Read KIMERU BIBLE PROTESTANT EDITION Kîam 50 Bible Online

Kîam 50 - KIMERU BIBLE PROTESTANT EDITION bible

Kîam 50

¹Josefu nî eenamîîrîrie, aracûnca îthe akîrîraga.

²Ningî Josefu nî aaritîre waatho kîrî nthûûmba ciaawe irîa ciaarî na ûûme bwa gwaka bimba mîtheega bitîkoore arauga mwîrî jwa îthe jwaakwe mîtheega ya kûgiria jwoora. Tontû bûû, nthûûmba iu iroomia mwîrî jwa Israeli.

³Ntukû mîrongo îna irathira, nîûntû ngûgî ya kûûmithia mwîrî yeendaga îgiita ring'ana ûu. Nabo Amisri nî baaithikîîrîîre ntukû mîrongo mûgwanja nîûntû bwaawe.

⁴Nacio ntukû cia kwithikîîra ciathira, Josefu nî aarîîrie antû ba nja ya Farao arabeera atîrî, “Itû këethîra ibûkwona mbagîrîte mbarîrieeni kîrî Farao bûmwîre,

⁵ ‘Rîrîa baaba aarî akuî gûkua aatûmîre ndîraciîtia atî nkaamûthika mbîrîreene îrîa eenjîte nthîgûrû ya Kanaani. Tontû bûû, nandî mbîtîkîîria itû mbîte nkathike baaba, rîu ncoke.’”

⁶Farao aramûcokeria aramwîra atîrî, “Îta ûkathike abaagu o ta ûrîa waaciîtîrie.”

⁷Tontû bûû, Josefu areeta kûthika îthe. Nacio nthûûmba cia Farao cionthe na atongeeria barîa baakaranagia na Farao na atongeeria bangî bonthe ba nthîgûrû ya Misri nî beetanîrie nawe.

⁸Antû ba nja ya Josefu bonthe na ataana ba ng'ina, na antû ba nja ya îthe nî beetanîrie nawe. Baatigîre twaana twaao akî na mbûri na ng'ondu na ng'ombe ciaao Gosheni.

⁹Ningî nî eetîre na ngaarî cia ndwaa, na kinya beetithîtie mbarathi. Tontû bûû, baarî gîkundi gîkînene mono.

¹⁰Rîrîa baakinyîre Îtîîriine rîa Atadi, rwongo rwa Jorodani rwa bwa gaiti, nî baarîrîre kîrîro kîaarî na kîeba na baraithikîîra ntukû mûgwanja.

¹¹Rîrîa atûûri ba nthî îîu ya Kanaani boonere kîrîro kîrîa kîaarî au Îtîîriine rîa Atadi, barauga atîrî, “Amisri barî na kwithikîîra gûkûnene mono.” Tontû bûû, antû au areetwa Abeli-mizraimu,[46] nao nî rwongo rwa bwa gaiti rwa Jorodani.

¹²Tontû bûû, ataana ba Jakubu nî baamûthithîrie o ûrîa aabeerîte.

¹³ Nî baamûkamatîre mwanka nthîgûrû ya Kanaani na baramûthika gîkurunguune kîrîa kîaarî Maki-pela bwa gaiti ya Mamure, kîrîa Abrahamu aagûrîre amwe na muunda kuuma kîrî Efuroni ûrîa Mûhiti nîkenda agîa na antû aawe wengwa a kûthikanaga.

¹⁴Nyuma ya kûthika îthe, Josefu nî aacokere Misri amwe na ataana ba ng'ina na barîa bonthe beetanîtie nawe.

¹⁵Rîrîa ataana ba ng'ina ba Josefu boonere atî îthe agûkua, nî beeranîre atîrî, “Kwombîka Josefu akeethîrwa nî eekîte mûthûûro o nîûntû bwa mantû jonthe jarîa twamûthithîria jamaaî?”

¹⁶Tontû bûû, baratûma antû kîrî Josefu kûmwîra atîrî, “Mbere ya abaagu akua aatwîrîre atîrî,

¹⁷‘Bwîre Josefu atîrî, “Ndakwerenca itû ûrekere ataana ba nyakwe maatia jaao na meeyia jaao nîûntû nî baakûthithîrie ûthûûku.” Tontû bûû, nandî twakwerenca itû, rekera nthûûmba cia Mûrungu wa Abaagu maatia jaao.’” Nabo rîrîa baarîîrie Josefu, ararîra.

¹⁸Ataana ba ng'ina kinya bo nî beejîre, baraigwîthia mbere yaawe, baramwîra, “Atîrî, tuî tûrî nthûûmba ciaaku.”

¹⁹Îndî Josefu arabeera atîrî, “Bûgaakîreeni nîûntû ntî, Mûrungu mbûtuîra îgamba!

²⁰Kinya këethîrwa buî nîka bwaanthithagîria ûthûûku, Mûrungu nîka aagarûrîre ûntû bûu bûraa bûbwega nîkenda bûtûma antû babaingî beethîrwa barî mwoyo ta ûu barî naarua.

²¹Tontû bûû, bûgaakîreeni, ngeeta na mbere kûbûmenyeera amwe na twaana tweenu.” Araboomîîria nkoro na arababoreria.

²²Josefu nî aatûûrîre Misri amwe na antû ba nja ya îthe. Josefu aatûûrîre mîaka îgana rîmwe rîa îkûmi (110).

²³Nî oombîre kwona nchiarwa cia Efuraimu mwanka nthukî ya ithatû, na kinya aana ba Makiri mûtaana wa Manase baaciarîrwe Josefu arî o mwoyo na arabagwata.

²⁴Mûthieene Josefu nî eerîre ataana ba ng'ina atîrî, “Ndî akuî gûkua. Îndî gûtî nkaanja Mûrungu akaabwîjîra abûrite nthîgûrû îîjî, abwikie nthîgûrû îrîa eeranîîre na mûciîtio kîrî Abrahamu na Isaaka na Jakubu.”

²⁵ Josefu nî aatûmîre antû ba Israeli bamûciîtîria, arabeera atîrî, “Rîrîa Mûrungu akeeja kûbûrita gûkû, bûkamate marûitû jaakwa kuuma gûkû.”

²⁶Josefu nî aakuîre arî na ûkûrû bwa mîaka îgana rîmwe rîa îkûmi (110). Naju mwîrî jwaawe nî jweekîîrwe mîtheega ya kûgiria jwoora jûreekwa îthandûkûûne kûu Misri.