Read KIMERU BIBLE PROTESTANT EDITION Kîam 6 Bible Online

Kîam 6 - KIMERU BIBLE PROTESTANT EDITION bible

Kîam 6

¹ Naku nî gwaakarîre atîrî, antû nî baambîrîîrie kwingîa nthîgûrûûne kunthe na nî baaciarîre aarî.

²Biûmbe bia îgûrû nî bionere aarî bau barî babathongi, na biraithuurîra aarî bamwe baraa aka baao.

³Tontû bûû, MWATHANI arauga atîrî, “Roho waakwa atîtûûraga ndeene ya muntû kenya na kenya nîkwîthîrwa muntû agatûûraga kagiita gagakai ka mîaka îgana rîmwe rîa mîrongo îîrî.”

⁴ Îgiiteene rîu biûmbe bia îgûrû bikûjûkia aarî ba antû nî biaaciarîre imuntû bibinene mono bieetagwa Nefilimu. Imuntû biu nîbio biaarî îgweta nthîgûrûûne.

⁵ MWATHANI nî oonere atî ûmaramari bwa antû bûkwingîa mono nthîgûrûûne. Ningî aroona atî antû nî baakaraga na mairîrîîria jamathûûku nkoroone ciaao magiita jonthe.

⁶MWATHANI nî aaigîrue bûbûûî mono nîûntû bwa kûûmba muntû na araithikîîra nkoroone yaawe.

⁷Tontû bûû, MWATHANI arauga atîrî, “Nkaathiria antû bonthe nthîgûrûûne na nthirie nyomoo na nyoni na nyamû irîa ciikuuragia na kîu nîûntû nî nkwirira gîtûmi ndaabiûmbîre.”

⁸Îndî Noa nî aagwîrîrie MWATHANI.

⁹ Noa aarî muntû ûmwagîru, ûtaarî na îgi nthukîîne yaao. Noa nî eethagîrwa arî ngwatanîro na Mûrungu.

¹⁰Noa aarî na ataana bathatû, Shemu, na Hamu na Jafethi.

¹¹Îgiiteene rîu nthîgûrû nayo nî yaarî na ûthûûku bûbwingî, na îreethîrwa yûjûri mantû ja ûgîti.

¹²Mûrungu aatega nthîgûrû aroona ûrîa îthûûki, tontû antû bonthe boojûrîtwe nî ûthûûku na mantû ja ûgîti.

¹³Mûrungu areera Noa atîrî, “Ndîkûgiita îgamba kûthiria antû bonthe; nîkwîthîrwa nî boojûrîtie ûgîti nthîgûrûûne. Tontû bûû, nkaathiranîria antû amwe na nthîgûrû.

¹⁴Ithithîrie sabina na mîtî ya mîtarakwa, ûthithie tûnyomba ku, na ûmîthinge bwa oome na ndeene na gîntû gîtîûmba gûkûrûkia rûûjî.

¹⁵Ûjû nîu ûkaamîaka: uraaja bwaayo bwîthîrwe bûrî bwa mita îgana rîmwe rîa mîrongo îtaano (150m); wariî bwaayo bwîthîrwe bûrî bwa mita mîrongo îîrî na ithaano (25m), na gwitia bwa îgûrû îîthîrwe îrî ya mita îkûmi na ithaano (15m).

¹⁶Wimbe sabina îndî ûtigie kîanya kîa nusu mita (0.5m) gatîgatî ka rûthingo na îgûrûgûrû, na mûrango jwaayo jwîthîrwe jûrî rwaruune. Ningî ûmîake îrî na ngoroba îthatû.

¹⁷Tontû rî, nkaurithia ngai ya maburiko nthîgûrûûne, îthirie biûmbe bionthe birîa birî mwoyo. Gîntû kîonthe kîrîa kîrî nthîgûrûûne gîgaakua.

¹⁸Îndî ni ngeeka kîrîkanîro naagwe. Ûgaakûrûka sabineene, gwe na ataana baaku, na mûka waaku na aka ba ataana baaku.

¹⁹Ningî ûkûrûkie biûmbe bionthe birîa birî mwoyo sabineene. Ûbikûrûkie biîrî-biîrî, ndûme na nka na biîthîrwe birî bia mîthemba yonthe nîkenda bitîgaakue.

²⁰O mûthemba jwa nyoni, ûkûrûkie nka na ndûme, na o mûthemba jwa nyomoo, ûkûrûkie nka na ndûme. Ningî o mûthemba jwa nyamû irîa ciikuuragia na kîu, ûkûrûkie nka na ndûme, nîkenda igaatigara irî mwoyo.

²¹Ningî ûjûkie into birîa birîîjagwa bia mîthemba yonthe ûbiîke sabineene nîkenda bikaa biakûrîa biaaku na bia nyomoo iu.”

²² Noa arathithia mantû jonthe kûringana na ûrîa Mûrungu aamwîrîte.