Read KIMERU BIBLE PROTESTANT EDITION Kîam 38 Bible Online

Kîam 38 - KIMERU BIBLE PROTESTANT EDITION bible

Kîam 38

¹Îgiita rîmwe, Juda nî aathûkanîre na ataana ba ng'ina areeta gûtûûrania na muntû ûmwe wa ntûûra ya Adulamu weetagwa Hira.

²Juda arî nao nî oonere mwarî Mûkanaani wa muntû weetagwa Shua, aramûgûra.

³Nawe aragîa îu, na araciara kaîjî, nawe Juda arageeta Eri.

⁴Ningî mûka ûu aragîa îu kaîrî, na araciara kaîjî, arageeta Onani.

⁵Ningî aragîa îu o kaîrî na araciara kaîjî, arageeta Shela. Juda aatûûraga Kezibu rîrîa mwekûrû waawe aaciarîre mwana ûu.

⁶Juda nî aagûrîîre Eri, mwana waawe wa kîranga, mûka weetagwa Tamari.

⁷Îndî mîîtîre ya Eri yaarî îmîthûûku na îtaagwîragia MWATHANI. Tontû bûû, MWATHANI aramûûraga.

⁸Juda areera Onani atîrî, “Îta ûthengeere ntigwa ya mûtaana wa nyakwe tontû nîu ûbuîrîte kûthithia ta mûtaana wa ng'ina, nîkenda mûtaana wa nyakwe oona mbeeû.”

⁹Îndî Onani nî aamenyaga atî mbeeû îîu îtîîthîrwa îrî yaawe. Tontû bûû, rîrîa rîonthe aatheengagîîra ntigwa îîu, aakinyia îgiita rîa kwiratha, agatûûra mbeeû yaawe nthî nîkenda ntigwa îîu îtîgîa îu, îciarîra mûtaana wa ng'ina twaana.

¹⁰Najo mantû jau Onani aathithagia nî jaathûûrîrie MWATHANI, na MWATHANI aramûûraga kinya we.

¹¹Rîu Juda areera Tamari ntigwa ya mûtaana waawe atîrî, “Gakare kwa abaagu ûrî ntigwa mwanka mûtaana waakwa Shela akûre.” Aamwîrîre ûu nîûntû nî aakîraga Shela eeja gûkua ta ataana ba ng'ina. Tamari nî eetîre gûkara nja ya îthe.

¹²Nyuma ya îgiita rîrîraaja, mûka wa Juda nî aakuîre. Rîrîa Juda aathirîrie ntukû ciaawe cia kwithikîîra, nî eetîre Timuna arî na mûcoore waawe Hira ûrîa Mûadulamu kîrî antû barîa beenjaga ng'ondu ciaawe guee.

¹³Muntû ûmwe nî eerîre Tamari atîrî, “Îthe o nthaka waaku nî eetîte Timuna kwenja ng'ondu ciaawe.”

¹⁴Tamari nî aaritîre nguû irîa ciekagîrwa nî ntigwa, aracoka araikunîka ûthiû na gîtambaa nîkenda atîkamenyeke. Areeta arakara nthî mwîrîga jwa ntûûra ya Enaimu, îrîa îrî njîreene ya gwîta Timuna. Tamari aathithîrie ûu nîûntû nî aarî akwona atî atîkûnenkanîrwa kîrî Shela aa mûka waawe, kinya këethîra Shela nî aarî agûkûra.

¹⁵Rîrîa Juda aamwonere, nî aathûgaanîrie atî nî mûmaraya nîûntû nî aaikunîkîte ûthiû.

¹⁶Tontû bûû, Juda araûkîîra kîrî we au rûteere rwa njîra aramwîra, “Nandî gwe, îtîkîîria tûthenganîîre.” Nawe ataamenyaga këethîra nî mûka wa mûtaana waawe akwarîria. Tamari aramûûria, “Nîmbi ûkaanenkera ndeetîkîîria?”

¹⁷Juda aramwîra, “Ngaagûtûmîra kabûri kuuma ndîîthieene ciaakwa.” Îndî Tamari aramûûria, “Kûrîkîo ûgaantigîra ngwatagîîra mwanka rîrîa ûgaantûmîra kabûri?”

¹⁸Juda aramûûria, “Nîmbi ûkwenda ngûtigîra?” Tamari aramwîra, “Nenkera mûkathî jûu jûrî na mûûri jwaaku, na mûregi jûu ûgwete.” Nawe aramûnenkera into biu. Juda aramûthengeera, nawe aragîa îu.

¹⁹Tamari nî aacokere nja kwa îthe. Ararita gîtambaa kîrîa aaikunîkîte nakîo ûthiû, areekîra nguû o irîa eekagîra cia kwonania atî nî ntigwa.

²⁰Juda nî aatûmîre Mûadulamu ûrîa mûcoore waawe aikia kabûri akîjûkia into birîa mûka aatigi nabio agwatîîrîte. Îndî atoonere mûka ûu.

²¹Tontû bûû, aroorithîria kîrî antû ba gûntû kûu arabooria, “Mûka mûmaraya ûrîa ûkaraga rûteere rwa njîra aja Enaimu arîkû?” Nabo baramwîra, “Gûtî mûmaraya weethîrwa arî gûkû.”

²²Tontû bûû, aracoka kîrî Juda aramwîra, “Ndîkûmwaga. Ningî antû ba gûntû kûu bariuga, ‘Gûtî mûmaraya weethîrwa arî gûkû.’”

²³Juda arauga atîrî, “Nî akare nabio u, menya twîja gwicambithia. Kinya gwe ûkwona ndîgûgûtûmîra kabûri gaka îndî wamwaga.”

²⁴Nyuma ya îgiita ta rîa mîeri îthatû, Juda nî aaerwe nteto areerwa atîrî, “Tamari mûka wa mûtaana waaku nî aringîte maraya na nandî arî na îu.” Juda ararita waatho arauga, “Muumagarieeni aaîîthîîrue mwanka akue.”

²⁵Îndî rîrîa Tamari aaumagaragua, nî aatûmanîre kîrî îthe o nthaka waawe akiugaga ûjû, “Mwene into bibi nîwe ûmbîkîrîte îu. Tegeeni mûkathî jûjû jûrî na mûûri, na mûregi jûjû bwoone këethîra bûkaamenya nî bia û.”

²⁶Juda nî aamenyere into biu na arauga atîrî, “Tamari nî akwaria ûûma nîkwîthîrwa ni ntaamûnenkanîre kîrî mûtaana waakwa Shela ta ûrîa ndaamwîrîte.” Juda ataacoka kûmûthengeera kaîrî.

²⁷Naku nî gwakarîre atîrî, îgiita rîaawe rîa kûgîa na mwana nî kwaamenyekanîre atî akeethîrwa arî na twaana twa maatha.

²⁸Rîrîa twaana tûu twaciaragwa, kamwe nî kaaritîre njara oome, nawe mwîjûkia arajûkia mûrigi jûmûtuune arajwogeera njareene îîu akiugaga, “Gaka nîko ka mbere gûciarwa.”

²⁹Îndî rî, karacokia njara bwa ndeene o rîo, nawe mûtaana wa ng'ina arauma arî mbere. Nawe mwîjûkia arauga, “Keke! Nîatîa woomba kuuma ûrî mbere!” Tontû bûû, kareetwa Perezi.

³⁰Nawe mûtaana wa ng'ina ûrîa waarî na mûrigi jûmûtuune njareene yaawe aracoka arauma, areetwa Zera.[43]