Read KIMERU BIBLE PROTESTANT EDITION Kîam 37 Bible Online

Kîam 37 - KIMERU BIBLE PROTESTANT EDITION bible

Kîam 37

¹Jakubu nî aatûûrîre nthî ya Kanaani, nthî îrîa îthe aatwîre mbereene arî mûgeni.

²Rûrû nîru rûgono rwa antû ba nja ya Jakubu: Josefu arî nthaka ya mîaka îkûmi na mûgwanja nî eetaga kûrîîthia mbûri na ng'ondu barî na ataana ba Biliha na Zilipa, barîa baarî aka ba gwîka ba îthe. Josefu nî eeraga îthe mantû jamathûûku jarîa ataana bau bangî baathithagia.

³Jakubu nî eendeete Josefu nkûrûki ya ataana baawe bonthe nîûntû aarî ûrîa aagîîre nawe arî ûmûkûrû. Nî aamûtumîîre rwambambio rûrûraaja na rûrûthongi.

⁴Îndî rîrîa ataana ba ng'ina boonere atî îthe nî eendeete Josefu nkûrûki yaao bonthe, nî baamûthûûrîre mono mwanka bararemwa nî kûmwaragîria bûbwega.

⁵Kûrî îgiita Josefu aarootere, nawe areera ataana ba ng'ina kîrooto kîu. Tontû bûû, bo baramûthûûra nkûrûki.

⁶Josefu arabeera, “Thikîîreeni mbwîre kîrooto kîrîa ndîrarootere:

⁷Kûrakarîre atîrî, rîrîa tûrakundîkaga imaanja bia nkano tûrî muundeene gatîgatî kîmaanja gîaakwa nî kîrookîrîîre na kîarûngama, nabio imaanja bieenu biakîthiûrûkîra na bienamîîria mbere ya kîmaanja gîaakwa.”

⁸Îndî ataana ba ng'ina barooria, “Nîka ûkwenda kwaa mûnene weetû na ûtwathe?” Nabo baramûthûûra kinya nkûrûki nîûntû bwa kîrooto kîaawe na nteto irîa aaugîre.

⁹Ningî Josefu nî aarootere kaîrî nawe areera ataana ba ng'ina. Arabeera atîrî, “Nî ndîrarootete kîrooto kîngî ndoona riûa, na mweri, na njota îkûmi na îmwe, bikîînamîîria mbere yaakwa.”

¹⁰Nî eerîre îthe kîrooto kîu, îndî îthe aramûgondokera aramûûria, “Nî kîrooto gîkari gîkî ûrootete? Nîka ûkwenda kuuga atî ûûni na nyakwe na ataana ba nyakwe tûkeeja kîrî gwe tûgûturîrie maru twînamîîrie mwanka nthî?”

¹¹ Ataana ba ng'ina nî baamwigîrîîrue rûriitho, îndî îthe areeka mantû jau nkoroone yaawe.

¹²Ntukû îmwe ataana ba ng'ina ba Josefu nî beetîre kûrîîthia mbûri na ng'ondu cia îthe nau Shekemu.

¹³Jakubu areera Josefu atîrî, “Njû ngûtûme kîrî ataana ba nyakwe barîa barîîthîtie kûu Shekemu.” Nawe aramwîra, “Nkwîja ntûma.”

¹⁴Îthe aramwîra atîrî, “Îta ûkoone këethîra ataana ba nyakwe barî thîîria na woone ûrîa ndîîthia îkari, ûcoke ûmbîîre.” Rîu arauma kûu mûgwanthî jwa Heburoni, areeta mwanka Shekemu.

¹⁵Muntû ûmwe aramwona agîtarataraga nau bûûrîîne, aramûûria, “Nîmbi ûgûcwaa?”

¹⁶Josefu aramwîra “Nî ataana ba chiaa ngûcwaa. Womba kûmbîîra naarîa barîîthîtie?”

