Read KIMERU BIBLE PROTESTANT EDITION Kîam 9 Bible Online

Kîam 9 - KIMERU BIBLE PROTESTANT EDITION bible

Kîam 9

¹ Mûrungu nî aatharimîre Noa na ataana baawe, arabeera atîrî, “Ciaraneni na bûthegee na bûûjûre nthîgûrûûne.

²Nî bweei nyomoo cionthe cia nthîgûrû, na nyoni cionthe, na nyamû cionthe irîa ciikuuragia na kîu na makûyû jonthe jarîa jakaraga rûûjîîne; nabio bionthe bibwaathikagîre na bibûkîrage.

³Into bionthe birîa birî mwoyo bikaa biakûrîa bieenu, o ta ûrîa ndaabwere imera. Nandî ndîkûbwaa into bionthe.

⁴ Îndî menyeni bwîja kûrîa nyama cia nyomoo îrî na tharike tontû tharike nîyo mwoyo jwaayo.

⁵Naani nî mma ngaakanûkagia muntû wonthe ûrîa ûkooraga muntû ûngî na nkanûkagie nyomoo îrîa îkooraga muntû.

⁶ Ûrîa wonthe ûkooraga muntû, akooragwa nî muntû ûngî, nîkwîthîrwa Mûrungu oombîre muntû ang'uaneene nawe.

⁷ Naabuî, ciaraneni bwingîe na bûthegee bûûjûre nthîgûrûûne kunthe.”

⁸Mûrungu nî aarîîrie Noa amwe na ataana baawe arabeera atîrî,

⁹“Ni nî nkûthithia kîrîkanîro naabuî na nchiarwa cieenu,

¹⁰na kinya biûmbe bionthe birîa bitûûraga mwoyo birîa birî amwe naabuî; birî nyoni, na nyomoo cia ndîîthia, na nyomoo ingî cionthe cia nthîgûrû irîa irî amwe naabuî, cionthe irîa iraumîre sabineene.

¹¹Nandî ndîkûthithia kîrîkanîro naabuî atî gûtî rîo biûmbe bionthe bikorothirua kaîrî nî ngai ya maburiko. Ningî gûtî rîo kaîrî gûkorogîa ngai ya maburiko ya kûthiria nthîgûrû.”

¹²Mûrungu aracoka arauga atîrî, “Rûrû nîru rwano rwa kîrîkanîro kîrîa nkûthithia naabuî na kinya biûmbe bionthe birîa bitûûraga mwoyo birîa birî amwe naabuî, nakîo nî gîa gûtûûra kenya na kenya.

¹³Ndîgwîka mûkûngambura jwaakwa matuune jwîthagîrwe jûrî rwano rwa kîrîkanîro gîaakwa na nthîgûrû.

¹⁴Atîrî, rîrîa ngaatûmaga gûkeethîrwa kûrî matu na mûkûngambura jwonekane matuune,

¹⁵nkaaririkanaga kîrîkanîro gîaakwa kîrîa ndaathithîrie naabuî na kinya biûmbe bionthe birîa bitûûraga mwoyo. Nayo ngai ya maburiko îtîkorocoka kuura kaîrî îthiria biûmbe bionthe.

¹⁶Rîrîa mûkûngambura jûkoonekanaga matuune, nkajwonaga naani nkaaririkana kîrîkanîro gîaakwa gîa kenya na kenya kîrîa nkaathithîria na biûmbe bionthe birîa bitûûraga mwoyo nthîgûrûûne.”

¹⁷Mûrungu areera Noa atîrî, “Rûu nîru rwano rwa kîrîkanîro kîrîa ûûni ndaathithia na biûmbe bionthe birîa birî nthîgûrûûne.”

¹⁸Ataana ba Noa barîa baaumagarîre sabineene baarî Shemu, na Hamu na Jafethi. Hamu nîwe waarî îthe wa Kanaani.

¹⁹Bau nîbo baarî ataana ba Noa bo-bathatû, na nthîgûrû yonthe yaagîîre antû kuumania nabo.

²⁰Noa aarî mûrîmi na nîwe waarî wa mbere kwîthîrwa arî na muunda jwa mîzabibû.

²¹Nî aanyuîre ndibei yaayo aroogita na aramama îemeene rîaawe arî kîthûnû.

²²Hamu îthe wa Kanaani aroona kîthûnû kîa îthe na areeta areera ataana ba ng'ina bangî bobaîrî barîa baarî oome.

²³Îndî Shemu na Jafethi barajûkia nguû, baramîrîkîîra ituro biaao bobaîrî, bareeta na nyuma, baraguîkîra kîthûnû kîa îthe. Bo baategeete ndeerîa baaumîte, na tontû bûu batoonere kîthûnû kîa îthe.

²⁴Rîrîa mbogita yaathirîre Noa ookîrîîre na aramenya ûrîa mûtaana waawe ûrîa mwanake aamûthithîrîtie.

²⁵Noa arauga atîrî, “Kanaani arogwatwa nî kîrumi; arotuîka nkombo îrîa nini buru ya ataana ba ng'ina.”

²⁶Ningî Noa aracoka arauga, “Arokumua MWATHANI Mûrungu wa Shemu; nawe Kanaani arotuîka nkombo ya Shemu.

²⁷Mûrungu arotûma Jafethi athegea, ningî Jafethi arotûûraga maemeene ja Shemu. Îndî Kanaani arotuîka nkombo yaawe.”

²⁸Noa nî aatûûrîre mîaka magana jathatû ja mîrongo îtaano, nyuma ya ngai ya maburiko îkuura.

²⁹Noa aakuîre arî na ûkûrû bwa mîaka magana kenda ja mîrongo îtaano.