Read KIMERU BIBLE PROTESTANT EDITION Kîam 31 Bible Online

Kîam 31 - KIMERU BIBLE PROTESTANT EDITION bible

Kîam 31

¹Jakubu nî aaigîrue ûrîa ataana ba Labani baaugaga atî, “Jakubu nî ajûkîtie into bionthe birîa biraarî bia baaba, na agîîte ûtonga bûbû bunthe kuumania na into bia baaba.”

²Ningî Jakubu aatega Labani ûthiû nî oonaga atî Labani atîkûgwîrua nîwe ta mbere.

³Nîrîo MWATHANI eerîre Jakubu atîrî, “Coka nthîgûrûûne ya biûjûjû bieenu, kîrî ndûgû cieenu, naani nkeethîrwa ndî amwe naagwe.”

⁴Tontû bûû, Jakubu aratûmanîra Raeli na Lea beeta bûûrîîne naarîa aarîthîtie.

⁵Nawe arabeera, “Nî nkwona atî nandî abaagu atîkûgwîrua nî ni ta mbere. Îndî Mûrungu wa baaba nî eethîîrîtwe arî amwe naani.

⁶Buî nî bwijî atî nî ntumîkîrîte abaagu na inya yaakwa yonthe,

⁷îndî amwe na bûu abaagu atwîre gûmpayia na nî anyiîtie mûchaara jwaakwa mainda îkûmi. Îndî Mûrungu ataareka anthithîria ûntû bûbûthûûku.

⁸Rîrîa auga atî, ‘Irîa irî maara nîcio ikaa mûchaara jwaaku,’ nyomoo cionthe iciaraga irîa irî maara. Rîrîa auga atî, ‘Irîa irî mîgîîra nîcio ikaa mûchaara jwaaku,’ nyomoo cionthe iciaraga irîa irî mîgîîra.

⁹Tontû bûû, Mûrungu nî atuunyîte abaagu ndîîthia ciaawe anenkera cio.

¹⁰Rîrîa ibandanaga nî ndaarootere ndîroona atî nthenge irîa ciabandaga mbûri nî irîa ciaarî maara na irîa ciaarî macûgû na irîa ciaarî matûmba.

¹¹Mûraîka wa Mûrungu nî aambîtîre ndî kîrootoone arauga, ‘Jakubu!’ Naani ndîrauga, ‘Ûûî!’

¹²Arambîîra ûjû. ‘Raithîria woone atî nthenge cionthe irîa ikûbanda mbûri nî irîa irî na mîgîîra, na irîa irî matûmba, na maara, nîkwîthîrwa nî mboneete mantû jarîa jonthe Labani agûkûthithîria.

¹³ Nî ni Mûrungu ûrîa wa Betheli, antû arîa weetûûrîîrie iiga maguta, arîa waanciîtîîrie mûciîtio. Nandî ûkîîra, uume nthîgûrûûne îîjî, ûcoke nthîgûrûûne îrîa waaciarîrwe.’”

¹⁴Raeli na Lea nabo baracokia bareera Jakubu atîrî, “Ga-kûrî îringa kana kiigai tûrî nakîo nja ya baaba?

¹⁵Anga atîtûtaraga tûrî ageni kwaawe nîûntû nî aatwenderie, na ararîa rûraacio rweetû?

¹⁶Ûtonga bunthe bûrîa Mûrungu atuunyîte baaba, amûtuunyîte nîûntû bweetû na bwa aana beetû. Nandî gwe, bûrîa bunthe Mûrungu akwîrîte ûthithie, thithia bu.”

¹⁷Jakubu nî ookîrîîre araitithia aana baawe na aka baawe mûgongo jwa nkamîîra.

¹⁸Ningî araringa nyomoo ciaawe cia ndîîthia cionthe areeta nacio, na arajûkia into biaawe bionthe birîa aarî akûgîa nabio arî kûu Padani-aramu, nîkenda acoka nthîgûrûûne ya Kanaani kîrî îthe Isaaka.

¹⁹Îgiita rîu, Labani nî aarî agwîta kwenja ng'ondu ciaawe, nawe Raeli araiya mîrungu ya mîng'uanano îrîa îthe eekîte nyomba.

²⁰Jakubu nî aaîrie Labani Mûaramu nîûntû ataamwîrîte këethîra nî akwenda kuuma kwaawe.

