Read KIMERU BIBLE PROTESTANT EDITION Kîam 33 Bible Online

Kîam 33 - KIMERU BIBLE PROTESTANT EDITION bible

Kîam 33

¹Jakubu nî aaciûkîrie meetho, na agîtega, aroona Esaû eejîte na antû magana jana. Tontû bûû, aragaania aana baawe kîrî Lea na Raeli na nthûûmba ciaawe cio-ijîîrî.

²Areera nthûûmba na aana baacio beetage barî mbere, barathingatwa nî Lea na aana baawe, nawe Raeli na Josefu bararigia.

³Jakubu nî eetîre abatongeeretie, akîînamagîîria mwanka nthî mainda mûgwanja, mwanka arakinya akuî na mûtaana wa ng'ina.

⁴Îndî Esaû areeta na rwîro aramûthagaana. Aramûkumbatîria, aramûcûnca, nabo bobaîrî bararîra.

⁵Rîrîa Esaû oonere aka na aana nî oorîrie atîrî, “Baba nî baaû?” Jakubu aramûcokeria, “Nî aana barîa Mûrungu antharimîte nabo.”

⁶Rîu nthûûmba amwe na aana baacio nî beetaîtîre akuî, na bareenamîîria mwanka nthî.

⁷Lea na aana baawe nî beetaîtîre akuî na bareenamîîria mwanka nthî. Ningî kinya Raeli na mûtaana waawe Josefu bareetaîta akuî, kinya bo bareenamîîria mwanka nthî.

⁸Rîu Esaû arooria, “Nî jambi mathiû jaja jonthe ndatirimana najo?” Jakubu aramûcokeria aramwîra atîrî, “Nî kîewa kîrî gwe nîkenda tûgîa na ngwatanîro naagwe.”

⁹Îndî Esaû aramwîra, “Ndî na into bia kûng'ana mûtaana wa chiaa. Reka birîa ûrî nabio bikare birî biaaku.”

¹⁰Jakubu aramwîra, “Itû arî. Këethîra nî ûkwona mbagîrîte nandî îtîkîîria kîewa gîaakwa. Tontû mboneete ûthiû bwaaku, nî teeka mboneete ûthiû bwa Mûrungu; nîûntû gwe ûkûnthagaana na wendo bûbwingî.

¹¹Itû îtîkîîria kûjûkia kîewa gîaakwa kîu waareeterwa, nîûntû Mûrungu nî antharimîte na ndî na into bia kûng'ana.” Aramûkinyîîria mwanka areetîkîîria gûkîjûkia.

¹²Rîu Esaû arauga, “Twîte nandî naani ngagûtongeeria.”

¹³Îndî Jakubu aramwîra, “Mwathi waakwa nî ûkûmenya aana batî na inya, na kûrî nyomoo ndî na cio igwonkia. Nacio ikëeja kwîngaîngwa ntukû îmwe akî, nyomoo cionthe nîka ikua.

¹⁴Mwathi waakwa îtaga ûrî mbere ya nthûûmba yaaku, naani amwe na aana baakwa na mathiû jaakwa twîjage mpaara tûkînogokagîîra mwanka tûkinye gwaaku Edomu.”

¹⁵Esaû arauga, “Reka-ni ngûtige na antû bamwe ba baba ndî nabo.” Îndî Jakubu aramwîra, “Gûtî na ûbatu bwa kûbatiga mwathi waakwa, îtîkîîria îromba rîaakwa.”

¹⁶Tontû bûû, ntukû îîu Esaû nî aagwatîre rûgendo rwa gûcoka Edomu.

¹⁷Îndî Jakubu areeta mwanka Sukothi[35] araaka nyomba ku na araakîra mathiû jaawe nkanata. Tontû bûû, antû au areetwa Sukothi.

¹⁸Jakubu nî aakinyîre arî thîîria ntûûreene ya Shekemu îrîa îrî nthîgûrûûne ya Kanaani aumîte Padani-aramu. Nawe araamba maema jaawe oome ya ntûûra îîu.

¹⁹ Nî aaritîre ichunchî îgana rîmwe (100) bia mbeecha,[36] na aragûra kîthaka kuuma kîrî nchiarwa cia Hamori ûrîa waarî îthe wa Shekemu. Nawe araamba maema jaawe ku.

²⁰Ningî nî aakîre kîritîro kîa igongwana antû au na aragîîta Eli-Elohi-Israeli.[37]