¹⁷Muntû ûu aramwîra, “Nî baraumîre aja beeta, nîûntû nî ndîraigîrue bakiuga, ‘Twîteeni bwa Dothani.’” Tontû bûû, Josefu arathingatia ataana ba ng'ina, arabeethîra Dothani.

¹⁸Nabo baramwona arî kûraaja, na mbere ya akinya arîa baarî baraithuranîra kûmûûraga.

¹⁹Bareerana atîrî, “Tîwe ûu ûrîa ûrootaga irooto.

²⁰Tûmûûrageeni tûmwarûkie îrinyeene, na tuuge nî araarîrwe nî mbiti, twoone këethîra irooto biu biaawe bikaarîa.”

²¹Îndî Rubeni aigua ûu, arageria kûmwonokia batîkaamûûrage.

²²Rubeni arabeera atîrî, “Bûkámûûraga. Mwarûkieeni îrinyeene rîrî naaja rwanda.” Aabeerîre ûu nîkenda amwonokia kuuma kîrî bo na amûcokia kîrî îthe.

²³Naku kûrakara atîrî, rîrîa Josefu aakinyîre kîrî ataana ba ng'ina, nî baamûritîre rwambambio rûrîa eekîrîte.

²⁴Baracoka baramwarûkia îrinyeene. Îrinya rîu narîo rîtaarî na rûûjî.

²⁵Nabo nî baakarîre nthî kûrîa irio, na baaciûkia meetho baroona gîkundi kîa Aishimaeli baumîte Gileadi barî na nkamîîra ciaao ikamatîte into birîa biîkagîra irio mûrîo, na manemane, na into bingî bia goro, beetîte Misri.

²⁶Rîu Juda arooria ataana ba ng'ina atîrî, “Nîmbi tûkoona nîûntû bwa kûûraga mûtaana wa chiaa na kwithania gîkuû kîaawe?

²⁷Tûmwendieeni kîrî Aishimaeli, antû a tûmûûraga nîûntû nî mûtaana wa chiaa, na tûrî ba îthe ûmwe.” Nabo ataana ba ng'ina bareetîkîîria.

²⁸ Nabo Amidiani bau aringi-biashara nî bakûrûkîrîîte akuî, nabo ataana ba ng'ina ba Josefu baramûrita îrinyeene, baramwendia ichunchî mîrongo îîrî bia fetha kîrî Aishimaeli bau. Nabo Aishimaeli bau bareeta na Josefu mwanka Misri.

²⁹Rîrîa Rubeni aacokere au îrinyeene, areethîra Josefu atî ku. Nawe aratambûranga nguû ciaawe nîûntû bwa kwithikîîra.

³⁰Agûcoka kîrî ataana ba ng'ina arauga atîrî, “Mûthaka nî aûrîre! Nandî nîatîa nkaathithia?”

³¹Rîu barooraga mbûri na barajûkia rwambambio rûrîa rwa Josefu, bararûtombeka tharikeene.

³²Nabo baratûmanîra rwambambio rûu rûraaja rûraikua kîrî îthe, barauga eerwe atîrî, “Nîka twoja rwambambio rûrû. Rûraithe woone këethîra nî rwa mûtaana waaku.”

³³Îthe ararûmenya, na arauga, “Rûrû nî rwambambio rwa mûtaana waakwa! Nî araarîîrwe nî mbiti! Gûtî nkaanja Josefu rîu nî ûmûtaambuurange buru!”

³⁴Tontû bûû, Jakubu aratambûranga nguû ciaawe na aracioga ithango kauna, na arakara aithikîrîîte kagiita gakaraaja.

³⁵Ataana na aarî baawe bonthe bareeta kûmûboreria îndî ararega, arauga atîrî, “Kaaba ndiithikîîre mwanka nkue mbîname kîrî mûtaana waakwa kûu gwa akuû.” Tontû bûû, areeta na mbere kwithikîîra.

³⁶Amidiani nabo nî beetîre bareendia Josefu Misri kîrî Potifa, ûmwe wa nthûûmba cia Farao, ûrîa waarî mûrûngamîîri wa akaria ba Farao.