Read KIMERU BIBLE PROTESTANT EDITION Kîam 42 Bible Online

Kîam 42 - KIMERU BIBLE PROTESTANT EDITION bible

Kîam 42

¹Jakubu nî aaigîrue atî Misri kûrî na irio. Tontû bûû, arooria ataana baawe atîrî, “Nîka gûtî u bûûmba kûthithia twona biakûrîa?”

² Arabeera ûjû, “Atîrî, nî mbigîtue atî Misri kûrî na irio. Îteeni nao bûkagûre irio nîkenda tûtîgaakue nî mpara.”

³Nabo ataana ba ng'ina ba Josefu nî beetîre Misri kûgûra irio.

⁴Îndî Jakubu ateendere Benjamini, mûtaana wa ng'ina wa Josefu eetania na bau bangî nîûntû nî aakîraga eeja kwona ûgwati.

⁵Tontû bûû, ataana ba Israeli bareetania amwe na antû bangî barîa beetaga kûgûra irio Misri nîkwîthîrwa mpara nî yaarî îgûkinya nthîgûrû ya Kanaani.

⁶Îgiita rîu, Josefu nîwe waarî mûrûngamîîri wa mantû nthîgûrûûne ya Misri. Nîwe weendagîria antû bonthe ba nthîgûrû îîu îrio. Nabo ataana ba ng'ina ba Josefu nî baakinyîre kîrî we nabo bareenamîîria mwanka nthî mbere yaawe.

⁷Rîrîa Josefu oonere ataana ba ng'ina, nî aabamenyere, îndî aracieethia atîbaijî, na arabaarîria abaang'enteerete arabooria, “Nîkû buumîte?” Nabo baramwîra, “Tuumîte nthîgûrû ya Kanaani na twîjîte kûgûra irio.”

⁸Rîrîa Josefu oonere ataana ba ng'ina nî aabamenyere îndî bo bataamûmenya.

⁹ Josefu araririkana irooto birîa aarootere bibegiî, arabeera atîrî, “Buî bûrî achûnkûûni; nîka bwîjîte kwona ûrîa nthîgûrû îtî na inya.”

¹⁰Nabo baramwîra atîrî, “Arî, mwathi weetû. Tuî nthûûmba ciaaku nî irio twîjîte kûgûra.

¹¹Baatuî twinthe tûrî ba îthe ûmwe. Tûrî antû babeega na barî ûûma. Tuî nthûûmba ciaaku tûtî achûnkûûni.”

¹²Îndî Josefu arabeera atîrî, “Arî, buî bwîjîte kwona ûrîa nthîgûrû îtî na inya!”

¹³Nabo baramwîra atîrî, “Tuî nthûûmba ciaaku, tûrî ba îthe ûmwe. Tuumîte nthîgûrû ya Kanaani na tûciari tûrî îkûmi na baîrî. Ûrîa mwanake buru nî aratigîrwe barî na baaba, îndî ûmwe atî o.”

¹⁴Îndî Josefu arabeera atîrî, “Kîu nîkîo gîtûmi nkûbwîra bûrî achûnkûûni!

¹⁵Ûntû bûu nîbu bûkaagerua nabu. Nîngûciîtia na riîtwa rîa Farao atî bûtiuma gûkû tiga mûtaana wa nyakwe ûu mwanake aambe eeje gûkû.

¹⁶Tûmeeni ûmwe weenu eete akagîîre mûtaana wa nyakwe, naabuî bûtigwe bûingîri ncheera nîkenda nteto cieenu imenyeka këethîra nî cia mma. Këethîra tî ûu, nî ngûciîtia na riîtwa rîa Farao atî bûrî achûnkûûni.”

¹⁷Tontû bûû, arabeeka bonthe amwe ncheera ntukû ithatû.

¹⁸Ntukû ya ithatû yakinya, Josefu arabeera, “Ûûni ndî muntû ûkîrîte Mûrungu; tontû bûu thithieeni ûu nîkenda bûtûûra mwoyo.

¹⁹Këethîra bûrî antû ba mma, tigeeni mûtaana wa nyakwe ûmwe ncheera bwaane bwikîrie antû ba nja yeenu irio batigaakue nî mpara.

²⁰Bûcoke bûndeetere mûtaana wa nyakwe ûrîa mwanake buru nîkenda mbîtîkia nteto cieenu, naabuî bûtîûragwa.” Nabo barathithia u.

²¹Nabo baraaranîria bakîîranaga atîrî, “Gûtî nkaanja atî nîka tûgûkanûkua nîûntû bwa mûtaana wa chiaa Josefu. Nî twoonere ûrîa aathaangîkîte nkoroone, îndî kinya atûkaîra, nî twaaregere kûmûthikîîra. Kîu nîkîo gîtûreeterete thîîna îîjî.”

