Read KIMERU BIBLE PROTESTANT EDITION Kîam 41 Bible Online

Kîam 41 - KIMERU BIBLE PROTESTANT EDITION bible

Kîam 41

¹Naku nî gwakarîre atîrî, nyuma ya îgiita rîa mîaka îîrî, Farao nî aarootere akîonaga arûngi rûteere rwa mûuro jwa Naili.

²Aroona ng'ombe mûgwanja ciumîte rûûjîîne. Nacio ciaarî inthongi na inoru, nacio iraambîrîria kûrîa nyaki.

³Rîu aroona ng'ombe ingî mûgwanja inceng'u ciumîte mûuroone, nacio irarûngama rûteere rwa iu ingî au rûteere rwa mûuro jwa Naili.

⁴Nacio ng'ombe iu nceng'u irarîa ng'ombe irîa ciaarî inthongi na inoru. Rîu Farao nawe arookîîra.

⁵Îndî aracoka aragwatwa nî toro kaîrî na araroota kîrooto kîngî. Aroona biongo mûgwanja bia nkano bikiuma rûbueene rûmwe. Nabio biaciere bwega na biaarî bibithongi.

⁶Aracoka aroona biongo bingî mûgwanja bia nkano bikiuma. Nabio biaarî bibiceke na bibionju bithûûkîtue nî ruuo rwa bwa gaiti.

⁷Nabio biongo biu biceke nî biaamererie biu bithongi. Farao nawe arookîîra, aramenya nîka akûrootaga.

⁸ Gwakea rûkîîrî, Farao areethîrwa athangîkîte mono nkoroone yaawe. Aratûmanîra aringi-biama na antû barîa boome bonthe ba Misri. Farao arabeera irooto birîa aarootete, îndî kûraaga muntû wa kûmûtaûrîra bio.

⁹Nîrîo mûmenyeeri wa ndibei aarîîrie Farao aramwîra atîrî, “Naarua nîrîo ndaaririkana maatia jaakwa.

¹⁰Kûrîrîo Farao aathûûrîtue nî nthûûmba ciaawe nawe arampingîra ncheera amwe na mûrugi wa mîgaate nyomba ya mûrûngamîîri wa akaria.

¹¹Naatuî kûrî ûtukû bûmwe nî twaarootere tu-baîrî, o muntû araroota kîrooto kîaawe, na o kîrooto kîreethîrwa kîrî na ûrîa kîaugaga.

¹²Kûrî mûthaka Mûhibirania waarî amwe naatuî, nawe aarî nthûûmba ya mûrûngamîîri wa akaria. Naatuî nî twamwîrîre irooto bieetû nawe aratûtaûrîra; arataûrîra o muntû kîrooto kîaawe kûringana na ûrîa kîethagîrwa gîkari.

¹³Ningî o ûrîa ungwa aatûtaûrîrîte, nîu gwakarîre; ndîracokua ngûgîîne yaakwa, nawe mûrugi wa mîgaate aracuurua.”

¹⁴Tontû bûû, Farao nî aatûmanîîre Josefu, araritwa ncheera na mpwîî. Nawe areenjwa na areekîra nguû ingî, areeta kîrî Farao.

¹⁵Farao areera Josefu atîrî, “Nî ndooteete kîrooto îndî gûtî muntû ûkûûmba gûgîtaûra. Naani nî menyithîtue mantû jaaku ndeerwa atî ûkeerwa kîrooto no ûgîtaûre.”

¹⁶Josefu aracokeria Farao aramwîra atîrî, “Na bwaakwa ntîûmba, Mûrungu nîwe ûgaagûcokeria îcokio rîrîng'anu.”

¹⁷Rîu Farao areera Josefu atîrî, “Kîrootoone gîaakwa rî, ndîracionere ndûûngi rûteere rwa mûuro jwa Naili.

¹⁸Naani ndoona ng'ombe mûgwanja ciumîte mûuroone. Nacio iraarî inoru na inthongi, na nî iraambîrîîrie kûrîa nyaki.

¹⁹O rîo, ndoona ng'ombe ingî mûgwanja ciumîrîte ithingatîte iu cia mbere. Nacio îraarî inceng'u mono. Ntoona ng'ombe inceng'u ta iu nthîgûrûûne yonthe ya Misri.

²⁰Nacio ng'ombe iu nceng'u nî irarîîre irîa mûgwanja cia mbere inoru.

