Read KIMERU BIBLE PROTESTANT EDITION Kîam 5 Bible Online

Kîam 5 - KIMERU BIBLE PROTESTANT EDITION bible

Kîam 5

¹ Rîrî nîrîo yuku rîa nchiarwa cia Adamu. Rîrîa Mûrungu oombîre muntû, aamûûmbîre ang'uaneene na Mûrungu.

² Aaboombîre ntomûrûme na mûka na arabatharima. Aathiria kûboomba arabeeta muntû.[3]

³Adamu agûkinyia ûkûrû bwa mîaka îgana rîmwe rîa mîrongo îthatû (130), nî aagîîre na mûtaana wang'uaneene nawe, na waarî na mûûmbîre jûmwe nawe, aramwîta Sethi.

⁴Rîrîa Adamu aatûûrîre nyuma ya kûgîa na Sethi rîaarî mîaka magana janaana (800). Ningî nî aarî na ataana bangî na aarî.

⁵Adamu aakuîre arî na ûkûrû bwa mîaka magana kenda ja mîrongo îthatû (930).

⁶Sethi agûkinyia ûkûrû bwa mîaka îgana rîa îtaano (105) nîrîo aagîîre na Enoshi.

⁷Nyuma ya kûgîa na Enoshi, Sethi nî aatûûrîre mîaka magana janaana ja mûgwanja (807). Ningî nî aarî na ataana bangî na aarî.

⁸Sethi aakuîre arî na ûkûrû bwa mîaka magana kenda ja îkûmi na îîrî (912).

⁹Enoshi agûkinyia ûkûrû bwa mîaka mîrongo kenda (90) nîrîo aagîîre na Kenani.

¹⁰Nyuma ya kûgîa na Kenani, Enoshi nî aatûûrîre mîaka magana janaana ja îkûmi na îtaano (815). Ningî nî aarî na ataana bangî na aarî.

¹¹Enoshi aakuîre arî na ûkûrû bwa mîaka magana kenda ja îtaano (905).

¹²Kenani agûkinyia ûkûrû bwa mîaka mîrongo mûgwanja (70) nîrîo aagîîre na Mahalaleli.

¹³Nyuma ya kûgîa na Mahalaleli Kenani nî aatûûrîre mîaka magana janaana ja mîrongo îna (840). Ningî nî aarî na ataana bangî na aarî.

¹⁴Kenani aakuîre arî na ûkûrû bwa mîaka magana kenda na îkûmi (910).

¹⁵Mahalaleli agûkinyia ûkûrû bwa mîaka mîrongo îtantatû na îtaano (65) nîrîo aagîîre na Jaredi.

¹⁶Nyuma ya kûgîa na Jaredi, Mahalaleli nî aatûûrîre mîaka magana janaana ja mîrongo îthatû (830). Ningî nî aarî na ataana bangî na aarî.

¹⁷Mahalaleli aakuîre arî na ûkûrû bwa mîaka magana janaana ja mîrongo kenda na îtaano (895).

¹⁸Jaredi agûkinyia ûkûrû bwa mîaka îgana rîa mîrongo îtaantatû na îîrî (62) nîrîo aagîîre na Enoki.

¹⁹Nyuma ya kûgîa na Enoki, Jaredi nî aatûûrîre mîaka magana janaana. Ningî nî aarî na ataana bangî na aarî.

²⁰Jaredi aakuîre arî na ûkûrû bwa mîaka magana kenda ja mîrongo îtaantatû na îîrî (962).

²¹Enoki agûkinyia ûkûrû bwa mîaka mîrongo îtaantatû na îtaano (65), nîrîo aagîîre na Methusela.

²²Nyuma ya kûgîa na Methusela, Enoki nî aatûûrîre arî na ngwatanîro înjega na Mûrungu kagiita ka mîaka magana jathatû (300). Ningî nî aarî na ataana bangî na aarî.

²³Enoki aatûûrîre mîaka magana jathatû ja mîrongo îtaantatû na îtaano (365).

²⁴ Enoki nî aatûûrîre arî na ngwatanîro înjega na Mûrungu; tontû bûu, Mûrungu nî aamûjûkîrie, aratiga gûtûûrania na antû.

²⁵Methusela agûkinyia ûkûrû bwa mîaka îgana rîa mîrongo înaana na mûgwanja (187) nîrîo aagîîre na Lameki.

²⁶Nyuma ya kûgîa na Lameki, Methusela nî aatûûrîre mîaka magana mûgwanja ja mîrongo înaana na îîrî (782). Ningî nî aarî na ataana bangî na aarî.

²⁷Methusela aakuîre arî na ûkûrû bwa mîaka magana kenda ja mîrongo îtaantatû na kenda (969).

²⁸Lameki agûkinyia ûkûru bwa mîaka îgana rîa mîrongo înaana na îîrî (182) nî aagîîre na kaîjî,

²⁹nako arageeta Noa, arauga, “Mûtaana ûûjû nîwe ûgaatûma tûûthîrwa nî ngûgî cia mînoga irîa tûritaga tontû bwa ûrîa MWATHANI aarumîre mûthetu.”

³⁰Nyuma ya kûgîa na Noa, Lameki nî aatûûrîre mîaka magana jataano ja mîrongo kenda na îtaano (595). Ningî nî aarî na ataana bangî na aarî.

³¹Lameki aakuîre arî na ûkûrû bwa mîaka magana mûgwanja ja mîrongo mûgwanja na mûgwanja (777).

³²Noa agûkinyia ûkûrû bwa mîaka magana jataano (500), nîrîo aagîîre na Shemu na Hamu na Jafethi.