Read KIMERU BIBLE PROTESTANT EDITION Kîam 8 Bible Online

Kîam 8 - KIMERU BIBLE PROTESTANT EDITION bible

Kîam 8

¹Îndî Mûrungu nî aaririkanîre Noa na nyamû cia kîthaka cionthe na cia ndîîthia cionthe irîa ciaarî amwe na Noa sabineene. Mûrungu aratûma ruuo ruurutana nthîgûrûûne, naru rûûjî rûraambîrîîria kûwa.

²Ithima birîa biaumîte nthîgûrû birakunîkwa na ndirica cia îgûrû iraingwa. Nayo ngai îrîa yauraga îrakea.

³Rûûjî naru nî rwambîrîîrie kûwa kuuma nthîgûrû, rûreeta rûkîthiraga. Gûgîkinya ntukû ya îgana rîa mîrongo îtaano (150) rûûjî nî rwaarî rûkûnyiia buru.

⁴Ntukû ya îkûmi na mûgwanja ya mweri jwa mûgwanja, sabina îratûûrîîra irîmeene bia Ararati.

⁵Rûûjî naru rûreeta na mbere kûwa o mwanka mweri jwa îkûmi. Ntukû ya mbere ya mweri jwa îkûmi, nîrîo tûthumbî twa irîma twambîrîîrie kwonekana.

⁶Ntukû mîrongo îna (40) ikûthira, Noa nî aarugûrîre ndirica ya sabina îrîa aathithîtie,

⁷nawe ararekeeria nkûngûrû îraumagara. Nayo îrakara îkîbuurûûkaga mwanka rîrîa rûûjî rwawîre rûrathira nthîgûrû.

⁸Ningî aratûma kîjea kuuma sabineene nîkenda amenya këethîra rûûjî nî rûthiri nthîgûrûûne.

⁹Îndî kîjea gîeta kîraaga antû noo amwe arîa kîûmba gûkinya, nakîo kîracoka kîrî we sabineene nîûntû rûûjî no rwakunîkîte nthîgûrû kunthe. Noa aratambûrûkia njara arakîgwata aragîkûrûkia sabineene kûrîa aarî.

¹⁰Noa areeteera mwanka ntukû ingî mûgwanja irathira, nawe aratûma kîjea kaîrî kuuma sabineene.

¹¹Kîjîa kîracoka kîrî we ûgoro. Ningî rî, nî kîarûmîte îbûûra rîa mûzeituni na mûromo rîrîa gîaatuîte o rîo. Tontû bûû, Noa aramenya atî rûûjî nî rûûjaûjîte.

¹²Areeteera ntukû ingî mûgwanja, aratûma kîjea kuuma sabineene. Îndî kîjea gîtacokere kîrî we kaîrî.

¹³Ntukû ya mbere ya mweri jwa mbere jwa mwaka jwa magana jatantatû na jûmwe (601) nîrîo rûûjî rwambîrîîrie kûwa nthîgûrûûne. Noa arakunûra sabina îgûrûgûrû, aroona atî nthîgûrû nî îkûnyaara.

¹⁴Ntukû ya mîrongo îîrî na mûgwanja ya mweri jwa îîrî nthî îreethîrwa îkûnyaara buru.

¹⁵Rîu Mûrungu nî aarîîrie Noa, aramwîra, atîrî,

¹⁶“Umagara sabineene, gwe, na mûka waaku, na ataana baaku na aka ba ataana baaku.

¹⁷Umagaria biûmbe birîa bitûûraga mwoyo bia mîthemba yonthe birîa birî sabineene: nyoni, na nyomoo, na nyamû irîa ciikuuragia na kîu cionthe. Nabio nî biciarane na wingî bithegee nthîgûrûûne, biciarane na bithegee kunthe nthîgûrûûne.”

¹⁸Tontû bûû, Noa na mwekûrû waawe na ataana baawe amwe na aka baao baraumagara sabineene.

¹⁹Nacio nyomoo cionthe, na nyamû irîa ciikuuragia na kîu cionthe, na nyoni cionthe, na gîntû kîonthe kîrîa gîîtaîtaga nthîgûrûûne, nî biaumagarîre kûringana na mîthemba yaabio.

²⁰Noa nî aakîîre MWATHANI kîritîro kîa igongwana. Arajûkia o mûthemba jwa nyomoo irîa itî mûgiro na o mûthemba jwa nyoni irîa itî mûgiro, ararita igongwana bia gwakîîria au kîritîroone.

²¹MWATHANI nî aakinyîîrwe nî mûnyinko jûu na arauga ûjû nkoroone yaawe, “Ntîkaroruma nthîgûrû kaîrî nîûntû bwa muntû, nîûntû mathûgaanio ja nkoro ya muntû jeethagîrwa jarî jamathûûku kuuma wîthî bwaawe. Ningî ntîkarocoka kûthiria into bionthe birîa bitûûraga mwoyo ta ûjû nthithîtie.

²²Îgiita rîonthe rîrîa nthî îkeethîrwa îrî o, gûtîkarîaga magiita ja kwaanda na ja maketha, magiita ja mpio na ja mûruutîra, thaano na ngai na ûtukû na mûthenya.”