²¹Îndî kinya rîrîa irarîîre ng'ombe iu noru, itîroonekaga teeka kûrî gîntû irîte. Cionekaga irî inceng'u o ta mbere. Rîu nîrîo ndîrookîrîîre.

²²Ningî ndî kîrootoone nî ndîroonere biongo mûgwanja bia nkano bikiuma rûbueene rûmwe. Nabio nî biraciere bwega na biraarî bibithongi.

²³Ningî ndacoka ndoona biongo bingî mûgwanja bia nkano bikiuma. Nabio biraarî bibiceke na bibionju bithûûkîîtue nî ruuo rwa bwa gaitî.

²⁴Nabio biongo biu biceke nî biramererie biu mûgwanja bibithongi. Naani nî mbîîrîte aringi-biama, îndî gûtî we ûroomba gûntaûrîra.”

²⁵Nawe Josefu nî eerîre Farao atîrî, “Irooto biu biaaku birî na mworoto jûmwe. Nîka Mûrungu agûkwîra ûrîa arî akuî kûthithia.

²⁶Ng'ombe iu nthongi mûgwanja nî mîaka mûgwanja, na biongo biu mûgwanja bibithongi bia nkano birîrûngamîîra mîaka mûgwanja. Tontû bûû, irooto biu birî na mworoto jûmwe.

²⁷Nacio ng'ombe iu mûgwanja inceng'u, irîa iraumîîre mûuroone ithingatîte ingî, na biongo biu mûgwanja bia nkano bitîciere bwega na bithûûkîîtue nî ruuo rwa bwa gaiti, birîrûngamîîra mîaka mûgwanja ya mpara.

²⁸O ta ûu ndaarîîkia kwîra Farao, nîka Mûrungu agûkwîra ûrîa arî akuî kûthithia.

²⁹Gûkeethîrwa kûrî na mîaka mûgwanja ya nyiro înene kunthe nthîgûrûûne ya Misri.

³⁰Îndî nyuma yaayo gûkeethîrwa kûrî na mîaka îngî mûgwanja ya mpara înene. Nayo mpara îîu îkaaneenea mono kunthe nthîgûrûûne ya Misri mwanka antû boorîrue nî nyiro îrîa beerîga.

³¹Nyiro îtîririkanîka nîûntû bwa ûrîa îkaathingatwa nî mpara îîu înene.

³²Nakîo gîtûmi Farao araarootere irooto biîrî birî na mworoto jûmwe, nîûntû Mûrungu nî athirîtie gûtua atî ûu nîu gûgaakara, na akathithia ûntû bûu nyuma ya kagiita gaagakai.

³³Rîu bûrîa ûbuîrîte kûthithia nî atîrî, thuura muntû ûmûûme na ûgûciûkîrwa nî mantû, ûmweethie mûrûngamîîri wa nthîgûrû ya Misri.

³⁴Ningî ûthuure atongeeria nthîgûrûûne kunthe, na ûbae ngûgî ya kûûthûrania gîchunchî kîmwe kîrî bitaano bia maketha ja nthîgûrû ya Misri mîakeene îîu mûgwanja ya nyiro.

³⁵Tontû bûû, boothûranie irio bionthe bia mîaka îrîa îîjîte îmîega, nabio biîkwe bwega ntûûreene birî waathoone bwaaku.

³⁶Nabio irio biu bigeekwa birî mûthithû bieteere mpara îrîa îkeeja nthîgûrûûne ya Misri ya mîaka mûgwanja, nîkenda nthîgûrû îtîkaathirue buru nî mpara.”

³⁷Farao na atongeeria baawe bonthe nî boonere ûntû bûu bûrî bûbwega.

³⁸Farao arooria atongeeria baawe atîrî, “Gatûûmba kwona muntû ûngî ta ûûjû; muntû ûrî na Roho wa Mûrungu ndeene yaawe?”

³⁹Tontû bûû, Farao areera Josefu atîrî, “Nîkwîthîrwa nîgwe Mûrungu aguûrîrîte mantû jaja jonthe rî, gûtî muntû ûngî ûûmba kwîthîrwa arî ûmûûme na ûgûciûkîrwa nî mantû taagwe.

⁴⁰ Gwe nîgwe ûkaa mûrûngamîîri wa nja yaakwa. Nabo antû baakwa bonthe barîtua kûthithagia mantû kûringana na waatho bwaaku. Naani bûrîa nkethagîrwa ngûkûrûkîte nabu no ûntû bwegiî ûnene bunka.”

