Read KIMERU BIBLE PROTESTANT EDITION Kîam 46 Bible Online

Kîam 46 - KIMERU BIBLE PROTESTANT EDITION bible

Kîam 46

¹Tontû bûû, Israeli nî aambîrîîrie rûgendo areeta na into biaawe bionthe. Aakinya Beerisheba, araritîra Mûrungu wa îthe Isaaka igongwana.

²Mûrungu nî aaumîrîîre Israeli na njîra ya kîoneki kûrî ûtukû na aramwîra atîrî, “Jakubu! Jakubu!” Nawe arauga, “Ndî aja!”

³Rîu Mûrungu aramwîra atîrî, “Nî ni Mûrungu; nî ni Mûrungu wa abaagu. Ûgáakîra gwîta Misri nîûntû ngakweethia mûgongo jûmûnene ûrî ku.

⁴Ngeeta ndî amwe naagwe Misri, ningî ngaakûrita ku ngûcokie gûkû kaîrî. Josefu akeethîrwa arî amwe naagwe ûgîkua.”

⁵Jakubu nî aambîrîîrie rûgendo kaîrî kuuma Beerisheba. Nabo ataana ba Israeli nî baitithîrie îthe Jakubu na twaana twaao na aka baao ngaarîîne irîa ikuuragua nî mbarathi, irîa Farao aatûmîte cia kûbakamata.

⁶ Ningî nî baaringîre ndîîthia ciaao na barakamata into biaao birîa baarî bakûgîa nabio kûu nthîgûrû ya Kanaani. Tontû bûû, Jakubu nî eetîre Misri amwe na nchiarwa ciaawe cionthe.

⁷Areeta amwe na ataana baawe, na ataana ba ataana baawe, na aarî baawe, na aarî ba ataana baawe. Areeta Misri amwe na nchiarwa ciaawe cionthe.

⁸Jaja nîjo mariîtwa ja nchiarwa cia Israeli tawe Jakubu na ataana baawe barîa beetîre Misri. Rubeni mwana waawe wa kîranga.

⁹Ataana ba Rubeni beetagwa Hanoki na Palu na Hezironi na Karami.

¹⁰Ataana ba Simioni beetagwa Jemueli na Jamini na Ohadi na Jakini na Zohari na Shaulu, ûrîa waaciari nî mûka Mûkanaani.

¹¹Ataana ba Lawi beetagwa Gerishoni na Kohathi na Merari.

¹²Ataana ba Juda baarî Eri na Onani na Shela na Perezi na Zera. Îndî Eri na Onani nî baarî bagûkuîra nthîgûrû ya Kanaani. Nabo ataana ba Perezi beetagwa Hezironi na Hamuli.

¹³Ataana ba Isakari baarî Tola na Puva na Iobu na Shimuroni.

¹⁴Ataana ba Zebuloni beetagwa Seredi na Eloni na Jahileeli.

¹⁵Bau baarî ataana ba Lea barîa aaciarîre Jakubu baarî Padani-aramu na mwarî waawe eetagwa Dina. Ataana na aarî bonthe baarî antû mîrongo îthatû na bathatû (33).

¹⁶Ataana ba Gadi beetagwa Zifioni na Hagi na Shuni na Eziboni na Eri na Arodi na Areli.

¹⁷Ataana ba Asheri beetagwa Imina na Ishiva na Ishivi na Beria nawe mwarî wa ng'ina aarî Sera. Nabo ataana ba Beria beetagwa Heberi na Malikieli.

¹⁸Bau baarî aana ba Zilipa ûrîa Labani aeejanîre kîrî mwarî waawe Lea. Nîwe waaciarîîre Jakubu aana bau, îkûmi na bataantatû (16).

¹⁹Ataana ba Raeli, mwekûrû wa Jakubu beetagwa Josefu na Benjamini.

²⁰ Josefu arî Misri nî aagîîre na Manase na Efuraimu, barîa aaciarîîrwe nî Asenathi mwarî wa Potifera mûthînjîri-mûrungu wa Oni.

²¹Ataana ba Benjamini beetagwa Bela na Bekeri na Ashibeli na Gera na Naamani na Ehi na Roshi na Mupimu na Hupimu na Aradi.

²²Bau baarî ataana ba Raeli barîa aaciarîre Jakubu, bonthe antû îkûmi na bana (14).

²³Mûtaana wa Dani eetagwa Hashumu.

²⁴Ataana ba Nafutali beetagwa Jahazeli na Guni na Jezeri na Shilemu.

²⁵Bau baarî ataana ba Biliha ûrîa Labani aaeejanîre kîrî mwarî waawe Raeli. Nawe aaciarîre Jakubu ataana mûgwanja (7).

²⁶Antû bonthe ba Jakubu barîa beetîre Misri, barîa baarî baawe bongwa, gûtîgûtarwa aka ba ataana ba Jakubu, baarî antû mîrongo îtaantatû na bataantatû (66).

²⁷ Ningî amwe na ataana ba Josefu baîrî barîa aagîîre nabo arî Misri, antû bonthe ba nja ya Jakubu barîa baarî Misri baarî mîrongo mûgwanja (70).

²⁸Jakubu nî eerîre Juda eetage arî mbere akeere Josefu batirimane Gosheni. Rîrîa baakinyîre Gosheni,

²⁹Josefu nî aathuranîîre ngaari yaawe ya mbarathi areeta gûtirimana na îthe, Israeli ku. Josefu nî aaimenyithanîrie kîrî we, aracoka arakumbatîria îthe ararîra kagiita gakanene mma.

³⁰Israeli areera Josefu atîrî, “Nandî nîûntû ngûkwona ndaamenya ûrî mwoyo kinya ngakua.”

³¹Josefu nawe areera ataana ba ng'ina na antû bangî ba nja ya îthe atîrî, “Ngeeta kûmenyithia Farao, naani nkaamwîra atîrî, ‘Ataana ba chiaa na antû bangî ba nja ya baaba barîa baratûûraga nthîgûrû ya Kanaani baakwîja kîrî ni.

³²Îndî antû bau nî arîîthi; batwîre barîîthagia nyomoo. Nabo beejîte na ndîîthia ciaao cia mbûri na ng'ondu na ng'ombe na into bingî bionthe biaao.’

³³Tontû bûû, rîrîa Farao akaabwîta, abûûrie, ‘Nî ngûgî îrîkû bûritaga?’

³⁴Buî buuge atîrî, ‘Tuî nthûûmba ciaaku tûtûûraga kûrîîthia nyomoo kuuma tûrî twaana mwanka nandî; tuî na kinya biûjûjû bieetû.’ Bwauga ûu, bûkaarekwa bûtûûre nthîgûrû ya Gosheni nîûntû kîrî Amisri, mûrîîthi wonthe nî muntû ûrî îgi.”