²¹Jakubu eetîre na into bionthe birîa aarî nabio, na arauna rûûjî rwa Eufurate, areeta bwa nthîgûrû ya irîma ya Gileadi.

²²Ntukû ya ithatû nîrîo Labani aamenyithîrue atî Jakubu nî areetîre.

²³Tontû bûû, arajûkia arûme ba nja yaawe areetania nabo rûgendo rwa ntukû mûgwanja eengeene na Jakubu. Nawe aramûgwatagwatîra nthîgûrû ya irîma ya Gileadi.

²⁴Îndî Mûrungu araumîîra Labani Mûaramu kîrootoone ûtukû aramwîra atîrî, “Imenyeere gwe, ûtîkeeje kwarîria Jakubu ûntû noo bûrîku, bûbwega kana bûbûthûûku.”

²⁵Rîu Labani aragwatagwata Jakubu. Jakubu aambîte maema jaawe nthîgûrû ya irîma, nawe Labani amwe na arûme ba nja yaawe baraamba maema jaao nthîgûrû o îîu ya Gileadi.

²⁶Labani arooria Jakubu atîrî, “Nîatîa ûthithîtie? Nîka ûkûmbitha mantû na ûgeeta na aarî baakwa ta antû batai ndweene?

²⁷Nîmbi îraatûmîre ûmpaayia ûmatûka na witho ûtîmbîîrîte? Anga ntîreejaga gûkuumagaria na kûgwîrua gûkûnene tûkiinaga ndwîmbo na tûkîringaga tamburini na inanda?

²⁸Nîmbi îratûmîre ûrega kûreka mpamba gûcûnca bajûûjû baakwa na aarî baakwa bagîîta? Bûbû nî waa ûthithîtie.

²⁹Ûûni ndî na inya ya gûkûthithîria bûbûûî. Îndî Mûrungu wa abaagu nî arambarîîrie ûtukû ambîîra, ‘Imenyeere gwe, ûtîkeeje kwarîria Jakubu ûntû noo bûrîkû, bûbwega kana bûbûthûûku.’

³⁰Gûtî ûntû-ni. Gwe nî ûreetîre nîûntû bwa ûrîa ûranyoonterete nja ya abaagu. Îndî nîkî ûraiyîre mîrungu yaakwa?”

³¹Jakubu aracokeria Labani aramwîra, “Nîka ndîrakîraga, nkîthûgaanagia atî woomba gûntuunya aarî baaku kwa inya.

³²Kwëethîrwa kûrî na muntû ûrî na mîrungu yaaku, akooragwa. Nandî gwe raitha këethîra kûrî gîntû gîaaku ndî nakîo antû baaku na baakwa bakîonaga, na wakîona, ûkîjûkie.” Jakubu akiuga ûu ataamenyaga këethîra Raeli nî aaiyîte mîrungu îîu.

³³Tontû bûû, Labani nî aatonyere îemeene rîa Jakubu, na aratonya îemeene rîa Lea, na aratonya îemeene rîa nthûûmba irîa ijîîrî, îndî araaga mîrungu îîu. Ningî auma îemeene rîa Lea nî aatonyere îemeene rîa Raeli.

³⁴Raeli nî aarî akûjûkia mîrungu ya mîng'uanano îrîa yeekagwa nyomba amîîka rungu rwa matandîko ja nkamîîra na amîkarîra. Labani aracwaa îemeene rîonthe na atîmîone.

³⁵Raeli areera îthe atîrî, “Menya ûthûûra nî ni mwathi waakwa woona ntîkûûmba gûûkîîra mbere yaaku, nîkwîthîrwa ndî na mweri.” Labani nî aacwîre bûbwega buru îndî atîone mîrungu îîu ya mîng'uanano îrîa eekaga nyomba.

³⁶Rîu Jakubu arathûûra, na aratetia Labani akîmwîraga, “Maatia jaakwa nî jarîkû? Nî meeyia jarîkû ndî najo jarîa jatûmîte wîngana naani ûjû?

³⁷Tontû nandî ûgûcwaa intoone biaakwa bionthe rî, nî gîntû kîrîkû woona ku gîa kuuma nja yaaku? Û gîîke aja mbere ya antû baakwa na baaku nîkenda batûgiitîra îgamba.

