Read KIMERU BIBLE PROTESTANT EDITION Kîam 48 Bible Online

Kîam 48 - KIMERU BIBLE PROTESTANT EDITION bible

Kîam 48

¹Nyumeene Josefu nî eerîrwe ûjû, “Atîrî, abaagu nî aajîtue.” Nawe areeta na ataana baawe bobaîrî, tabo Manase na Efuraimu.

²Jakubu nî eerîrwe atîrî, “Mûtaana waaku Josefu aakwîja gûkûraitha.” Jakubu araciûmia na kainya karîa aarî nako, arookîîra arakara nthî gîtandeene.

³ Jakubu areera Josefu atîrî, “Mûrungu Mweneinya nî aacionanîrie kîrî ni ndî Luzi nthîgûrûûne ya Kanaani na arantharima.

⁴Nawe aambîrîre ûjû, ‘Atîrî, ngatûma ûciarane ûthegee wee mûgongo jûrî na antû babaingî. Ningî nkaaeejana nthîgûrû îîjî kîrî nchiarwa ciaaku yee kiigai kîaao gîa kenya na kenya.’

⁵Nandî ataana baaku bo baîrî barîa wagîîre nabo ûrî nthîgûrû ya Misri mbere ya mbîja kîrî gwe, nî baakwa. Efuraimu na Manase nî bataragwe barî baakwa, o ta ûrîa Rubeni na Simioni barî baakwa.

⁶Îndî aana barîa ûkaagîa nabo nyuma ya bau bakeethîrwa barî baaku. Nabo bagaatarîrwa kiigaine kîrîa ataana ba ng'ina Manase na Efuraimu bakaagaîrwa.

⁷ Naani rî, rîrîa ndaanîte mpuumîte Mesopotamia, nî ndaithikîrîîre mono rîrîa Raeli aakuîrîîre kûu nthîgûrû ya Kanaani, tûrî rûgendoone tûtigeerie antû atî araaja tûkinya Efirathi. Naani ndaamûthikîre rûteere njîreene ya gwîta Efirathi (na nîyo Bethlehemu) ndî na kwithikîîra gûkûnene.”

⁸Rîrîa Jakubu oonere ataana ba Josefu nî oorîrie atîrî, “Nî ba baba?”

⁹Josefu areera îthe atîrî, “Baba nî aana baakwa barîa Mûrungu ampeereete gûkû.” Îthe aramwîra atîrî, “Bareetareete kîrî ni itû mbatharime.”

¹⁰Rîu meetho ja Jakubu nî jaarî jakwambîrîria kûûra nî ûkûrû na atoonaga bwega. Tontû bûû, Josefu arabaikaikia akuî na îthe, nawe arabakumbatîria arabacûnca.

¹¹Israeli areera Josefu atîrî, “Ntaathûgaanagia nkoona ûthiû bwaaku kaîrî. Îndî rî, Mûrungu nî atûmîte ndoona kinya aana baaku.”

¹²Rîu Josefu arabarita bieroone biaawe, araturia maru areenamîîria mwanka nthî.

¹³Josefu aracoka arabagwata bo baîrî; aragwata Efuraimu na njara ya ûrîo eerekene na njara ya Jakubu ya ûmotho, na aragwata Manase na njara ya ûmotho, eerekene na njara ya Jakubu ya ûrîo arabaikaikia akuî nawe.

¹⁴Rîu Jakubu aratambûrûkia njara yaawe ya ûrîo aramîrîkîîra mûtwe jwa Efuraimu ûrîa waarî mwanake. Ningî arakîrîngania njara ciaawe ararîkîîra njara yaawe ya ûmotho mûtwe jwa Manase ûrî waarî mwana wa kîranga.

¹⁵Jakubu aratharima Josefu akiugaga ûjû: “Mûrungu ûrîa biûjûjû bieetû Abrahamu na Isaaka baatumîkagîra, Mûrungu ûrîa ûtwîre arî mûrîîthi waakwa, kuuma gûciarwa gwaakwa mwanka naarua tûrî;

¹⁶na mûraîka ûrîa ûtwîre ambonokagia mantûûne jonthe jarîa mathûûku, tharima aana baba. Tuma batûûrie riîtwa rîaakwa, na mariîtwa ja ba baaba, Abrahamu na Isaaka. Ningî ûrotûma bakaingîa bakaa babaingî nthîgûrûûne.”

¹⁷Rîrîa Josefu oonere îthe aarîkîîra njara yaawe ya ûrîo mûtwe jwa Efuraimu, ataagwîrîrue. Nî aagwatîre njara ya îthe akîenda kûmîrita mûtwe jwa Efuraimu nîkenda amîrîkîîra mûtwe jwa Manase.

¹⁸Josefu nî eerîre îthe atîrî, “Tî ûu baaba, nîûntû ûûjû nîwe wa kîranga. Rîîkîîra njara yaaku ya ûrîo mûtwe jwaawe.”

¹⁹Îndî îthe ararega arauga atîrî, “Nî nkûmenya, mwana waakwa, nî nkûmenya ûrîa nkûthithia. Kinya we akaa mûgongo jûrî na antû babaingî na akeethîrwa arî na îgweta. Îndî rî, mûtaana wa ng'ina ûûjû mwanake akeethîrwa arî îgweta nkûrûki yaawe, na nchiarwa ciaawe ikaa mîgongo îmiingî.”

²⁰ Jakubu nî aabatharimîre ntukû îîu akiugaga atîrî, “Aisraeli bagaatua kûtharimanaga bakiugaga atîrî, ‘Mûrungu arotûma ûkara ta Efuraimu na Manase.’” Ûu nîu Jakubu eekîre Efuraimu mbere ya Manase.

²¹Rîu Israeli areera Josefu ûjû; “Atîrî, ndî akuî gûkua. Îndî Mûrungu akeethîrwa arî amwe naagwe na agaagûcokia nthîgûrû ya biûjûjû bieenu.

²²Ningî ngûkwaa rûthanju rûmwe rwa nthîgûrû ya Shekemu, nkûrûki ya ataana ba nyakwe, rûrîa ndaatuunyîre Aamori ngîtumagîra rûchiû na ûta bwaakwa.”