²² Rubeni arabeera atîrî, “Ntaabûkaanagia kûthithîria mwana ûu ûntû bûbûûî naabuî bûrarega kwigua? Nandî ka bwoone tûkîrîua tharike yaawe.”

²³Nabo bataamenyaga këethîra Josefu nî akwigua ûrîa baaragia nîûntû rîrîa baaragia nawe nîka aataûragîrwa nî muntû ûngî.

²⁴Josefu araumauma au kîrî bo, areeta ararîra. Aracoka kîrî bo kaîrî, na aathiria kûbaarîria, araathuura Simioni kuuma kîrî bau bangî, aramûtheeka bategeete.

²⁵Rîu Josefu ararita waatho arauga nkunia ciaao ciûjûrue irio, na o muntû acokerue mbeecha ciaawe nkunieene yaawe, na baeewe rîîgu nîûntû bageeta rûgendo rûrûraaja. Nabo barathithîrua mantû jau.

²⁶Nabo nî baaîkîrie ntigiri ciaao mîrigo yaao ya irio baraambîrîria rûgendo.

²⁷Barî antû arîa baaraarîrîîre, ûmwe waao nî aakunûrîre nkunia yaawe nîkenda arûmia ntigiri yaawe tûirio. Nawe agîtega, aroona mbeecha ciaawe irî mûromoone jwa nkunia yaawe.

²⁸Areera ataana ba ng'ina atîrî, “Mbecha ciaakwa nî icokerue; oneeni, tîcio iji aja nkunieene yaakwa!” Rîu baragwatwa nî ûguaa bûbûnene, barakua nkoro buru. Baraambîrîria kûûrania atîrî, “Nîatîa ûjû Mûrungu atûthithîrîtie?”

²⁹Rîrîa baakinyîre kîrî îthe Jakubu nthîgûrûûne ya Kanaani, nî baamwîrîre mantû jonthe jarîa boonete. Baramwîra atîrî,

³⁰“Muntû ûrîa wathaga nthîgûrû îîu nî aratûthûûkîrîîre mono agîtwîraga nîka tûreetîte gûcûnkûûna nthî îîu.

³¹Naatuî nî tûramwîrîre atî tuî tûrî antû babeega ba mma, na tûtî achûnkûûni,

³²Ningî twamwîra atî tûrî ba îthe ûmwe, na tûciari tûrî îkûmi na baîrî. Ûmwe atî o, nawe ûrîa mwanake buru nî araatigîrwe na baaba nthîgûrû ya Kanaani.

³³Îndî muntû ûu wathaga nthîgûrû îîu nî araatwîrîre atîrî, ‘Kîrîa gîgaatûma mbîtîkia atî bûrî antû ba mma nî gîkî: ntîgeeni na mûtaana wa nyakwe ûmwe naabuî bwîte bwaanîrie antû ba nja yeenu irio batîgaakue nî mpara.

³⁴Bûcoke bûndetere mûtaana wa nyakwe ûrîa mwanake, nîkenda mbîtîkia atî buî bûtî achûnkûûni, bûrî antû ba mma. Rîu nîrîo nkaabûnenkera mûtaana wa nyakwe, na mbwee rûûtha rwa kûringaga biashara nthîgûrû îîjî.’”

³⁵Nî gwakarîre atîrî, rîrîa baaritaga into nkunieene, o muntû nî eethagîra kîmaanja kîa mbeecha ciaawe nkunieene yaawe. Nabo barî amwe na îthe Jakubu boona imaanja biu bia mbeecha ciaao nî baaigîrue ûguaa.

³⁶Îthe Jakubu nî aabeerîre atîrî, “Ka bûkwenda kûnthirîria aana buru? Josefu atî o! Simioni atî o! Nandî nî Benjamini bûkwenda gwîta nawe! Mantû jaja jonthe no ni jakwîjîîra!”

³⁷Rubeni nî aarîîrie îthe aramwîra atîrî, “Nenkera Benjamini na ndaarega kûmûcokia kîrî gwe rî, ûûrage ataana baakwa bobaîrî.”

³⁸Îndî Jakubu arauga atîrî, “Mûtaana waakwa atîîtania naabuî, nîûntû mûtaana wa ng'ina nî aakuîre, aratigwa arî wenka. Nandî akëeja kwonera ûgwati rûgendoone rûu bûgeeta rî, tîka bûgaatûma nkue nî kwithikîîra na nî bûkwona ndîgûkûra?”