Read KIMERU BIBLE PROTESTANT EDITION Kîam 47 Bible Online

Kîam 47 - KIMERU BIBLE PROTESTANT EDITION bible

Kîam 47

¹Josefu nî eetîre kîrî Farao aramwîra atîrî, “Baaba na ataana ba chiaa baagûkinya kuuma nthîgûrû ya Kanaani barî na ndîîthia ciaao cia mbûri na ng'ondu na ng'ombe na into bingî biaao bionthe, na nandî barî kûu Gosheni.”

²Nawe nî aaikîrie ataana ba ng'ina bataano kîrî Farao.

³Farao arooria ataana ba ng'ina ba Josefu atîrî, “Nî ngûgî îrîkû bûritaga?” Nabo baramûcokeria atîrî, “Tuî nthûûmba ciaaku tûrî arîîthi o ta biûjûjû bieetû.”

⁴Ningî baramwîra atîrî, “Tuî nthûûmba ciaaku nîka tweeja gûtûûra tûrî ageni gûkû nthîgûrû îîjî, nîkwîthîrwa tûtî na gwa kûrîîthia nyomoo cieetû, kûu nthîgûrû ya Kanaani nîûntû ûrîa mpara îng'eenteete. Tontû bûû, nandî nî tûgûkûromba wîtîkîîrie tuî nthûûmba ciaaku tûtûûre kûu Gosheni.”

⁵Rîu Farao araarîria Josefu aramwîra atîrî, “Nandî abaagu na ataana ba nyakwe baakwîja kîrî gwe.

⁶Nayo nthîgûrû ya Misri nî yaaku. Tontû bûû, nenkera abaagu na ataana ba nyakwe gûntû gwa gûtûûra kûrîa kwega buru nthîgûrûûne îîjî. Reka batûûre Gosheni. Ningî wëethîrwa wiijî barîa baijî ngûgî bwega gatîgatî kaao, baeethie arîîthi ba ng'ombe ciaakwa.”

⁷Josefu aracoka araikia îthe kîrî Farao. Jakubu arakeethia Farao.

⁸Farao arooria Jakubu atîrî, “Ûrî na ûkûrû bwa mîaka îng'ana?”

⁹Jakubu areera Farao atîrî, “Ndî na mîaka îgana rîmwe rîa mîrongo îthatû (130). Ntukû irîa ntûûrîte nî inkai na ciithîrîtwe irî na mathîîna jamaingî. Ningî itîûmba kûng'anana na ntukû irîa biûjûjû biaakwa biatûûraga nthîgûrû îtî yaabio.”

¹⁰Jakubu aratharima Farao na aracoka araumagara.

¹¹Josefu nî aaere îthe na ataana ba ng'ina gûntû gwa gûtûûra. Baratûûra Ramesesi, gûntû kûrîa kwega buru nthîgûrûûne ya Misri, o ta ûrîa Farao aaugîîte.

¹²Ningî Josefu nî aaeejaga îthe na ataana ba ng'ina irio, amwe na antû bonthe ba nja ya îthe, o muntû kûrîngana na ûrîa nja yaawe yeethagîrwa îng'ana.

¹³Nayo mpara nî yaaneneere mono mwanka irio birathira buru gûntû kunthe na nthîgûrû ya Misri na ya Kanaani iranyamaara buru nîûntû bwa mpara îîu.

¹⁴Tontû bûû, Josefu nî oothûranîrie mbeecha cionthe irîa ciaaumaga nthîgûrû ya Misri na nthîgûrû ya Kanaani rîrîa aabeendagîria irio, agiikagia mbeecha iu nyomba ya Farao.

¹⁵Rîrîa antû nthîgûrûûne ya Misri na nthîgûrûûne ya Kanaani baathirîîrwe nî mbeecha, Amisri bonthe nî baambîrîîrie gwîta kîrî Josefu bakîmwîraga atîrî, “Twee irio. Ga tûgaakua ûtegeete na nî wiijî atî nî turathirîîrwe nî mbeecha?”

¹⁶Josefu akabacokeria atîrî, “Reeteeni nyomoo cieenu cia ndîîthia, naanî nkaabûkûranîria na irio këethîra nî bûthirîri nî mbeecha.”

