Read KIMERU BIBLE PROTESTANT EDITION 2Sam 10 Bible Online

2Sam 10 - KIMERU BIBLE PROTESTANT EDITION bible

2Sam 10

¹Nyuma ya mantû jau mûnene wa antû ba Amoni arakua. Mûtaana waawe Hanuni araa mûnene.

²Mûnene Daudi arauga atîrî, “Nî kaaba nkoonania ngwatanîro na mûtaana waawe Hanuni, o ta ûrîa îthe aanthithagîria.” Tontû bûû, Daudi aratûma antû beeta kwithikîîra nawe nîûntû bwa gîkuû kîa îthe. Nthûûmba iu cia Daudi ireeta irakinya nthîgûrû ya antû ba Amoni.

³Îndî atongeeria ba Amoni bareera Hanuni atîrî, “Nîka ûkûthûgaania atî tontû Daudi agûtûma antû beeja kwithikîîra amwe naagwe ka eekîîrîte abaagu? Nî mma Daudi atûmîte antû baba nîkenda bathûûja ntûûra bamenya ûrîa bakamîthiria!”

⁴Hanuni arajûkia nthûûmba iu cia Daudi aracienja ireru rûteere rûmwe o muntû. Aracoka aragiita nguû ciaao îchunchî biîrî akîgitagîîra kauna, rîu arabeera baane.

⁵Nthûûmba îîu nî ciathaithîrue mono. Rîrîa Daudi aamenyithîrue mantû jau nî aatûmanîre arauga bakare kûu ntûûreene ya Jeriko mwanka rîrîa ireru biaao bigakûra, rîu bacoke.

⁶Antû ba Amoni bakûmenya atî bakûthûûria Daudi, aa mûnthû waao, barakombora asikarî ngiri mîrongo îîrî (20,000) kuuma nthîgûrû ya Sîria ba rûteere rwa Bethirehobu na Zoba. Mûnene Maaka aarî na asikarî ngiri îmwe (1,000) na bangî ngiri îkûmi na ijîîrî (12,000) cia antû ba Tobu.

⁷Daudi akwigua mantû jau, nî aatûmîre Joabu na atongeeria ba njûûrî yonthe kûrwaa nabo.

⁸Njûûrî cia Amoni iraumagara irakara mpingîroone ya ntûûra ya Raba, nacio njûûrî cia Sîria na Tobu na Maaka ciraibanga kîeniine.

⁹Joabu akwona nî acîgîîrîîtue mbere na nyuma, arajûkia asikarî barîa nchamba cia ndwaa nîkenda barwaa na njûûrî cia Sîria.

¹⁰Mbûûtû îngî îratongeerua nî Abishai mûtaana wa ng'ina wa Joabu bararwaa na njûûrî cia Amoni.

¹¹Joabu aramwîra, “Woona njûûrî cia Sîria nî igûmpûûmba ûkeeja gûnteethia. Naani ndoona njûûrî cia Amoni nî igûkûûmba, nkeeja ngûteethie.

¹²Gîa na inya na ûmîîrie! Tiga tûrwee ndwaa ya arûme nîûntû bwa antû beetû na ntûûra cia Mûrungu weetû. MWATHANI arothithia ûrîa akwona kwagîrîte!”

¹³Rîu Joabu na njûûrî yaawe baretaîta akuî na njûûrî cia Sîria nîkenda barwaa, îndî njûûrî cia Sîria iramatûka.

¹⁴Rîrîa njûûrî cia Amoni cionere njûûrî cia Sîria ikûmatûka, nabo baramatûka Abishai, barakûrûka ntûûreene. Joabu aratiga kûrwaa na antû ba Amoni aracoka Jerusalemu.

¹⁵Îndî rîrîa antû ba Sîria boonere bakûûmbwa nî antû ba Israeli, baroothûrania njûûrî ciaao amwe.

¹⁶Mûnene Hadadezeri aratûmanîra njûûrî cia Sîria irîa ciaarî rwongo rwa mûuro jwa Eufurate, nabo bareeta Helamu batongeeretue nî Shobaki, ûrîa waarî mûtongeeria wa njûûrî cia Hadadezeri.

¹⁷Rîrîa Daudi eerîrwe mantû jau, nawe arothûrania njûûrî cia Israeli, barauna rwongo rûngî rwa mûuro jwa Jorodani bareeta ntûûra ya Helamu. Njûûrî cia Sîria iraumagara, barambîrîria kûrwaa.

¹⁸Njûûrî cia Israeli iraûûra njûûrî cia Sîria mwanka baramatûka. Daudi na njûûrî ciaawe barooraga antû ba Sîria magana mûgwanja (700) barîa eetithia ba ngaarî cia ndwaa, ngiri mîrongo îna (40,000) cia barîa beetithîe mbarathi, na bareekîra Shobaki mûtongeeria wa njûûrî cia Sîria rûgûma, nawe arakuîra au.

¹⁹Rîu rîrîa anene bonthe ba nthîgûrû irîa ciagwatanîrîte na mûnene Hadadezeri boonere bakûûmbwa nî Israeli, baratuma thîîrî, baraa nkombo cia Israeli. Kuuma rîu antû ba Sîria barakîra gûteethereria antû ba Amoni kaîrî.