Read KIMERU BIBLE PROTESTANT EDITION Kîam 3 Bible Online

Kîam 3 - KIMERU BIBLE PROTESTANT EDITION bible

Kîam 3

¹ Njoka nî yaarî na ûûme bwa waayia nkûrûki ya nyamû ingî cionthe irîa MWATHANI Mûrungu oombîte. Nayo nî yoorîrie mûka atîrî, “Ee nîka Mûrungu abuîrîte, ‘Bûkororîa matuunda ja mûtî kinya jûrîkû jwa îrîa îrî muundeene jûjû?’”

²Mûka aramîcokeria atîrî, “Nî twîtîkîrîtue kûrîa matuunda ja mîtî yonthe îrîa îrî muundeene jûjû;

³îndî Mûrungu nî augîîte, ‘Bûkororîeni matuunda ja mûtî jûrîa jûrî gatîgatî ka muunda, ningî bûkarojûringithia bûtîkeeje gûkua.’”

⁴Îndî njoka îreera mûka atîrî, “Buî bûtîkua.

⁵Nîka Mûrungu aijî atî ntukû îrîa bûkaarîa matuunda ja mûtî jûu, meetho jeenu jakamincûka naabuî bûkare ta Mûrungu, bûmenyage mantû jameega na jamathûûku.”

⁶Mûka aroona atî mûtî jûu nî jwaarî jûmwega jwa kûrîîwa, na nî jwaarî jûmûthongi jûkîonwa, na nî jwaarî jwa kwirîrîîrua nîûntû bwa kweejanaga ûûme. Aratua îtunda rîa mûtî jûu ararîa na aratua rîngî aranekeeria mûkûrû waawe nawe ararîa.

⁷Rîu meetho jaao bobaîrî jaramincûnka, baramenya atî baarî kîthûnû. Nabo baratumania mabûûra ja mûkûû amwe, barathithia tûguû twa kwogeera kauna.

⁸Nabo nî baigîrue MWATHANI Mûrungu agîîtaîta muundeene rîrîa kûruraga; nawe muntû ûu na mûka waawe baraiciitha mîtîîne îrîa yaarî muundeene batîkoonwe nî MWATHANI Mûrungu.

⁹Îndî MWATHANI Mûrungu areeta muntû ûu, aramûûria, “Nîkû ûrî?”

¹⁰Muntû ûu aramûcokeria aramwîra, “Nîka ndaakwigua muundeene, ndaakîra, ndaiciitha, nîûntû ngûkarî kîthûnû.”

¹¹MWATHANI Mûrungu aramûûria, “Nûû ûkwîrîre ûrî kîthûnû? Nîka ûrîîre îtuunda rîa mûtî jûrîa ndaagûkaanîrie?”

¹²Muntû ûu arauga, “Mûka ûrîa gwe wampeere atûûranagia naani, nîwe ûnenkeere îtuunda rîa mûtî jûu, naani ndaarîa.”

¹³ Rîu MWATHANI Mûrungu arooria mûka atîrî, “Nîatîa ûjû ûthithîtie?” Mûka arauga, “Nî njoka împaîrîîrie, naani ndaarîa.”

¹⁴MWATHANI Mûrungu areera njoka ûjû, “Tontû bwa ûntû bûbû ûthithîtie, ûrî na kîrumi gwe kîrî nyomoo cionthe na nyamû cionthe. Ningî ûrîtua gwîtaga na kîu, na nî mûthetu ûkaarîîjaga matukû jonthe ja ûtûûro bwaaku.

¹⁵ Ngeekîra ûthû gatîgatî gaaku na mûka, na gatîgatî ka mbeeû yaaku na mbeeû ya mûka. Mbeeû ya mûka îgaakûringa kîongo, naagwe ûkaamîrûmaga gîtakino.”

¹⁶Rîu MWATHANI Mûrungu areera mûka atîrî, “Ngaakwingîîria rwakaî rwaaku ûkîewa mwana; ûkaagîîjaga twaana ûrî na rwakaî rûrûnene. Îndî kinya kûnarî ûu, ûkairîragîîria mûkûrû waaku, nawe agaakwathaga.”

¹⁷ Ningî MWATHANI Mûrungu areera Adamu ûjû, “Tontû nî ûrathikîrîîre nteto cia mwekûrû waaku, warîa îtunda rîa mûtî jûrîa ndaagûkaanîrie ndakwîra, ‘Ûkororîa îtunda rîa mûtî jûu,’ nandî nthî nî îndume nîûntû bwaaku. Ûrîtua kûrîîjaga into bia nthî biumanîtie na mînoga ntukû cionthe cia ûtûûro bwaaku.

¹⁸Miigua na nkonko bikaumaga nthîgûrû. Naagwe ûkaarîîjaga imera bia nthî.

¹⁹Ûrîtua kwonaga irio biaaku wambîte kûnoga, mwanka rîrîa ûgaacoka mûthetuune, nîkwîthîrwa nîku waaritîrwe. Tontû bûû, gwe ûrî mûthetu na nîku ûgaacoka.”

²⁰Adamu areeta mûka waawe Hawa,[1] tontû nîwe waarî ng'ina wa barîa bonthe barî mwoyo.

²¹MWATHANI Mûrungu aratumîra Adamu na mwekûrû waawe nguû cia mîgûûta arabeekîra.

²² Rîu MWATHANI Mûrungu arauga, “Atîrî, muntû aagûkara ta baatuî kîrî kûmenya wega na ûûî. Nandî oomba gwikia njara agatua îtunda rîa mûtî jwa mwoyo kinya ju, akarîa na agatûûra mwoyo kenya na kenya.”

²³Tontû bûû, MWATHANI Mûrungu arabenga kuuma muundeene jwa Edeni nîkenda beeta kûrîmaga nthî îrîa baaritîrwe.

²⁴Akûbeenga, nî eekîre akerubimu rûteere rwa gaiti rwa muunda jwa Edeni, barî na rûchiû rûgwakana mwanki. Naru rwagarûkaga nteere cionthe nîkenda rûkaria njîra ya gwîta mûtîîne jwa mwoyo.