Read KIMERU BIBLE PROTESTANT EDITION Kîam 39 Bible Online

Kîam 39 - KIMERU BIBLE PROTESTANT EDITION bible

Kîam 39

¹Rîrîa Josefu aaikîrue Misri, nî aagûrîrwe kuuma kîrî Aishimaeli barîa beetîte nawe nao, nî Mûmisri weetagwa Potifa, ûmwe wa nchaama cia Farao, na nîwe waarî mûrûngamîîri wa akaria ba Farao.

² MWATHANI nî aarî amwe na Josefu, na nîûntû bûu Josefu araa muntû ûrî na ûûmbani mantûûne jonthe. Nawe aakaraga nja ya mwathi waawe ûu Mûmisri.

³Mwathi waawe nî oonere atî MWATHANI nî aarî amwe na Josefu, na atî MWATHANI nî aatûmaga oombana mantûûne jonthe jarîa aathithagia.

⁴Tontû bûû, areenda Josefu mono, na aramweethia nthûûmba yaawe ya kûmûmenyagîîra. Ningî araeethia Josefu mûrûngamîîri wa mantû ja nja yaawe na mûmenyeeri wa into biaawe bionthe.

⁵Kûrakara atîrî, kuuma rîrîa Potifa aaeetherie Josefu mûrûngamîîri wa mantû ja nja yaawe na mûmenyeeri wa into biaawe bionthe, MWATHANI nî aatharimîre nja ya Potifa na aratharima miuunda yaawe.

⁶Potifa araeethia Josefu mûrûngamîîri wa into biaawe bionthe na aratiga gûtindanîîra na mantû jegiî into biu tiga irio birîa aarîîjaga bionka. Josefu aarî muntû ûmwega na ûmûthongi mono.

⁷Nyuma ya îgiita rîrîkai mwekûrû wa mwathi waawe nî aambîrîîrie kûmwirîrîîria, aramwîra atîrî, “Nthengeera.”

⁸Îndî Josefu ararega, areera mwekûrû ûu atîrî, “Nî wiijî bwega atî mwathi waakwa gûtî ûntû atindanagîîra nabu bwegiî nja îîjî nîûntû ndî ku. Ningî nî aampeetherie mûmenyeeri wa into biaawe bionthe.

⁹Ndî na waathani ta bwa mwathi waakwa nja îîjî na gûtîkîo mwathi waakwa ambatîte tiga gwe. Ntîenda kûthithia ûntû bûbûthûûku ta bûu mbîîria Mûrungu.”

¹⁰Kinya këethîra mwekûrû ûu nî aakaraga akîîraga Josefu mantû jau o ntukû o ntukû, Josefu ateetîkîîria kûmûthengeera kana gûkara antû amwe nawe.

¹¹Îndî ntukû îmwe kûrakara atîrî, Josefu nî aakûrûkîre nyomba kûrita ngûgî ciaawe, na gûtî mûriti ngûgî wa nja îîu waarî nyomba ndeene.

¹²Mûka wa Potifa nî aagwatîre nguû ya Josefu aramwîra, “Gaûkanthengeera!” Îndî Josefu araithonokia araumagara na rwîro, nayo nguû yaawe îratigwa njareene cia mûka ûu.

¹³Rîrîa oonere atî Josefu aakûmatûka aumagara amûtiga agwete nguû,

¹⁴mûka ûu nî eetîre ariti-ngûgî ba nja yaawe arabaarîria akîbeeraga atîrî, “Oneeni! Tûrareteerwe Mûhibirania nîkenda eeja gûûtwîkîrithia nthao! Agûntonyeereete nyomba akîenda kûnthengeera kwa inya, îndî ndauga mbu.

¹⁵Nawe akwigua ndauga mbu, aumagara na rwîro aatiga nguû yaawe arîa ngûkarî.”

¹⁶Mûka ûu nî aakarîre na nguû îîu mwanka rîrîa mwathi wa Josefu aakinyîre nja.

¹⁷Rîu aramwaa nteto o iu ciongwa, aramwîra atîrî, “Nthûûmba ya Mûhibirania îrîa ûratûreteere nî îgûntonyeereete îkîendaga kûmbagîra nthoni.

¹⁸Îndî rîrîa iigîrue ndauga mbu, yaumagara na rwîro yatiga nguû yaayo arîa ngûkarî.”

¹⁹Kûrakara atîrî, rîrîa mwathi wa Josefu aaigîrue nteto iu mwekûrû waawe aamweere nî aathûûrîre mono.

²⁰Tontû bûû, aragera Josefu ncheera kûrîa barîa beeagîria mûnene baaingagîrwa.

²¹ Îndî kinya arî ncheera, MWATHANI nî eethagîrwa arî amwe nawe akîmwonagia kîaao kîaawe kîrîa gîtîthiraga. MWATHANI nî aatûmîre Josefu eendwa nî mûrûngamîîri wa ncheera,

²²mwanka mûrûngamîîri ûu aramweethia mûrûngamîîri wa abuungwa bonthe barîa baarî ncheera na aramweethia mûrûngamîîri wa mantû jonthe jarîa jaathithagua kûu ncheera.

²³Mûrûngamîîri ûu wa ncheera ataatindanagîîra na ûntû noo bûrîkû bwa jarîa jeethagîrwa jarî ûmenyeerine bwa Josefu nîûntû MWATHANI nî aarî amwe na Josefu, na ûntû bunthe bûrîa Josefu aathithagia MWATHANI nî aatûmaga bwîthîrwa bûrî bûbwega.