, Jakubu ararita ngûgî mîaka mûgwanja nîkenda aeewa Raeli. Kîrî we, mîaka îîu yoonekaga ta ntukû inkai nîûntû bwa ûrîa aamwendeete.

²¹Nîrîo Jakubu eerîre Labani atîrî, “Rîrîa tweeranîrîte rîkûthira, mbîtîkîîria ngûre mwarî waaku.”

²²Labani arathithia kîatho aramaatha mono na areeta antû bonthe ba gûntû kûu.

²³Îndî ûgoro bûu arajûkia mwarî waawe Lea, aramwikia kîrî Jakubu, nawe Jakubu aramûthengeera.

²⁴Ningî Labani araa Lea mwarî ûrîa waamûritagîra ngûgî nîkenda aritagîra Lea ngûgî. Nawe eetagwa Zilipa.

²⁵Îndî rî, gwakea rûkîîrî Jakubu aroona atî nî Lea araeerwe. Arooria Labani atîrî, “Nîatîa ûranthithîîrie? Anga ni ntîrakûritagîra ngûgî nîkenda ûmpa Raeli? Nîmbi îndî îratûmîre ûmpayia?”

²⁶Labani aramwîra, “Tî wîthîre gweetû kweejana mwarî ûrîa mwanake mbere ya ûrîa mûkûrû.

²⁷Amba ûreke kiumia gîkî kîa mambura ja mûranû jwa ûu ûrî nawe gîkûrûke, naatuî tûgaakwaa ûu ûngî kinya we. Naagwe ûnditîre ngûgî mîaka îngî mûgwanja nîkenda ûmûjûkia.”

²⁸Jakubu arathithia o ûu. Arareka kiumia kîa mambura kîrakûrûka. Labani aramwaa Raeli araa mwekûrû waawe.

²⁹Ningî Labani araa Raeli mwarî ûrîa waamûritagîra ngûgî nîkenda aritagîra Raeli ngûgî. Nawe mwarî ûu eetagwa Biliha.

³⁰Jakubu aragûra Raeli araa mwekûrû waawe. Ningî Jakubu nî eendeete Raeli nkûrûki ya Lea. Nawe araritîra Labani ngûgî mîaka îngî mûgwanja.

³¹Rîrîa MWATHANI oonere ûrîa Lea aameni, nî aamûtharimîre na twaana, îndî Raeli aarî nthaata.

³²Lea aragîa îu, araciara kaîjî, arageeta Rubeni[19] akiugaga, “Gûtî nkaanja MWATHANI nî ooneete mathîîna jaakwa, na nandî mûkûrû waakwa agaampenda.”

³³Aracoka aragîa îu kaîrî araciara kaîjî, arageeta Simioni[20] arauga, “Gûtî nkaanja MWATHANI nî aigîîtue atî nî meni, na nîkîo gîtûmîte ampa ûûjû kinya we.”

³⁴Ningî aragîa îu kaîrî na araciara kaîjî. Arauga, “Rîu nîrîo mûkûrû waakwa akaarika kîrî ni nîûntû nî mûciarîrîte biîjî bithatû.” Tontû bûû, mwana ûu areetwa Lawi.[21]

³⁵Aracoka aragîa îu kaîrî na araciara kaîjî. Arauga, “Îgiita rîrî, nî MWATHANI ngûkumia.” Tontû bûû, areeta kaîjî kau Juda.[22] Kuuma rîu Lea aratiga kûgîa na twaana.