¹⁷Tontû bûû, baratua gwikagia nyomoo ciaao cia ndîîthia kîrî Josefu. Baraikia mbarathi na mbûri na ng'ondu na ng'ombe na ntigiri ciaao, nawe Josefu akabakûranîria na irio. Mwaka jûu junthe arabaa irio akîbakûûranagîria na nyomoo ciaao cia ndîîthia.

¹⁸Mwaka jûu jûkûthira, antû nî beetîre kîrî Josefu baramwîra atîrî, “Gûtî ûntû tûgûkwitha mwathi weetû nîûntû nî ûkûmenya mbeecha cieetû cionthe nî itumîkîte, na nyomoo cia ndîîthia nî ciaaku mwathi weetû. Nandî gûtîkîo tûtigeere nakîo tiga mîîrî yeetû na ithaka bieetû.

¹⁹Nîkî tuî na ithaka bieetû tûkaathira ûkîonaga ûtegeete? Tûgûre amwe na ithaka bieetû ûtweejage irio. Naatuî tûkaa nkombo cia Farao na ithaka bieetû biee biaawe. Ningî ûtwee mbeeû nîkenda tûtûûra mwoyo antû a gûkua, na nîkenda nthîgûrû îtîtigwa îrî întheri.”

²⁰Tontû bûû, Josefu nî aagûrîre nthî yonthe ya Misri îraa ya Farao nîkwîthîrwa Amisri bonthe nî beenderie miuunda yaao nîûntû bwa ûrîa mpara yaang'enteete.

²¹Nawe araeethia antû nkombo kuuma mûthia jûmwe jwa Misri gwîta jûngî.

²²Nthîgûrû îrîa yaarî ya athînjîri-mîrungu nooyo yonka Josefu ataagûrîre. Athînjîri mîrungu nî baaeejagwa irio nî Farao. Tontû bûû, bo bateenderie ithaka biaao.

²³Josefu nî eerîre antû atîrî, “Nandî ndîkûbûgûra bwaa ba Farao, na kinya ithaka bieenu biaa biaawe. Nandî mbeeû tîîjî; jûkieni bûkaande miuundeene.

²⁴Îndî ûjû nîu gûgaakaraga: rîrîa bwaketha, bûkaanenkagîra Farao gîchunchî kîmwe kîrî bitaano. Nabio ichunchî bina kuuma kîrî bitaano bikethagîrwa birî bieenu. Bûkaabitumagîra birî mbeeû ya kwaanda, na noo bio irio bieenu.”

²⁵Nabo antû barauga atîrî, “Ûkwonokia mîoyo yeetû. Nandî igua ûtî na nkaanja gwe mwathi weetû, nîûntû tuî tûgwîtîkîîria kwaa nkombo cia Farao.”

²⁶Josefu nî aatûmîre ûntû bûu bwegiî miuunda ya Misri bwaa waatho bwa gûtûûra bûthingatagwa. Mwanka naarua tûrî waatho bûu, atî Farao anenkagîrwe gîchunchî kîmwe kîrî bitaano kîa maketha noo bûthingatagwa. Ithaka bia athînjîri-mîrungu nîbio bionka bitaaere bia Farao.

²⁷Nabo Aisraeli nî baatûûrîre kûu Gosheni nthîgûrû ya Misri. Baragîa na into bibingî ku na baraciarana na barathegea mono.

²⁸Jakubu aatûûrîre nthîgûrû ya Misri mîaka îkûmi na mûgwanja. Tontû bûû, ûkûrû bunthe bwa Jakubu aarî mwoyo bwaarî mîaka îgana rîmwe rîa mîrongo îna na mûgwanja (147).

²⁹ Rîrîa Israeli aarî akuî gûkua nî eetîre mûtaana waawe Josefu aramwîra atîrî, “Këethîra nî ûkwona mbagîrîte nandî îkîra njara yaaku gatîgatî ka bieero biaakwa ûkaambathîkîra na ûtîngarûka. Itû menya wîja kûnthika Misri.

³⁰Îndî ûnthike kûrîa ba baaba bathiki. Ûnkamate kuuma Misri ûkaanthike antû arîa baathikanaga.” Josefu aramûcokeria arauga, “Nkaathithia o ûu wauga.”

³¹Nawe aramwîra atîrî, “Ciîtie.” Josefu aramûciîtîria. Israeli aracokia nkaatho arî au gîtandeene.