Read KIMERU BIBLE PROTESTANT EDITION Kîam 32 Bible Online

Kîam 32 - KIMERU BIBLE PROTESTANT EDITION bible

Kîam 32

¹Jakubu nî eetîre na mbere na rûgendo rwaawe, nabo araîka ba Mûrungu baratirimana nawe.

²Rîrîa Jakubu aaboonere arauga, “Îîjî nî njûûrî ya Mûrungu!” Tontû bûû, areeta antû au Mahanaimu.[33]

³Jakubu nî aatûmîre antû bareeta barî mbere yaawe kîrî mûtaana wa ng'ina Esaû kûu Seiri nthîgûrû ya Edomu.

⁴Arabeera atîrî, “Ûjû nîu bûkeera mwathi waakwa Esaû: ‘Nthûûmba yaaku Jakubu ariuga, ndîraarî ûgeniine kwa Labani na nî kwaawe ndîratûûraga mwanka nandî.

⁵Naani ndî na ng’ombe, na ntigiri, na mbûri na ng'ondu, na nthûûmba cia arûme na cia aka. Nandî nîka ndatûmana kîrî gwe mwathi waakwa nkûmenyithia nkîîja nîkenda wîthîrwa ûtî na ûthûûku naani.”

⁶Nabo antû barîa baatûmi baracoka kîrî Jakubu baramwîra, “Nî tûrakinyîre kîrî mûtaana wa nyakwe Esaû, nawe nî eejîte gûkûthagaana arî na antû magana jana.”

⁷Rîu Jakubu araigua ûguaa bûbûnene na arathangîka mono. Aragaania antû barîa aarî nabo, na aragaania mbûri, na ng'ondu, na ng'ombe ciaawe, na nkamîîra, areethîrwa arî na ikundi biîrî.

⁸Aathithîrie ûu akîthûgaanagia atî, “Esaû akëeja kwithûkîra gîkundi kîmwe agakîthiria, gîkundi kîu kîngî gîkaamatûka.”

⁹Jakubu arauga, “Itû gwe Mûrungu wa jûûjû Abrahamu, na Mûrungu wa baaba Isaaka; gwe MWATHANI ûrîa waambîîrîre, ‘Coka nthîgûrû yeenu kîrî antû beenu naani ngakûthithîria mantû jameega:

¹⁰Ûûni ntîagîrîte kinya aniini wa ûmbonia wendo bwaaku bûtîthiraga na gwîtîkîka kûrîa ûmbonetie ni nthûûmba yaaku. Nkiuna rûûjî rûrû rwa Jorodani nî rûturo rwaakwa runka ndaarî naru, îndî nandî nî mpeete ikundi biîrî.

¹¹Ndakûromba itû gwe ûmbonokie kuuma kîrî mûtaana wa chiaa Esaû. Tontû nî ngûkîra atûûraga twinthe; twaana amwe na ba ng’ina.

¹² Ningî gwe nî waugîre atî: Ngakûthithîria mantû jameega, na ngatûma nchiarwa ciaaku ciingîe o ta mûthanga jûrîa jûtîûmba gûtarîka.”

¹³Jakubu nî aaraarîre antû au ûtukû bûu. Ningî arathuura kîewa gîa kwaa mûtaana wa ng'ina Esaû kuuma kîrî into birîa aarî nabio.

¹⁴Arathuura mparika magana jaîrî (200) na nthenge mîrongo îîrî (20) na mîatî magana jaîrî (200) na ntûrûme mîrongo îîrî (20),

¹⁵na nkamîîra igûkamwa mîrongo îthatû (30) amwe na njaû ciaacio, na ng'ombe mîrongo îna (40), na ndeegwa îkûmi, na n (10) tigiri mîrongo îîrî (20) cia nka na îkûmi (10) cia ndûme.

¹⁶Aranenkera nthûûmba ciaawe nyomoo iu, o îthiû na bwaarîo. Ningî areera nthûûmba ciaawe atîrî, “Îtageeni bûrî mbere yaakwa na bûtigie twanya gatîgatî ka mathiû mwanya mwanya.”

¹⁷Jakubu araatha nthûûmba îrîa yaatongeeretie aramîîra, “Rîrîa ûgaatirimana na mûtaana wa chiaa Esaû, nawe akûûrie, ‘Ûrî waaû, na nîkû wîtîte, na nî ciaaû nyomoo iji irî mbere yaaku?’

¹⁸Gwe ûmwîre, ‘Nî cia nthûûmba yaaku Jakubu; nî kîewa kîrîa atûmanîrîte kîrî mwathi waakwa Esaû, na kinya we nî eejîte arî nyuma.’”

¹⁹Ningî Jakubu nî aathîre nthûûmba ya ijîîrî, o na ya ithatû, na kinya irîa ingî ciaringîte mathiû o ta ûu araciîra, “Bwatirimana na Esaû bûmwîre o ûu ndauga

²⁰na bûmwîre, ‘Kinya nthûûmba yaaku Jakubu arî nyuma yeetû.’” Jakubu aathithîrie ûu nîûntû bwa kûthûgaania atîrî, “Kwombîka nkamûboreria na kîewa kîrîa gîgeetaga kîrî mbere yaakwa tûgîkinya kwonana. Nawe oomba kûmbîtîkîra.”

²¹Tontû bûû, kîewa kîreetaga kîrî mbere ya Jakubu, nawe ûtukû bûu araraara kambîîne.

²²O ûtukû bûu, Jakubu nî ookîrîîre, arajûkia aka baawe bobaîrî, na nthûûmba cio-îjîîrî, na aana baawe îkûmi na ûmwe, barauna karûûjî ka Jaboki.

²³Arabajûkia arabaunia karûûjî kau, ningî araunia into birîa aarî nabio.

²⁴ Jakubu aratigwa arî wenka. Rîu muntû ûmwe areeja arakiinda na nawe mwanka kûrakea.

²⁵Rîrîa muntû ûu oonere atî aakûremwa nî Jakubu, nî aamûringîre nkunguro, nayo nkûnguro ya Jakubu îreenia.

²⁶Rîu muntû ûu arauga, “Reka mbîte nîûntû gûgûkîa.” Îndî Jakubu aramwîra, “Ntîkûrekeeria wîta tiga ûkantharima.”

²⁷Muntû ûu aramûûria, “wîtagwa atîa?” Nawe aramwîra, “Mbîtagwa Jakubu.”

²⁸ Muntû ûu aramwîra, “Ûtîkarîîtwa Jakubu kaîrî. Ûrîtua gwîtagwa Israeli, nîûntû nî ûkiindanîte na Mûrungu na wakiindana na antû, ûkîûmbanaga.”

²⁹ Jakubu areera muntû ûu atîrî, “Itû mbîîra riîtwa rîaaku.” Îndî muntû ûu aramûûria, “Nîmbi îgûtûma wenda kûmenya riîtwa rîaakwa?” Nawe muntû ûu aratharima Jakubu.

³⁰Jakubu areeta antû au Penieli,[34] arauga, “Nîkwîthîrwa nî mbonanîte na Mûrungu ûthiû kwa ûthiû na no ndî mwoyo.”

³¹Riûa nî rîaarî rîkuuma rîrîa Jakubu aaumîre au Penueli, nawe nî aathuaga nîûntû nkunguro yaawe nî yaarî îkweenia.

³²Kîu nîkîo gîtûmi antû ba Israeli batîrîîjaga nyama ya kûgûrû akuî na nkunguro mwanka naarua tûrî, nîûntû muntû ûu nî aaringîre Jakubu nkunguro.