Read KIMERU BIBLE PROTESTANT EDITION Kîam 44 Bible Online

Kîam 44 - KIMERU BIBLE PROTESTANT EDITION bible

Kîam 44

¹Josefu nî eerîre muntû ûrîa waarûngamagîîra nja yaawe atîrî, “Îkîîra antû baba irio bibingî nkunieene ciaao o ûrîa bakoomba gûkamata, na wîkîre mbeecha cia o muntû mûromoone jwa nkunia yaawe.

²Ningî wîkîre gîkombe gîaakwa kîrîa gîa fetha mûromoone jwa nkunia ya ûrîa mwanake buru amwe na mbeecha ciaawe cia kûgûra irio.” Nawe arathithia o ûrîa Josefu aamwîrîre.

³Rîrîa gwaakîere, nî baaerwe rûûtha baraciîtîra amwe na ntigiri ciaao.

⁴Îndî batîreeta kûraaja na ntûûra, Josefu nî eerîre muntû ûrîa waarî mûrûngamîîri wa nja yaawe atîrî, “Ûkîîra wîngane na antû bau, na waabagwatagwata ûboorie atîrî, ‘Nîmbi yatûma bûndîaa wega na ûthûûku?

⁵Anga gîkî tîkîo gîkombe kîrîa mwathi waakwa anyunyaga nakîo, na nookîo aringagia nakîo? Ûntû bûbû bwathithia nî bûbûthûûku mono.’”

⁶Rîrîa aabagwatagwatîre, nî aabeerîre nteto iu.

⁷Nabo baramûûria atîrî, “Nîmbi îgûtûma mwathi weetû aaria nteto ta iu? Baatuî nthûûmba ciaaku tûtîûmba kûthithia ûntû ta bûu!

⁸Gwe nî wiijî atî kinya mbeecha irîa tweethîîre irî mîromoone ya nkunia cieetû, nî tûreejîre nacio kuuma nthîgûrû ya Kanaani twakûretera. Nîmbi îndî yûmba gûtûma twiya fetha kana thaabu kuuma nyomba ya mwathi waaku?

⁹Ûrîa weetû ûkeethîrwa arî nakîo, nî ooragwe, na kinya tuî tûtuîke nkombo cia mwathi weetû.”

¹⁰Muntû ûu arabeera atîrî, “Nîu ni; ka gûkare ûu bwauga. Ûrîa ûkeethîrwa arî nakîo akaa nkombo yaakwa, îndî bau bangî batîûrua.”

¹¹Tontû bûû, barakinyithia nkunia ciaao nthî na mpwîî, na o muntû arakunûra nkunia yaawe.

¹²Muntû ûu aracwaa gîkombe kîu kîrî bo arambîrîria na ûrîa mûkûrû, ararigia na ûrîa mwanake. Nakîo gîkombe kîroonora nkunieene ya Benjamini.

¹³Rîu baratambûranga nguû ciaao na o muntû araîkia ntigiri yaawe mûrigo, baracoka ntûûreene.

¹⁴Rîrîa Juda na ataana ba ng'ina baakinyîre nyomba ya Josefu, nî beethîre Josefu arî o ku. Nabo baraigwîthia nthî mbere yaawe.

¹⁵Josefu arabooria atîrî, “Nîatîa bwathithia ûntû bûkari? Ka bûtîramenyaga muntû ta ûûni no aringie mantû?”

¹⁶Juda arauga atîrî, “Nîatîa tûûmba kwîra mwathi weetû? Tuuge atîa? Nîmbi tûkoonania nayo atî tûtî na meeyia na Mûrungu akwonania meeyia jeetû tuî nthûûmba ciaaku? Nandî tuî tûrî nkombo ciaaku gwe mwathi weetû, tuî amwe na ûrîa wagwatwa arî na gîkombe.”

¹⁷Îndî Josefu arabeera atîrî, “Ûu nîu ntîthithia! No muntû ûrîa wagwatwa na gîkombe wenka ûkaa nkombo yaakwa. Îndî buî aaneeni kîrî abaagu na thîîrî.”

