Read KIMERU BIBLE PROTESTANT EDITION 2Sam 11 Bible Online

2Sam 11 - KIMERU BIBLE PROTESTANT EDITION bible

2Sam 11

¹ Kîambîrîriene kîa mwaka, rîrîa anene baamenyeretie gwîtaga ndweene, Daudi nî aatûmîre Joabu arî na nthûûmba ciaawe, na njûûrî ya Israeli yonthe. Nabo bareeta barooraga antû ba Amoni mono na baracîgîîria ntûûra ya Raba. Îndî Daudi aatigi Jerusalemu.

²Kûrakara atîrî, gûkûrura Daudi nî ookîrîîre arîa amami araambîrîria gwîtaîta îgûrûgûrû rîa gîkaro kîa mûnene. Arî kûu, nî oonîre mûka akîthamba. Mûka ûu aarî ûmûthongi mono.

³Daudi aratûmana nîkenda amenya mûka ûu aarî ûû. Areerwa, “Nî Bathisheba mwarî wa Eliamu, mûka wa Uria, Mûhiti.”

⁴Rîu Daudi aratûmana, mûka ûu areeta kûgîîrwa. Akwîja kîrî we, Daudi aramûthengeera. Mûka ûu nawe aarî akûthiria kwitheria nyuma ya tharike yaawe ya mweri. Mûka ûu araana nja yaawe.

⁵Nawe mûka ûu nî aagîîre îu, na aratûmana kîrî Daudi, aramwîra, “Ndî ûmûrito.”

⁶Nyuma ya bûu Daudi nî aatûmanîre kîrî Joabu akîmwîraga atîrî, “Ntûmîra Uria, Mûhiti.” Joabu nawe aratûma Uria kîrî Daudi.

⁷Uria aagwîta, Daudi aramûûria ûrîa Joabu aakari na ûrîa njûûrî yaakari, na ûrîa ndwaa yeetîte na mbere.

⁸Rîu Daudi areera Uria, “Îta nja yaaku ûkaurûke wîîrie magûrû.” Uria arookîîra areeta, mûnene nawe aratûmanîra kîewa giikua nja ya Uria.

⁹Îndî Uria antû a kwaana nja, aramama mwîrîga amwe na akaria barîa baakaragia gîkaro kîa mûnene.

¹⁰Nabo bareera Daudi “Uria atîraanîre nja kwaawe.” Daudi rîu aramûûria atîrî, “Nîkî tontû ûtîraanîre nja gwaaku, na nîu ûraumîte rûgendo?”

¹¹Uria aramûcokeria, “Arûme ba Israeli na Juda barî kûraaja ndweene maemeene, Joabu na nthûûmba ciaawe nabo barî kîeniine baambîte kambî na Îthandûkû rîa kîrîkanîro narîo rîrî nao. Nîatîa ni mpûûmbîkia kwaana nja gûkarania na mwekûrû waakwa, ndîa na nyua? O ta ûrîa MWATHANI atwîîre mwoyo naagwe watûûra mwoyo, ntîûmba kûthithia ûntû ta bûu.”

¹²Rîu Daudi areera Uria, “Nîu kara aja naarua, naani rûûjû ngakûrekeeria ûcoke.” Uria arakara Jerusalemu ntukû îîu na rûûnene.

¹³Daudi aramwîîta kwaawe nîkenda arîa biakûrîa. Daudi aramwaa biakûnyua, Uria aroogita. Îndî gûgûtuka, Uria areeta kûraara na akaria ba gîkaro kîa mûnene o kaîrî na ataanîre nja kwaawe. Aramamîra nguû ciaawe.

¹⁴Rûûneene rûûkîrî Daudi araandîkîra Joabu barûga aratûma Uria amiikia.

¹⁵Barûgeene îîu Daudi aandîkîte ûjû “Îîka Uria kîrî antû barîa barî mbere ndweene, arîa ndwaa îng'eenti mono. Rîu bûcoke nyuma bûmûtige nîkenda ooragwa.”

¹⁶Rîrîa Joabu acîgîîrîîtie ntûûra, areera Uria akare arîa Joabu aamenyaga mbûûtû cia anthû nî ciaarî na inya mono.

¹⁷Njûûrî cia anthû ikuumagara ntûûreene, irarwaa na njûûrî cia Joabu. Antû ba Daudi bamwe barooragwa. Kinya Uria, Mûhiti arooragwa.

¹⁸Rîu Joabu aratûmana kîrî Daudi akîmûmenyithagia ûrîa ndwaa yeetîte na mbere.

¹⁹Areera mûtûmwa atîrî, “Wamenya ûkwîra mûnene mantû ja ûrîa ndwaa îîtîte na mbere,

²⁰mûnene akëeja kûthûûra na agakûûria, ‘Nîkî tontû bwîtîre akuî na rûthingo rwa ntûûra? Nîka bûtîkîmenyaga boomba kûbûratha barî îgûrû rîa rûthingo?

²¹ Nîka bûtîkûririkana ûrîa Abimeleki mûtaana wa Gideoni ooragîrwe? Mûka aagwîthîrie iiga rîa gûkia kuuma rûthingoone rîramûûragîra au Thebezi. Nîkî îndî tontû bûgwîtaga akuî na rûthingo?’ Rîu ûmûcokerie atîrî, ‘Kinya mûtongeeria wa gîkundi kîa ndwaa Uria nî akuîte.’”

²²Mûtûmwa ûu nî eetîre areera Daudi mantû jonthe jarîa Joabu amûtûmîte najo.

²³Aramwîra atîrî, “Njûûrî cia anthû beetû ciumagarîre ntûûreene cieeja kîeniine kûrwaa naatuî. Beethîrwa barî na inya mono, îndî twabeenga beeta mpingîroone ya ntûûra.

²⁴Rîu batûratha na mîgwî barî îgûrû rîa rûthingo na nthûûmba ciaaku mûnene imwe ciakua, na kinya Uria ooragwa!”

²⁵Daudi areera mûtûmwa ûu, “Îîra Joabu akámaka, tontû ndweene muntû atîûmba kûmenya nûû ûgakua. Ithûkîreni ntûûra na inya mwanka bûmîthirie. Naagwe aria ûkîmwîkagîra inya.”

²⁶Rîrîa Bathisheba aigîrue Uria, mûkûrû waawe agûkua, araithikîîra nîûntû bwaawe.

²⁷Akûthiria kwithikîîra, Daudi aramûtûmanîra aikua gîkaroone kîa ûnene bwaawe. Aramûgûra, araa mwekûrû waawe na aramûciarîra kaana. MWATHANI arathûûrua nî Daudi.