Read KIMERU BIBLE PROTESTANT EDITION Kîam 35 Bible Online

Kîam 35 - KIMERU BIBLE PROTESTANT EDITION bible

Kîam 35

¹ Mûrungu nî eerîre Jakubu atîrî, “Ithuranîre wîte Betheli ûgatûûre ku. Ningî wakinya ku waake kîritîro kîa igongwana nîûntû bwa Mûrungu ûrîa waacionanîrie kîrî gwe rîrîa waamatûkîte kuuma kîrî mûtaana wa nyakwe Esaû.”

²Jakubu nî eerîre antû ba nja yaawe na barîa bonthe baarî amwe nawe ûjû, “Teeni mîrungu mîgeni îrîa bûrî nayo, na bwitherie, na bûrite nguû irîa bwîkîrîte, bwîkîre ingî.

³Nyuma ya ûu, tûgaacoka twithuranîre twîte Betheli, mbîte ngaakîre Mûrungu ûrîa waambîtîkîre rîrîa ndaarî thîîneene kîritîro kîa igongwana nao. Mûrungu ûu nîwe wîthagîrwa arî amwe naani kûrîa kunthe mbîtaga.”

⁴Nabo baranenkera Jakubu mîrungu mîgeni yonthe îrîa baarî nayo, na kinya mina irîa beekîrîte matû. Jakubu arabithika mûthetuune rungu rwa muuru jûrîa jwaarî akuî na Shekemu.

⁵Rîrîa baambîrîîrie rûgendo, ûguaa bûbûnene kuuma kîrî Mûrungu nî bwagwatîre antû ba ntûûra irîa ciabathiûrûkîrîte, nabo bateengana na ataana ba Jakubu.

⁶Tontû bûû, Jakubu na antû bonthe barîa baarî amwe nawe nî baakinyîre Luzi, (na nîyo Betheli) nthîgûrûûne ya Kanaani.

⁷Nî aakîre kîritîro kîa igongwana o na areeta antû au Eli-betheli[38] nîûntû antû au nîo arîa Mûrungu aacionanîrîtie kîrî we rîrîa aamatûkîte kuuma kîrî mûtaana wa ng'ina.

⁸Debora mûmenyeeri wa Rebeka nî aakuîre na arathikwa rungu rwa muuru, gaiti ka Betheli. Nao antû au areetwa Aloni-bakuthi.[39]

⁹Rîrîa Jakubu aacokere kuuma Padani-aramu, Mûrungu nî aacionanîrie kîrî we kaîrî na aramûtharima,

¹⁰ aramwîra atîrî, “Gwe wîtagwa Jakubu, îndî ûtîcoka gwîtagwa Jakubu kaîrî. Kuuma nandî ûrîtua gwîtagwa Israeli.” Tontû bûû, Mûrungu aramwaa riîtwa aramwîta Israeli.

¹¹ Ningî Mûrungu nî aamwîrîre ûjû, “Nî ni Mûrungu Mweneinya: ciarana na ûthegee wee mûgongo. Kîrî gwe gûkauma mûgongo na mîgongo îmingî, na anene baayo bakauma bieroone biaaku.

¹²Ningî ngakwaa nthîgûrû îrîa ndaaere Abrahamu na Isaaka, na mîeejane kinya kîrî nchiarwa ciaaku.”

¹³Mûrungu ararima, arauma antû au aaragîria nawe.

¹⁴ Jakubu nî eenjîîre iiga ta gîtugî antû au Mûrungu aaragîria nawe. Ningî ararîîtûûrîria maguta.

¹⁵Ningî Jakubu nî aaere antû au Mûrungu aaragîria nawe riîtwa araeeta Betheli.[40]

¹⁶Nabo nî baaumîre Betheli bareeta na mbere na rûgendo rwaao. Nabo batigeerie kamûgiito kang'ana-ûna bakinya Efirathi, Raeli nî aakinyîrie îgiita rîaawe rîa kûgîa na mwana na areethîrwa arî na thîîna mono ûntûûne bûu.

¹⁷Rîrîa aarî thîîneene îîu ya kûgîa na mwana, mwîjûkia nî aamwîrîre atîrî, “Ûgákîra, nîûntû ûkweewa kaîjî kangî.”

¹⁸Îndî rî, Raeli nî gûkua aakuujaga. Nawe agîkua nî aaere mwana ûu riîtwa aramwîta Beni-oni.[41] Îndî îthe aramwîta Benjamini.[42]

¹⁹Rîrîa Raeli aakuîre, nî aathikîrwe rûteere rwa njîra ya gwîta Efirathi na nîyo Bethlehemu.

²⁰Jakubu nî eenjîîre iiga rîa kîririkano îgûrû rîa mbîrîra yaawe, rîrîa rîonanagia arîa mbîrîra ya Raeli îrî mwanka naarua tûrî.

²¹Jakubu aracoka arauma antû au areeta arakûrûka mûnaareene jwa Ederi, araamba îema rîaawe o.

²² Rîrîa Jakubu aatûûraga nthî îîu, mûtaana waawe Rubeni nî aathengereere Biliha mûka wa îthe wa gwîka. Rîrîa Jakubu aamenyere ûntû bûu arathûûra mono. Ataana ba Jakubu baarî îkûmi na baîrî.

²³Ataana ba Lea baarî: Rubeni (Ûrîa waarî mwana wa kîranga wa Jakubu) na Simioni na Lawi na Juda na Isakari na Zebuloni.

²⁴Nabo ataana ba Raeli baarî: Josefu na Benjamini.

²⁵Ataana ba Biliha ûrîa waarî nthûûmba ya Raeli baarî: Dani na Nafutali.

²⁶Ataana ba Zilipa ûrîa waarî nthûûmba ya Lea baarî: Gadi na Asheri. Bau nîbo ataana ba Jakubu barîa baaciarîri Padani-aramu na nîyo Mesopotamia.

²⁷ Jakubu nî aakinyîre kîrî îthe Isaaka kûu Mamure, akuî na Kiriathiaraba (na nîyo Heburoni), naarîa Abrahamu na Isaaka baatwîre.

²⁸Isaaka aatûûrîre mîaka îgana rîmwe rîa mîrongo înaana (180),

²⁹rîu arakua na arathikwa nî ataana baawe Esaû na Jakubu.