Read KIMERU BIBLE PROTESTANT EDITION Kîam 40 Bible Online

Kîam 40 - KIMERU BIBLE PROTESTANT EDITION bible

Kîam 40

¹Nyuma ya îgiita rîng'ana-ûna nî gwaakarîre atîrî, mûmenyeeri ndibei wa mûnene na mûrugi mîgaate ya mûnene nî baatîîrie mwathi waao, tawe mûnene wa Misri.

²Farao nî aathûûrîre nî nthûûmba iu ciaawe cio-ijîîrî.

³Tontû bûû, arabaiingîrithia nyomba ya mûrûngamîîri wa akaria, o kûrîa Josefu aarî ncheera.

⁴Nawe mûrûngamîîri wa akaria nî aaeetherie Josefu mûmenyeeri wa antû bau. Nabo baakaranga ncheera mma.

⁵Ûtukû bûmwe antû bau bobaîrî, tabo: mûmenyeeri wa ndibei na mûrugi wa mîgaate, nî baarootere o muntû kîrooto kîaawe, na o kîrooto nî kîaarî na ûrîa kîaugaga.

⁶Josefu nawe nî eetîre kîrî bo rûkîîrî na aabaraithîria, aroona kûrî ûntû bûkûbathangîkia.

⁷Tontû bûû, arooria nthûûmba iu ciaarî ncheera amwe nawe atîrî, “Nîmbi îgûtûma bwonekana bûrî na kwithikîîra naarua?”

⁸Nabo baramwîra atîrî, “Nî tûraarootere, na tûtîkwona wa gûtûtaûrîra.” Josefu arabeera atîrî, “Uga ûtaûri tî kîrî Mûrungu buumaga? Buî mbîîreeni bio.”

⁹Tontû bûû, mûmenyeeri wa ndibei areera Josefu kîrooto kîaawe, aramwîra atîrî, “Kîrootoone gîaakwa ndîroonere mûzabibû jûrî mbere yaakwa,

¹⁰naju mûzabibû jûu jûraarî na mpang'i ithatû. Naju nî jûraumîre mabûûra, na jwaraa na nzabibû ciagunda o rîo.

¹¹Ni ndîragwete gîkombe gîa Farao na ndatua nzabibû iu ndaainyîîra rûûjî rwaacio gîkombeene kîa Farao, ndamûnenkeeria kîo.”

¹²Rîu Josefu aramwîra atîrî, “Bûbû nîbu ûtaûri bwaakîo: mpang'i iu ithatû nî ntukû ithatû.

¹³Ntukû ithatû ikîthira, Farao agaakûrita ncheera, agûcokie ngûgîîne yaaku. Naagwe ûgaacoka kûnenkagîîria Farao gîkombe o ta ûrîa waatwîre ûthithagia rîrîa waarî mûmenyeeri ndibei waawe.

¹⁴Îndî mantû jaaku jaabua, ûndirikane. Ûmbigîîrue kîaao na ûngweete kîrî Farao, nîkenda mpuuma nyomba îîjî.

¹⁵Nîkwîthîrwa kwaria mma nîka ndaaiîrwe kuuma nthîgûrû ya Ahibirania, na ningî gûtî ûntû ndaathithîtie gûkû bwa gûtûma mpiingîrwa ncheera.”

¹⁶Mûrugi wa mîgaate aigua ûrîa ûtaûri bûu bwaarî bûbwega, nî eerîre Josefu atîrî, “Kîrootoone gîaakwa kinya ni ndîroonere ikabû bithatû birî mûtwe jwaakwa.

¹⁷Ningî gîkabûûne kîrîa kîraarî îgûrû rîa biu bingî nî kîraarî na mîgaate ya mîthemba yonthe îrîa îrugagîrwa Farao. Îndî nyoni nî iramîrîîjagîra gîkabûûne kîrî mûtwe jwaakwa.”

¹⁸Rîu Josefu aramwîra atîrî, “Bûbû nîbu ûtaûri bwaakîo: ikabû biu bithatû nî ntukû ithatû.

¹⁹Ntukû ithatû ikîthira, Farao agaakûrita ncheera agûcuurie mûtîîne, nacio nyoni ikaarîa nyama cia mwîrî jwaaku.”

²⁰Ntukû ya ithatû kuuma rîu nîyo yaarî ya gûkûngûîra ntukû îrîa Farao aaciarîrwe. Tontû bûû, arathithîria nthûûmba ciaawe cionthe kîatho. Nawe ararita mûmenyeeri wa ndibei ncheera na ararita mûrugi wa mîgaate ncheera amwe na nthûûmba ciaawe ingî.

²¹Farao aracokia mûmenyeeri wa ndibei ngûgîîne yaawe, na aracoka kûmûnenkagîîria ndibei.

²²Ningî aracuurithia mûrugi wa mîgaate o ta ûrîa Josefu aarî akûbataûrîra irooto.

²³Îndî mûmenyeeri wa ndibei nî oorîîrue nî Josefu na ataatindanîra kûthûgaania bwaawe.