Read KIMERU BIBLE PROTESTANT EDITION Kîam 4 Bible Online

Kîam 4 - KIMERU BIBLE PROTESTANT EDITION bible

Kîam 4

¹Adamu nî aathengereere mwekûrû waawe Hawa, aragîa îu na araciara Kaini. Hawa arauga atîrî, “MWATHANI agûnteethia ndaciara kaîjî.”

²Ningî Hawa araciara Abeli, mûtaana wa ng'ina wa Kaini. Abeli araa mûrîîthi wa ng'ondu nawe Kaini araa mûrîmi.

³Nyuma ya kagiita mma, Kaini nî aaikîîrie MWATHANI kîgongwana kîa maciara ja muunda.

⁴ Kinya Abeli nî aaikîrie kîgongwana kîa marikithathi ja nyomoo ciaawe cia ndîîthia na mathuunya jaacio. MWATHANI areetîkîra Abeli na kîgongwana kîaawe,

⁵îndî ataatindanîra na Kaini na kîgongwana kîaawe. Tontû bûû, Kaini arathûûra mono na ûthiû bwaawe bûraikithara.

⁶MWATHANI arooria Kaini atîrî, “Nîmbi wathûûrîra ûjû na nîmbi yatûma ûthiû bwaaku bwikithara?

⁷Ûkëeja kûthithia bwega ndeetîkîîria kîgongwana gîaaku. Ningî ûkärega kûthithia bwega, meeyia jarî akuî naagwe na nî jakwenda gûkwatha, îndî ûbuîri nî kûjoomba.”

⁸ Kaini nî eerîre mûtaana wa ng'ina Abeli atîrî, “Njû twîte tûkariûnge kîeniine.” Nabo rîrîa baarî kîeniine, Kaini araumbuthûkîra mûtaana wa ng'ina Abeli, aramûûraga.

⁹Rîu MWATHANI arooria Kaini atîrî, “Mûtaana wa nyakwe Abeli arî kû?” Kaini arauga, “Ntiijî ni! Ka-ndî mûkaria wa mûtaana wa chiaa?”

¹⁰ MWATHANI aramwîra atîrî, “Nîatîa ûû wathithia? Tharike ya mûtaana wa nyakwe nî îgûnkaîra îrî mûthetuune.

¹¹Nandî gwe ûrî ûmûrume na nî wîngi kuuma mûthetuune jûrîa jwanyua tharike ya mûtaana wa nyakwe ûrîa wooraga.

¹²Nthîgûrû îtîcoka kuuma gîntû kaîrî kinya warîma. Gwe ûkethagîrwa ûtî na gîkaro, na ûrî mbereera nthîgûrûûne.”

¹³Kaini areera MWATHANI atîrî, “Îkanûkia rîaakwa rîkûneenea nkûrûki ya ûrîa mpûûmba kûûmîîria.

¹⁴Nandî, gwe naarua ûgûmpînga kuuma nthîgûrûûne, ndaumauma kîrî gwe, ndeeta kwaa muntû ûtî gîkaro na mbereera nthîgûrûûne. O muntû ûrîa ûkaambona nîka akaambûraga.”

¹⁵Rîu MWATHANI aramwîra atîrî, “Arî, gûtîkara ûu! Muntû ûrîa ûkooraga Kaini agaakanûkua mainda mûgwanja.” MWATHANI nî eekîîre Kaini rwano nîkenda atîkeeje kûûragwa nî muntû kinya ûrîkû ûrîa ûkaamwona.

¹⁶Tontû bûû, Kaini araciîtîra arauma meethoone ja MWATHANI areeta gûtûûra nthîgûrû ya Nodi[2] bwa gaiti ya Edeni.

¹⁷Kaini nî aathengereere mwekûrû waawe, aragîa îu na araciara mwana weetagwa Enoki. Kaini aracoka araaka ntûûra, aramîîta riîtwa rîa mûtaana waawe tarîo Enoki.

¹⁸Enoki nîwe waarî îthe wa Iradi, na Iradi nîwe waarî îthe wa Mehujaeli, na Mehujaeli nîwe waarî îthe wa Methushaeli, nawe Methushaeli nîwe waarî îthe wa Lameki.

¹⁹Lameki aragûra aka baîrî; ûmwe ûgwîtwa Ada na ûngî ûgwîtwa Zila.

²⁰Ada araciara Jabali. Jabali nîwe waaere îthe wa antû barîa baatûûraga maemeene barî arîîthi.

²¹Mûtaana wa ng'ina eetagwa Jubali na nîwe waaere îthe wa barîa baaringaga wandîîndî na mîtûrirû.

²²Zila araciara Tubali-kaini. Tubali-kaini nîwe waarî mûturi wa into bia mîthemba yonthe bia îturutia na bia chuuma. Mwarî wa ng'ina wa Tubali-kaini eetagwa Naama.

²³Lameki nî eerîre eekûrû baawe ûjû, “Buî Ada na Zila, thikîîreeni ûrîa nkuuga; buî eekûrû baakwa igueeni nteto ciaakwa: Ndîkûûraga muntû ûmwîthî tontû bwa kûmbîkîra rûgûma.

²⁴Këethîra Kaini akaarîîrua mainda mûgwanja, Ûrîa ûkaambûraga ni Lameki akaarîua mainda mîrongo mûgwanja na mûgwanja.”

²⁵Adamu nî aathengereere mwekûrû waawe kaîrî, na araciara kaîjî, arauga atîrî, “Mûrungu agûmpa mûtaana ûngî antû a Abeli ûrîa Kaini ooragîre.” Tontû bûû, arageeta Sethi.

²⁶Sethi aagîîre na kaîjî arageeta Enoshi. Îgiita rîu nîrîo antû baambîrîîrie kûthaathayia MWATHANI.