³⁸Mîaka mîrongo îîrî îrîa nkarîte gwaaku, gûtî rîo mîatî yaaku na mparika ciaaku ciauna, îndî ntaaraara ndîte ntûrûme ya ng'ondu ciaaku.

³⁹Ntaakûretera irîa cioragagwa nî nyamû; nî gûkûrîaa nkûrîaaga nîûntû gwe ûndîaagia cionthe, kinya ciëethîrwa ciîtwe mûthenya kana ûtukû.

⁴⁰Ûu nîu ntwîre. Ndaatindaga mpîîte nî riûa mûthenya na ûtukû nkaraara kûrîîwa nî mpio, ntîone kinya toro.

⁴¹Nkarîte gwaaku mîaka mîrongo îîrî, ndaakûritîra ngûgî mîaka îkûmi na îna nîkenda ûmpa aarî baaku bobaîrî, na mîaka îtaantatû nkîrîîthagia ndîîthia ciaaku. Îndî gwe ûnyiiîtie mûchaara jwaakwa mainda îkûmi.

⁴²Këethîra tî ûrîa Mûrungu wa baaba, tawe Mûrungu wa Abrahamu araarî rûteere rwaakwa, gûtî nkaanja gwe ûrîngî gûmpînga njara intheri. Îndî nîûntû Mûrungu nî ooneete mîthangîko yaakwa na ngûgî indito irîa nditîte nîkîo kîratûmîre agûkaania ûtukû bûrîa bûraathirîre.”

⁴³Labani nî aacokerie Jakubu aramwîra atîrî, “Aarî nî baakwa; aana nî baakwa; nyomoo cia ndîîthia nî ciaakwa, na kinya bingî bionthe birîa ûkwona nî biaakwa. Nîatîa mpûûmba kûthithîria aarî baakwa, kana aana baao?

⁴⁴Nandî ga tûthithie kîrîkanîro naagwe nakîo kîee ûkûûjî gatîgatî gaaku naani.”

⁴⁵Tontû bûû, Jakubu arajûkia iiga ararîrûngîka ta gîtugî, gîa kûbaririkanagia kîrîkanîro kîaao.

⁴⁶Ningî aracoka areera antû baawe atîrî, “Ûthûranieni maiga.” Nabo baroothûrania maiga barajathûmba kîthûmba, na bararîîra biakûrîa rûteere rwa kîthûmba kîu.

⁴⁷Labani areeta kîthûmba kîu Jegari-sahadutha,[30] îndî Jakubu aragîîta Galeedi.[31]

⁴⁸Labani arauga, “Kîthûmba gîkî nî ûkûûjî gatîgatî gaaku naani naarua.” Tontû bûû, aragîîta Galeedi

⁴⁹na ningî aragîîta Mizipa[32] arauga, “MWATHANI atûkaragie, gwe naani rîrîa tûkethagîrwa tûtîkwonana.

⁵⁰Gwe ûkëeja kûthangîkia aarî baakwa kana ûkëeja kûgûra aka bangî ûririkanage atî kinya këethîra gûtî muntû ûngî ûrî o, Mûrungu nîwe mûkûûjî gatîgatî gaaku naani.”

⁵¹Ningî Labani areera Jakubu atîrî, “Tega kîthûmba gîkî kîa maiga na ûtege gîtugî gîkî kîa iiga birîa ndeeka gatîgatî gaaku naani.

⁵²Kîthûmba gîkî na iiga rîrî nî ûkûûjî atî ntîkarobikûrûka mbîjîte ndeerîa ûrî, naagwe ûtîkarokûrûka kîthûmba gîkû kîa maiga na gîtugî gîkî kîa iiga wîjîte ndeerîa ndî, ûrî na ûthûûku.

⁵³Mûrungu wa Abrahamu, na Mûrungu wa Nahori tawe Mûrungu wa ba baaba arogambithia ûrîa ûkauna kîrîkanîro gîkî.” Jakubu araciîtia na riîtwa rîa Mûrungu ûrîa îthe Isaaka aathaathayia.

⁵⁴Ningî Jakubu araitia kîrîmeene na ararita kîgongwana na antû baawe nîkenda barîîra biakûrîa ku. Nabo bararîa biakûrîa na bararaara ûtukû bunthe kûu kîrîmeene.

⁵⁵Rûûneene rûkîîrî, Labani ararooka gûûcuunca aarî baawe na aana baao, na arabatharima, rîu aracoka nja kwaawe.