Read KIMERU BIBLE PROTESTANT EDITION Kîam 45 Bible Online

Kîam 45 - KIMERU BIBLE PROTESTANT EDITION bible

Kîam 45

¹ Josefu nî aaigîrue atîûmba gûciûmia kaîrî arî mbere ya barîa bonthe baarî kîrî we. Arauga na inya atîrî, “Antû bonthe nî baumagarue beebere aja.” Tontû bûû, gûtî muntû waarî o Josefu akiimenyithania kîrî ataana ba ng'ina.

²Nî aarîrîre na kajû gakanene mwanka Amisri baraigua, na kinya antû ba nja ya Farao baraigua.

³Josefu areera ataana ba ng'ina atîrî, “Nî ni Josefu. Baaba no atwîre mwoyo?” Îndî ataana ba ng'ina batoombîre kûmûcokeria nîûntû bwa kûrigara kûrîa baarigarîre baigua ûu.

⁴Josefu areera ataana ba ng'ina atîrî, “Îjaîjeeni akuî nandî.” Nabo bareetaîta. Arabeera atîrî, “Nî ni mûtaana wa nyakwe Josefu ûrîa bweenderie Misri.

⁵Îndî nandî menyeni bwîja kwigua bûbûûî kana bwigambithia nîûntû bwa kwîthîrwa atî nî bwampenderie naaja. Nî Mûrungu weendere mbîja ndî mbere yeenu nîkenda mbonokia mîoyo ya antû.

⁶Nandî nî mîaka îîrî îthirîte kuuma mpara îkwîja nthîgûrûûne, na nî îtigeere mîaka îngî îtaano îrîa gûtîrîmwa kana gûkethwa.

⁷Mûrungu nî aandetere gûkû ndî mbere yeenu nîkenda ntûma bûtigara nthîgûrûûne na mbonokia mîoyo yeenu na njîra ya mwanya.

⁸Tontû bûû, tî buî bwandetere gûkû, nî Mûrungu. Ningî Mûrungu nî ampeethetie îthe wa Farao, na mûrûngamîîri wa nja yaawe, na ampeethia mwathi wa nthîgûrû ya Misri yonthe.

⁹ Nandî îteni na mpwîî kîrî baaba bûmwîre, ‘Mûtaana waaku Josefu aakwîra atîrî, Mûrungu nî ampeethetie mwathani wa nthîgûrû ya Misri yonthe. Nandî njû kîrî ni naaja, na ûkáthaa.

¹⁰Ûgaatûûra nthîgûrû ya Gosheni, na ûkeethîrwa ûrî akuî naani, ûûgwe na aana baaku, na aana ba aana baaku, na ndîîthia ciaaku cia mbûri na ng'ondu na ng'ombe, na into biaaku bionthe.

¹¹Naani ngaakûmenyagîîra ûrî nao ûtîkeeje kûrîa thîîna, gwe na nja yaaku na birîa bionthe ûrî nabio, nîûntû mîaka nî îtigeere îngî îtaano ya mpara.’

¹²Nandî bûgûcionera, na kinya mûtaana wa chiaa Benjamini agûcionera atî nî ni ndaabwîra ûu.

¹³Bûkárega kwîra baaba ûnene bûrîa ndî nabu gûkû Misri na mantû jonthe jarîa bwoneete. Nandî gîîreeni baaba bûmûreete naaja na mpwîî.”

¹⁴Rîu aracoka arakumbatîria mûtaana wa ng'ina Benjamini ararîra. Benjamini kinya we ararîra akumbatîrîîtie Josefu.

¹⁵Ningî aracûnca ataana ba ng'ina bangî bonthe o akîrîraga. Nyuma ya ûu, ataana ba ng'ina baraaranîria nawe.

¹⁶Rîrîa Farao na antû ba nja yaawe baamenyere atî ataana ba ng'ina ba Josefu baagûkinya, ûntû bûu nî bwabagwîrîrie mono.

¹⁷Farao nî eerîre Josefu atîrî, “Îîra ataana ba nyakwe atîrî, nî baîkie ntigiri ciaao mîrigo baambîîrie rûgendo, na baakinya nthîgûrû ya Kanaani rî,

¹⁸bajûkie abaagu na antû ba nja yaawe, beeje kîrî ni. Naani nkaabaa gûntû kûrîa kwega buru gûkû nthîgûrû ya Misri, naabo bakaarîjaga birîa bieega bia nthîgûrû îîjî.

¹⁹Ningî beere atîrî, nî bajûkie ngaarî îrîa îkuuragua nî mbarathi kuuma gûkû nthîgûrû ya Misri nîûntû bwa twaana twaao na aka baao, beete bagîîre abaagu.

²⁰Bûgátinda bûmakîrîte into bingî bieenu nîûntû gûntû kûrîa kwega buru gûkû nthîgûrû ya Misri gûkeethîrwa kûrî kweenu.”

²¹Nabo ataana bau ba Israeli nî baathithîrie o ûu. Josefu nî aabanenkeere ngaarî irîa ikuuragua nî mbarathi kûringana na waatho bwa Farao, na arabaa rîîgu nîûntû bwa rûgendo.

²²Ningî nî aabaeere o muntû o muntû nguû înjerû, na araa Benjamini ichunchî magana jathatû bia fetha na nguû injerû ithaano.

²³Nawe nî aatûmanîîre into bibi biikîrua îthe: ntigiri îkûmi cia ndûme ikamatîte into birîa biega buru kuuma Misri; na ntigiri îkûmi cia nka ikamatîte irio na mîgaate na rîîgu ya îthe nîûntû bwa rûgendo.

²⁴Rîu ararekeeria ataana ba ng'ina beeta, îndî arabeera ûjû, “Menyeni bwîja gûtetania bûrî rûgendoone.”

²⁵Nabo barauma Misri, bareeta barakinya kîrî îthe Jakubu nthîgûrû ya Kanaani.

²⁶Baramwîra atîrî, “Josefu no arî mwoyo, na nîwe ûkwaathana nthîgûrûûne ya Misri yonthe.” Jakubu aratemûka nîûntû ataabeetîkagia.

²⁷Îndî rîrîa baamweere nteto cionthe irîa Josefu aabeerîte, na oona ngaarî irîa ikuuragua nî mbarathi, irîa Josefu aatûmîte cia kûmûkamata, Jakubu aragîa inya.

²⁸Tontû bûû, Israeli arauga atîrî, “Ndîkûng'anîrwa. Këethîra mûtaana waakwa Josefu arî mwoyo, ngeeta kûûmwona ntîrakua.”