Read KIMERU BIBLE PROTESTANT EDITION Kîam 36 Bible Online

Kîam 36 - KIMERU BIBLE PROTESTANT EDITION bible

Kîam 36

¹Iji nîcio nchiarwa cia Esaû (na nîwe Edomu).

² Esaû aagûrîte aka Akanaani; nabo nî Ada mwarî wa Eloni ûrîa Mûhiti, na Oholibama mwarî wa Ana, ûrîa waarî mûtaana wa Zibeoni ûrîa Mûhivi,

³ na Basemathi mwarî wa Ishimaeli, na mwarî wa ng'ina wa Nebaiothi.

⁴Ada aaciarîre Elifazi; Basemathi nawe araciara Reueli.

⁵Oholibama nawe aaciarîre Jeushi na Jalamu na Kora. Bau nîbo ataana ba Esaû barîa baaciarîrwe nthîgûrû ya Kanaani.

⁶Esaû nawe nî aajûkîrie eekûrû na ataana na aarî baawe, na antû bonthe ba nja yaawe. Ningî arajûkia ndîîthia, na nyomoo iu ingî cionthe na into biaawe bionthe birîa aarî akûgîa nabio kûu nthîgûrû ya Kanaani. Areeta nthîgûrû îngî kûraaja na mûtaana wa ng'ina Jakubu.

⁷Aathaamîre nîûntû nthîgûrû îîu baatûûraga îtîngîûmba kûng'ania ndîîthia ciaawe na cia Jakubu nyaki nîûntû nî ciaingîi mono.

⁸Tontû bûû, Esaû (na nîwe Edomu) areeta gûtûûra nthîgûrû ya irîma ya Edomu.

⁹Iji nîcio nchiarwa cia Esaû, kîûjûjû kîa Aedomu barîa batûûraga nthîgûrû ya irîma ya Edomu.

¹⁰Jaja nîjo mariîtwa ja ataana ba Esaû: Elifazi mûtaana wa Ada ûrîa waarî mwekûrû wa Esaû, na Reueli mûtaana wa Basemathi ûrîa waarî mwekûrû wa Esaû.

¹¹Elifazi aarî na ataana bataano. Nabo nî: Temani na Omari na Zefo na Gatamu na Kenazi.

¹²Elifazi nî aarî na mûka wa gwîka Timina. Nawe araciara Amaleki. Iu nîcio ciaarî nchiarwa cia Ada, mwekûrû wa Esaû.

¹³Reueli aarî na ataana bana. Nabo nî: Nahathi na Zera na Shaama na Miza. Bau nîbo baarî ataana ba Basemathi, mwekûrû wa Esaû.

¹⁴Ataana ba Oholibama baarî Jeushi na Jalamu na Kora.

¹⁵Baba nîbo baarî atongeeria ba mîîrîga kîrî nchiarwa cia Esaû: Kuumania na Elifazi, mwana wa kîranga wa Esaû, kwaarî na atongeeria baba: Temani na Omari na Zefo na Kenazi,

¹⁶na Kora na Gatamu na Amaleki. Nabo antû bau baarî nchiarwa cia Ada.

¹⁷Baba nabo nî ataana ba Reueli mûtaana wa Esaû: nabo baarî atongeeria ba mîîrîga ya Nahathi na Zera na Shaama na Miza. Nabo antû bau baarî nchiarwa cia Basemathi mûka wa Esaû.

¹⁸Baba nîbo baarî ataana ba Oholibama, mûka wa Esaû: nabo baarî atongeeria ba mîîrîga ya Jeushi na Jalamu na Kora.

¹⁹Îîu nîyo mîîrîga îrîa yaaumanîrie na Esaû (na nîwe Edomu).

²⁰Baba nîbo ataana ba Seiri ûrîa Mûhori, barîa baarî atûûri ba nthîgûrû îîu kuuma kaumo: Lotani na Shobali na Zibeoni na Ana

²¹na Dishoni na Ezeri na Dishani. Bau nîbo baarî atongeeria ba mîîrîga ya Ahori barîa baarî nchiarwa cia Seiri nthîgûrûûne ya Edomu.

²²Mîîrîga îrîa yaaumanîrie na Lotani yaarî Hori na Hemani. Mwarî wa ng'ina wa Lotani aarî Timina.

²³Mîîrîga îrîa yaaumanîrie na Shobali yaarî Alivani na Manahathi na Ebali na Shefo na Onamu.

²⁴Ataana ba Zibeoni baarî Aia na Ana. Ana ûu nîwe ûrîa woonere ithima bia rûûjî rwa mwanki bûûrîîne arîîthîtie ntigiri cia îthe Zibeoni.

²⁵Aana ba Ana baarî Dishoni na mwarî weetagwa Oholibama.

²⁶Ataana ba Dishoni baarî Hemudani na Eshibani na Ithirani na Kerani.

²⁷Ataana ba Ezeri baarî Bilihani na Zaavani na Akani.

²⁸Ataana ba Dishani baarî Uzi na Arani.

²⁹Baba nîbo atongeeria ba mîîrîga ya Ahori: Lotani na Shobali na Zibeoni na Ana,

³⁰na Dishoni na Ezeri na Dishani.

³¹Mbere ya Israeli yambîrîîria kwaathwa nî anene, baba nîbo anene barîa baathanaga nthîgûrû ya Edomu:

³²Bela mûtaana wa Beori nî aaere mûnene wa Edomu. Nawe aathanaga arî ntûûreene ya Dinihaba.

³³Bela agûkua Jobabu mûtaana wa Zera kuuma Bozira nî aaere mûnene.

³⁴Jobabu agûkua Hushamu kuuma nthîgûrû ya Atemani araa mûnene.

³⁵Hushamu agûkua, Hadadi mûtaana wa Bedadi, ûrîa waaciindîre Amidiani nthîgûrûûne ya Moabu, nî aaere mûnene. Aathanaga arî ntûûreene ya Avithi.

³⁶Hadadi agûkua, Samula kuuma Masireka araa mûnene.

³⁷Samula agûkua, Shaulu kuuma Rehobothi îrîa yaarî rûteere rwa mûuro jwa Eufurate, nî aaere mûnene.

³⁸Rîrîa Shaulu aakuîre, Baalihanani mûtaana wa Akibori nî aaere mûnene.

³⁹Baalihanani mûtaana wa Akibori agûkua, Hadari araa mûnene. Nawe aathanaga arî ntûûreene ya Pau. Mwekûrû waawe eetagwa Mehetabeli mwarî wa Matiredi, Metiredi aarî mwarî wa Mezahabu.

⁴⁰Jaja nîjo mariîtwa ja atongeeria ba mîîrîga îrîa yaumanîtie na Esaû, kûringana na mîciî yaao, na mariîtwa ja gûntû kûrîa baatûûraga. Nabo baarî: Timina na Aliva na Jethethi,

⁴¹na Oholibama na Ela na Pinoni,

⁴²na Kenazi na Temani na Mibuzari,

⁴³na Magidieli na Iramu.