Read KIMERU BIBLE PROTESTANT EDITION 2Sam 1 Bible Online

2Sam 1 - KIMERU BIBLE PROTESTANT EDITION bible

2Sam 1

¹ Kûrakara atîrî, nyuma ya Saûlû gûkûa, Daudi agûcoka, aumîte kûûra Amaleki, nî aakarîre Zikilagi ntukû ijîîrî.

²Ntukû ya ithatû îgûkinya, muntû ûmwe nî aaumîre kambîîne ya Saûlû atambûrangîte nguû ciaawe na aaigererete tîîri mûtwe. Agûkinya kîrî Daudi araigwîthia nthî kwonania nî ainyiîtie.

³Daudi aramûûria, “Nîkû uumîte?” Nawe aramûcokeria aramwîra atîrî, “Nîka ndamatûka kuuma kambîîne ya Aisraeli.”

⁴Daudi aramwîra, “Mbîîra nîatîa kûrakarîkîre?” Muntû ûu aramwîra atîrî, “Njûûrî cieetû iramatûkîre kuuma ndweene na babaingî baao booragwa. Kinya Saûlû na mûtaana waawe Jonathani nî barooragîrwe.”

⁵Rîu Daudi arooria mûthaka ûu atîrî, “Nîatîa gwe ûkûmenya Saûlû na mûtaana waawe Jonathani nî bakuîte?”

⁶Mûthaka ûu aramwîra, “Nîka ndîreethîrwe ndî kîrîmeene kîa Giliboa, ndoona Saûlû acigîkîte na îtumo rîaawe na ndoona ngaarî cia ndwaa na eetithia ba mbarathi bamûkirimanîtie.

⁷Nawe agûciûgûra ambona ambîta, naani ndamwîtîka.

⁸Ambûûria, ‘Nîgwe ûû?’ Naani Ndamûcokeria, ‘Ndî Mûamaleki.’

⁹Nawe aambîîra atîrî, ‘Njû akuî naani ûntumbûre, tontû ndî rwaakaîne rûrûnene rwa gîkuû na ndî o mwoyo.’

¹⁰Naani tontû nî ndîroonaga atî atîtiga agwa, ndarûngama akuî nawe ndamûûraga. Rîu ndajûkia thirû îrîa yaarî mûtwe jwaawe na mûkang'i jûrîa ekîrîte njara yaawe, naani nîrîo ndakûretera bio mwathi waakwa.”

¹¹Rîu Daudi nî aatambûrîre nguû ciaawe na kinya antû barîa baarî nawe baratambûra ciaao, nîûntû bwa kwithikîîra.

¹²Bararîra baithikîîrîte na baraciata biakûrîa mwanka ûgoro, nîûntû bwa Saûlû na mûtaana waawe Jonathani, na nîûntû bwa Israeli, antû ba MWATHANI, nîkwîthîrwa antû babaingî nî boragîri ndweene.

¹³Nyumeene Daudi nî oorîrie mûthaka ûu wamwîrîre mantû jau atîrî, “Nîkû uumîte?” Nawe aramûcokeria, “Ndî mûtaana wa mûgeni, Mûamaleki ûrîa ûtûûraga gûkû.”

¹⁴Daudi arauga, “Nîatîa gwe ûkûûmîîria ûgatambûrûkia njara yaaku ûkooraga mûnene mwîtûûrîrua maguta wa MWATHANI?”

¹⁵Rîu Daudi areeta mûthaka ûmwe aramwîra atîrî, “Nthiî ûmûûrage!” Areeta arooraga Mûamaleki ûu.

¹⁶Daudi nî aarî akûmwîra, “Tharike yaaku nî îgûcokere tontû nî gwengwa waikûjîîra na kanyua rîrîa wauga nîgwe ûrooragîre mûnene mwîtûûrîrua maguta wa MWATHANI.”

¹⁷Daudi nî aainîre rwîmbo rwa kîrîro nîûntû bwa Saûlû na mûtaana waawe Jonathani.

¹⁸ Nawe nî aaugîre rûritanwe antû ba Juda. Rwîmbo rûu nî rwandîki yukuune rîa Jashari.

¹⁹“Ûkumio bwaaku Israeli bûkûûragîrwa Irîmene. Nîatîa itû nchamba ciagwa!

²⁰Bûkaarieni mantû jau ntûûra ya Gathi kana bûjaugîîrîa njîreene cia Ashikeloni, aka ba Afilisti batîkeeje kwigua bagwîrua, aka ba antû batiijî Mûrungu batîkeeje gûkena.

²¹Buî irîma bia Giliboa, îme rîkarogwa kana ngai yuura îgûrû rîeenu. Miuunda yeenu yuuma irio tontû nîku rong'o ya nchamba îgwîte îkagîa nthao, rong'o ya Saûlû, îkarîte îtîaki maguta.

²²Ûta bwa Jonathani na rûchiû rwa Saûlû bitaacokîre ûtheri, nî biranyuîre maguta na bianyua tharike ya anthû

²³Saûlû na Jonathani antû babeende na babathongi, mwoyoone na gîkuûne bataathûkana, baarî mpwîî o ta ndiiû, na înya o ta ngatûnyi.

²⁴Îbuî aarî ba Israeli, rîreeni nîûntû bwa Saûlû ûrîa ûrabwîkagîra nguû cia goro intuune inthongi na akabûgemia na into bia thaabu.

²⁵Nîatîa itû nchamba ciaagwa ndweene! Jonathani agwîte ooragîri irîmeene.

²⁶Nî ndiithikîîrîte nîûntû bwaaku mûtaana wa baaba, Jonathani. Nî ûraarî ûmwega kîrî ni mono, na wendo bwaaku kîrî ni nî bûrakûrûkîte ûrîa aka boomba gûmpenda.

²⁷Nîatîa itû nchamba ciagwa, na kûûra, mathaga ja ndwaa jakûûra ûtheri.”