⁴¹Ningî Farao areera Josefu ûjû, “Atîrî, nandî ngûkweethia mûrûngamîîri wa nthîgûrû ya Misri yonthe.”

⁴² Rîu Farao ararita mbete îrîa yaarî na mûûri jwaawe njara, aramîîkîra kîara kîa Josefu, ningî aramwîkîra nguû irîa nthongi na aramwîkîra mûkathî jwa thaabu nkingo.

⁴³Aracoka aramûnenkera ngaarî ya mbarathi îrîa yaarî ya gûkamataga mûnini wa Farao. Nabo antû baratûmîîria barî mbere yaawe bakiugaga, “Nî aeewe gîtîîo.” Tontû bûû, Farao nî aaeetherie Josefu mûrûngamîîri wa nthîgûrû ya Misri yonthe.

⁴⁴Amwe na bûu, Farao nî eerîre Josefu atîrî, “Gûtî muntû kinya ûrîku ûbuîrîte kûthithagia noo atîa nthîgûrûûne ya Misri yonthe atî na rûûtha rwaaku, nî ni Farao ndauga.”

⁴⁵Farao nawe nî aaere Josefu riîtwa aramwîta Zafenathi-panea. Ningî aramwaa Asenathi, mwarî wa Potifera, mûthînjîri-mûrungu wa Oni aa mûka waawe. Tontû bûû, Josefu araambîrîîria kûthiûrûkania na nthîgûrû ya Misri yonthe.

⁴⁶Josefu aarî na ûkûrû bwa mîaka mîrongo îthatû rîrîa aambîrîîrie gûtumîkîra Farao mûnene wa Misri. Josefu nî aaumîre kîrî Farao, araambîrîîria kûthiûrûkania na nthîgûrû ya Misri yonthe.

⁴⁷Mîakeene mûgwanja îrîa yaarî ya nyiro, miuunda nî yaaumaga irio bibingî mono.

⁴⁸Josefu nî oothuranîrie irio biu mîaka îîu yonthe mûgwanja, rîrîa kwaarî na nyiro nthîgûrûûne ya Misri, akîbiîkaga ntûûreene. Nawe eekaga ndeene ya o ntûûra irio birîa biethagîrwa biumîte miuundeene îrîa îmîcîgîîrîîtie.

⁴⁹Tontû bûû, Josefu aroothûrania irio na wingî mono, biraingîa ta mûthanga mwanka aratiga kûbithima nîûntû bitîngîûmba kûthimîka.

⁵⁰Mbere ya îgiita rîa mpara rîkinya, Josefu nî aarî na ataana baîrî. Ng'ina wa aana bau aarî Asenathi, mwarî wa Potifera, mûthînjîri-mûrungu wa Oni.

⁵¹Josefu areeta mûtaana wa mbere Manase,[44] arauga atî, “Mûrungu nî atûmîte ndoorîrua nî mathîîna jaakwa jonthe na kinya nja ya baaba.”

⁵²Mûtaana wa baîrî nawe areetwa Efuraimu,[45] arauga atî, “Mûrungu nî atûmîte ngîa maciara ndî nthîgûrû ya mîthangîko yaakwa.”

⁵³Nyiro îrîa yaakarîte mîaka mûgwanja nthîgûrûûne ya Misri nî yakinyîre mûthia.

⁵⁴ Nayo mpara ya mîaka mûgwanja îraambîrîîria o ta ûrîa Josefu aaugîîte. Naku nî kwagîîre mpara nthîgûrûûne ingî cionthe, îndî kûreethîrwa kûrî na irio bibingî nthîgûrûûne ya Misri yonthe.

⁵⁵ Rîrîa nthîgûrû yonthe ya Misri yaagîîre mpara, antû nî baambîrîîrie gûkaîra Farao abaa irio. Îndî Farao areera antû ba Misri bonthe atîrî, “Îteeni kîrî Josefu, na o ûrîa akaabwîra, bûthithie u.”

⁵⁶Tontû bûû, rîrîa mpara yoojûrîre nthîgûrûûne îîu yonthe, Josefu nî aarugûrîre nyomba iria cieeki irio cionthe, na araambîrîîria kwenderia Amisri irio, nîûntû mpara îîu nî yaarî înene mono nthîgûrûûne ya Misri.

⁵⁷Ningî rî, antû ba mîgongo yonthe nî beetaga Misri kûgûra irio kîrî Josefu nîûntû bwa ûrîa mpara îîu yaneneete îroojûra nthîgûrû yonthe.