¹⁸Nîrîo Juda eetaîtîre kîrî Josefu aramwîra atîrî, “Itû mwathi waakwa, ndakwerenca mbîtîkîîria mbarie naagwe ni nthûûmba yaaku, na menya wîja kûnthûûrîîra nîûntû gûtî mwanya jwaaku na Farao.

¹⁹Gwe Mwathi waakwa nî watûûrîrie tuî nthûûmba ciaaku atîrî, ‘Bûrî mûtaana wa nyakwe ûngî? A abaagu we arî mwoyo?’

²⁰Naatuî nî twagûcokeerîe atîrî, ‘Baaba arî o, îndî nî ûmûkûrû buru. Ningî tûrî na mûtaana wa chiaa ûngî ûrîa mwanake buru, na nîwe baaba agîîte nawe ûkûrûûne bwaawe. Mûtaana wa ng'ina nî aakuîre, nawe nîwe ûtigi wenka kîrî aana ba ng'ina. Îthe nî amwendeete mono.’

²¹Naagwe nî waatwîrîre tuî nthûûmba ciaaku atîrî, ‘Bûndetere we mwoone na meetho.’

²²Naatuî nî twakwîrîre atîrî gwe mwathi weetû, ‘Mwana ûu atîûmba kuumauma kîrî îthe, nîûntû akëeja kuuma kîrî we, îthe no gûkua akua.’

²³Naagwe nî waatwîrîre atîrî, ‘Bwëethîrwa bûtîîjania na mûtaana wa nyakwe ûu mwanake buru, nkarobwona kaîrî.’

²⁴Naatuî rîrîa twacokere kîrî baaba, nî twaamwîrîre ûrîa waugîîte.

²⁵Ningî rîrîa baaba aatwîrîre, ‘Îteeni kaîrî bûgaatûgûrîre irio,’

²⁶nî twaugîre, ‘Tuî tûtîîta. Îndî këethîra mûtaana wa chiaa ûrîa mwanake akeethîrwa arî amwe naatuî, tûgeeta. Tontû muntû ûu atîenda gûtwona twëethîrwa tûtî na mûtaana wa chiaa ûrîa mwanake.’

²⁷Baaba aratwîra, ‘Nî bwijî atî mwekûrû waakwa aarî na ataana baîrî;

²⁸ûmwe atî o, naani ndîreetîkia atî nî mma aarîîrwe nî nyamû na ntaamwona kaîrî.

²⁹Nandî bwajûkia ûûjû nawe kuuma kîrî ni rî, akëeja kwona ûgwati, nîka buî bûgaatûma nkue nî kwithikîîra na nî bûkwona ndîgûtindira?’

³⁰Tontû bûû, nandî ndaana kîrî nthûûmba yaaku baaba ntî na mwana ûûjû, nîûntû bwa ûrîa baaba amwendeete na,

³¹oona atî mwana ûûjû atî amwe naani, nooka agaakua. Naatuî nthûûmba ciaaku nî tuî tûkeethîrwa tûgûtûma nthûûmba yaaku baaba akua.

³²Nî ni nthûûmba yaaku ndaaciîtîîrie baaba atî, ‘Nkaarûngamîîra mûthaka ûu mwanka mûreete kîrî gwe.’ Ningî ndîramwîra atîrî, ‘Ndaarega kûmûcokia kîrî gwe, ûkarondekera kenya.’

³³Nandî itû reka ni nthûûmba yaaku ntigwe ndî nkombo yaaku antû a mûthaka ûûjû, nawe mûthaka ûûjû ûreke aane amwe na ataana ba ng'ina bau bangî.

³⁴Tontû rî, nîatîa mpûûmba gwîta kîrî baaba ntî na mûthaka ûûjû? Ntîûmîîria kwona ûthûûku bûrîa bûkeejîîra baaba.”