Read KIMERU BIBLE PROTESTANT EDITION Kîam 30 Bible Online

Kîam 30 - KIMERU BIBLE PROTESTANT EDITION bible

Kîam 30

¹Rîrîa Raeli oonere atî we gûtî aana agûciara, nî aaigîrîîrue mwarî wa ng'ina rûriitho. Areera Jakubu atîrî, “Mpa aana, na këethîra gûtî bo, kaaba nkue.”

²Jakubu araakanwa nî mûthûûro nîûntû bwa Raeli, aramûûria, “Nîka ng'anene na Mûrungu ûrîa ûgwatîte aana?”

³Nîrîo Raeli aamwîrîre, “Atîrî, Biliha nthûûmba yaakwa îrî aja. Mûthengeere aciare aana nîkenda kinya ni mbona nchiarwa kuumania nawe.

⁴Tontû bûû, Raeli aranenkanîra Biliha, nthûûmba yaawe kîrî Jakubu, nawe Jakubu aramûthengeera.

⁵Biliha nî aagîîre îu na araciara kaîjî.

⁶Raeli arauga, Mûrungu akûngiitîra îgamba bwega; nî arathikîrîîre îromba rîaakwa, nawe ampa kaîjî.” Tontû bûû, arageeta Dani.[23]

⁷Biliha, nthûûmba ya mûka ya Raeli, îragîa îu kaîrî, araciara kaîjî kangî.

⁸Raeli arauga, “Nî ndwîte ndwaa înene na mwarî wa chiaa naani nkûûmbana.” Tontû bûû, areeta mwana ûu Nafutali.[24]

⁹Rîrîa Lea oonere atî aagûtiga kûgîa aana, nî aajûkîrie Zilipa, nthûûmba yaawe, aramînenkanîra kîrî Jakubu yee ta mûka waawe.

¹⁰Zilipa, nthûûmba ya Lea, araciarîra Jakubu kaîjî.

¹¹Lea arauga, “Nkwona munya.” Tontû bûû, areeta mwana ûu Gadi.[25]

¹²Zilipa, nî aaciarîre kaîjî kangî.

¹³Lea arauga, “Nî ngwîrîîtue, na rîu aka bangî bagaatua kûmbîtaga ûrîa ûgwîrîîtue.” Tontû bûû, areeta mwana ûu Asheri.[26]

¹⁴Îgiiteene rîrîa nkano ciaakethagwa, Rubeni nî eetîre aroona matuunda ja mîtî îrîa îtumagîrwa gûteetheria mûka kûgîa îu, araretera ng'ina Lea. Raeli areera Lea atîrî, “Itû ndûmia matuunda jamwe ja mîtî îîu mûtaana waaku aakûretera.”

¹⁵Îndî Lea aramûcokeria atîrî, “Ka ûkwona bûrî ûntû bûbûniini gûntuunya mûkûrû waakwa? Ningî no ûkwenda gûntuunya matuunda jarîa ndeteerwe nî mûtaana waakwa?” Raeli aramwîra atîrî, “Gûkëethîrwa nî ûu kûrî, raara na mûkûrû waaku ûtukû bwa naarua, naagwe ûndûmie matuunda jarîa ûreteerwe nî mûtaana waaku.”

¹⁶Rîrîa Jakubu aakinyîre ûgoro aumîte muundeene, Lea nî eetîre kûmûthagaana. Aramwîra atîrî, “No mwanka wîje ûraare naani, nîkwîthîrwa nî mma nî ngûkomborete na matuunda ja mîtî îrîa îtumagîrwa gûteetheria mûka agîa îu.” Jakubu aramûthengeera ûtukû bûu.

¹⁷Mûrungu nî aigîrue maromba ja Lea. Lea aragîa îu, na araciara kaîjî ga tûtaano.

¹⁸Lea arauga, “Mûrungu agûmpa îtuui nîûntû bwa ûrîa ndaanenkanîre nthûûmba yaakwa ya mûka kîrî mûkûrû waakwa.” Tontû bûû, Lea areeta mwana ûu Isakari.[27]

¹⁹Ningî Lea nî aagîîre îu kaîrî, na araciara kaîjî ga tûtaantatû.

²⁰Lea arauga, “Mûrungu agûmpa kîewa gîkîthongi. Nandî mûkûrû waakwa agaampa gîtîîo nîûntû bwa kûmûciarîra ataana batantatû.” Tontû bûû, Lea areeta mwana ûu Zebuloni.[28]

²¹Nyumeene, Lea nî aaciarîre mwarî, nawe aramwîta Dina.

²²Rîu nîrîo Mûrungu aaririkanîre Raeli, araigua maromba jaawe aratûma agîa na kaana.

²³Raeli aragîa îu na araciara kaîjî. Nawe arauga, “Mûrungu agûmpeberia rûmena.”

²⁴Raeli areeta mwana ûu Josefu[29] na arauga, “MWATHANI arompa mûtaana ûngî!”

