Read KIMERU BIBLE PROTESTANT EDITION Kîam 7 Bible Online

Kîam 7 - KIMERU BIBLE PROTESTANT EDITION bible

Kîam 7

¹MWATHANI nî eerîre Noa atîrî, “Tonya sabineene, gwe na antû ba nja yaaku bonthe, nîûntû nî mboneete atî gwe ûrî muntû ûmwagîru gatîgatî ka antû ba îgiita rîrî.

²Ûkûrûkie o mûthemba jwa nyomoo irîa itî mûgiro, ndume mûgwanja na nka mûgwanja. Ningî ûkûrûkie o mûthemba jwa nyomoo irîa irî mûgiro ndûme îmwe na nka îmwe.

³Ningî ûkûrûkie nyoni kinya cio o mûthemba ndûme mûgwanja na nka mûgwanja, nîkenda mbeeû ciaacio îtîkaathire nthîgûrûûne.

⁴Nîkwîthîrwa ntukû mûgwanja kuuma nandî nkaurithia ngai nthîgûrûûne ntukû mîrongo îna mûthenya na ûtukû, nthirie into bionthe birîa birî mwoyo birîa mpûûmbîte.”

⁵Noa nî aathithîrie mantû jonthe o ta ûrîa MWATHANI aamwîrîte.

⁶Noa aarî na ûkûrû bwa mîaka magana jatantatû (600) rîrîa kwagîîre na ngai ya maburiko nthîgûrûûne.

⁷ We na ataana baawe, na mûka waawe na aka ba ataana baawe baratonya sabineene nîkenda batîkooragwe nî ngai ya maburiko.

⁸Nacio nyomoo irîa itî mûgiro, na nyomoo irîa irî mûgiro na nyoni, na into bionthe birîa biikuuragia na kîu,

⁹birakûrûkua nî Noa sabineene biîrî-biîrî, ndûme na nka, o ta ûrîa Mûrungu aamwîrîte.

¹⁰Ntukû mûgwanja ikûthira ngai ya maburiko îrambîrîîria kuura.

¹¹ Ntukû ya îkûmi na mûgwanja ya mweri jwa îîrî, mwakeene jûrîa Noa aakinyîrie ûkûrû bwa mîaka magana jatantatû (600), ntukû îîu yongwa nîrîo ithima biatûrîkîre na rûûjî runthe rûrîa rûrî rungu rwa nthîgûrû rûrauma na ndirica cia îgûrû irarugûrwa.

¹²Nayo ngai îraura nthîgûrûûne ntukû mîrongo îna (40), mûthenya na ûtukû.

¹³Ntukû o îîu yongwa nîrîo Noa na ataana baawe Shemu, na Hamu na Jafethi, na mûka wa Noa, na aka bo-bathatû ba ataana baawe, baatonyere sabineene.

¹⁴Ningî kinya nyamû cia kîthaka cia mîthemba yonthe, na nyomoo cia ndîîthia cia mîthemba yonthe, na nyamû irîa ciikuuragia na kîu cia mîthemba yonthe, na nyoni cia mîthemba yonthe nî ciaatonyere.

¹⁵Noa arakûrûkia sabineene biûmbe biîrî-biîrî, nka na ndûme.

¹⁶Tontû bûû, birîa bionthe biatonyere sabineene biaarî nka na ndûme cia biûmbe bionthe; biratonya kûringana na ûrîa Mûrungu eerîte Noa. MWATHANI araingîra Noa sabineene.

¹⁷Ngai ya maburiko nî yeetîre na mbere kuura ntukû mîrongo îna (40). Rûûjî naru rûroongeereka, rurookîîria sabina kuuma nthî rûramîereeria îgûrû.

¹⁸Rûûjî nî rweetîre na mbere kwongeereka, rûraimba rwitîîtie bwa îgûrû, nayo sabina îrakara yereerete rûûjîîne.

¹⁹Naru rûûjî nî rweetîre na mbere kwiimba mwanka rûrathika irîma birîa biraaja bionthe nthîgûrûûne.

²⁰Ningî rûûjî nî rweetîre na mbere kwiimba mwanka rûraitia îgûrû rîa irîma mita mûgwanja na nusu (7.5m).

²¹Nabio biûmbe bionthe birîa bietaîtaga nthîgûrû birakua. Nyoni irakua, na nyomoo cia ndîîthia, na nyamû cia kîthaka, na biûmbe bionthe birîa biikuuragia na kîu, na antû bonthe barakua.

²²Gîntû kîonthe kîrîa kîaarî nthî înjûmo na gîaikagia mîrukî kîrakua.

²³Into birîa biaarî na mwoyo nî biaathirîrue nthîgûrûûne, kuuma muntû mwanka nyomoo cia ndîîthia, na into biikuuragia na kîu, na nyoni. Bionthe nî biaathirîrue buru, kûratigara Noa wenka na barîa baarî amwe nawe sabineene.

²⁴Rûûjî naru nî rwakarîre rwigari îgûrû rîa nthîgûrû ntukû îgana rîmwe rîa mîrongo îtaano (150).