²⁵Ningî nî gwakarîre atîrî, nyuma ya Raeli gûciara Josefu, Jakubu nî eerîre Labani atîrî, “Mbîtîkîîria nciîtîre, ncoke kûrîa ndaaumîre.

²⁶Mbîtîkîîria mbîte na eekûrû baakwa na aana baakwa nîûntû nî wiijî ngûgî îrîa nkûritîrîte nîûntû bwaabo ûrîa îng'ana.”

²⁷Labani aramwîra, “Ga nkwîre, nî ndorereetue ndaamenya atî MWATHANI antharimîte nîûntû bwaaku.

²⁸Uga ûrîenda mûchaara jûng'ana naani ngaakûnenkera.”

²⁹Jakubu nawe aramwîra, “Gwe gwengwa nî wiijî ûrîa ngûtumîkîrîte na ûrîa ndîîthia ciaaku ithegeete ndî nacio.

³⁰Nîkwîthîrwa waarî na into bibikai mbere ya mbîja, nabio nandî nî bingîîte mono. MWATHANI nî akûtharimîte mono kûrîa kunthe ndîreethagîrwa ndî. Îndî nandî rî, nîrî ni nkaaritîra nja yaakwa ngûgî?”

³¹Labani aramûûria, “Nîmbi ûkwenda nkwaa?” Jakubu aramûcokeria, “Gûtî kîo nkwenda ûmpa. Îndî weetîkîîria ûntû bûbû bunka, nkaarîîthia ng'ondu ciaaku na ncimenyeere kaîrî.

³²Nabu nî atîrî, reka mbîtanie na ndîîthia ciaaku cionthe naarua nkîathûraga ng'ondu irîa cionthe irî na maara na irîa irî na matûmba, na tûng'ondu tûrîa twirû tunthe, na mbûri irîa irî maara na irîa irî matûmba; iu ciee mûchaara jwaakwa.

³³Nyumeene rîrîa ûkaaraitha ndîîthia ciaakwa, ûkaamenya këethîra nî mbaragia ûûma. Kwëeja kwîthîrwa kûrî na mbûri itî na maara kana matûmba, gatîgatîîne ka mbûri ciaakwa, kana ng'ondu itî injirû, iu itarwe irî cia wamba.”

³⁴Labani aramwîra, “Nîu ni. Nî gûkare o ûu wauga.”

³⁵Îndî ntukû o îîu, Labani araathûra nthenge irîa ciaarî maara, na irîa ciaarî na matûmba. Ningî araathûra mparika irîa ciaarî na maara na matûmba na irîa njerû, na ng'ondu cionthe irîa ciaarî injirû. Iu cionthe arainenkanîra irîîthague nî ataana baawe.

³⁶Nawe arairitarita o araciikia kûraaja antû ta a rûgendo rwa ntukû ithatû kuuma arîa Jakubu aarî. Jakubu areeta na mbere kûrîîthia ndîîthia iu ingî cia Labani.

³⁷Jakubu nî aajûkîrie nturo imbîthî cia mûtarakwa na cia mûtî-mûciûku, na cia mûbaaû, araicaûra agîkûrûkagîra kûmwe nîkenda mîgîîra îmîeru yonekana.

³⁸Aracoka arabanga nturo iu aacaûrîte arîa nkongoro cia rûûjî ciaarî; Araciîka ûrîa ndîîthia iu ikethagîrwa cierekerete nturo iu rîrîa ikûbandana nîûntû ciabandanaga rîrîa cieeja kûnyua rûûjî.

³⁹Tontû bûû, ndîîthia nî ciabandanagîra mbere ya nturo iu nacio igîciara igaciaraga tûbûri na tûng'ondu tûrî na maara, na mîgîîra na matûmba.

⁴⁰Jakubu nawe nî aathûraga ng'ondu na mbûri irîa ciaciaragwa, nacio nyomoo iu ingî ikîbaandana agacierekeria kîrî ndîîthia ya Labani îrîa yaarî ya nyomoo irî na maara na injirû akî. Ûu nîu Jakubu aagîîre na ndîîthia yaawe îrîa aathûranaga na cia Labani, akarîîthia îrî yonka.

⁴¹O rîonthe rîrîa nyomoo irîa irî na inya ikûbandwa, Jakubu nî eekaga nturo ciaawe mbere ya nkongoro cia rûûjî arîa ndîîthia cieethagîrwa itegeete.

⁴²Îndî nyomoo irîa ikûbandwa irîngîîthîrwa itî na inya, Jakubu ateekaga nturo iu mbere yaacio. Tontû bûû, ndîîthia ya Labani nî yaaere ya nyomoo irîa itaarî na inya, nayo ndîîthia ya Jakubu îreethîrwa îrî ya nyomoo irîa ciaarî na inya.

⁴³Tontû bûû, Jakubu nî aatongere mono, aragîa na îthiû rîrînene na nthûûmba cia arûme na aka, na nkamîîra na ntigiri inyiingî.